لەسەر پەشیمانی یان پاشگەزبوونەوە، گەلێك گوتراوە. ژیان ئەزموونەو، هەر عەقڵەش لە خەسارێ، واتا راستكردنەوەی هەڵەكان، گوڕدانە بەبەردەوامی رەوتی تەمەن.
بەش بەحاڵی خۆم سەیرە لەلام كەسانێك كە بڵێن: بەدرێژایی تەمەنم لەهیچ شتێكم یا كارێكم پەشیمان و باشگەزنیم، دیارە من لە خۆمەوە لەوانەش دەڕوانم، سەراپای تەمەنم، تەنها منداڵی و مێردمنداڵی لێدەركەی، لەبوارەكانی ئەدەب و هونەر كارم كردووە، جگە لەوە هەر لە ژیانی رۆژانەشمدا، بەتایبەتی رۆژانێك لەرێڕەوی ژیانی گشت كەسێكدا، رۆژانی هەرزەیی هەیە، كە بە وردی حساب بۆ گشت وردو درشتی ناكەی، ئەوە بەدڵنیاییەوە دەكەوێتە هەڵپەو پەلەكردنێ كە كاری ناتەواو دەكەیت و كاڵ و كرچی و ناتەواویی پێوە دیارەو دەنوێنێ. پاشان رۆژانێ دادێ بەدڵ دەڵێت: بریا ئەوەم نەكردایە، ئەگەر هەنووكە دەبوو باشترم دەكرد، نەدەبوو ئەو هەڵەیەم لەدەست دەرچوویایە. جاران دەیانگوت:پەشیمانی دادت نادات، پاشان گەندۆران بەئەژنۆی پەشیمانی دەشكێنێ، یان، پاشان پەنجەی پەشیمانی دەگەزی.. لەگەڵ ئەوانەشدا دەگوترێ، گەڕانەوە لە هەڵە چاكەكارییە. بێگومان لەدوتۆی ئەدەبیاتی كوردیدا خەرمانەهایە نموونە هەیە، ئەوە(سالم) لەئاكامی نەهامەتی و ناكامییەكانی گەلی كوردەوە، بەتایبەتی، پاش جەنگی ناسراو بەجەنگی (عەزیز بەگ)، فەرموویەتی((گێژەڵوكەی بای نەدامەت تاریكی كرد سەفحەی جیهان....)).
كەواتە زۆرجار پەشیمانی یان داننانی پیادا، دادی مرۆڤ دەدات. لەئاینیشدا فەرموویان، گەر لەدوا ساتەكانی ژیانیشدا بێ پەشیمانی لە رەفتارو كرداری خراپەو چوونە سەر رێی راست درووستە، بەڵام هەتا زووتر بێ چاكەی زیاترەو هەمیشە خوداوەند سینە فراوانی بەخشندەیی و لێبووردنە، چونكە خاوەنی میهر و نەوایە..
بەكورتییەكەی و بەكوردییەكەی، ئەم هەموو بەسەركردنەوەیەو شێرەو بێرەیە بەم و شیردا بۆ داپیردایەم، لەپای ئەو پەشیمانییەوەیە، كە پتر لە چل ساڵی ڕەبەقی بەسەردا رابووردووە، هەرچەندە من لەو مرۆڤانەم، هەمیشە خۆم رەنجدانوەو كەسم نەڕەنجاندووە، ئەگەر تەوریشیان لەكەللەم دابێ گوڵم لەسەریان داوە، من خۆم كوردو كورد واتەنی هەر كانییەك قومێ ئاوم لێخواردبێتەوە مرواری زێڕی رێزو خۆشەویستیم بە ملدا كردووە، نەك خوانەخواستە بەردی لێخنكەرەم تێهاویشتبێ.
ئەوەبوو لەكۆمەڵی هونەرو وێژەی كوردی، كە ماڵە باوكی هونەرمەندانە كارم دەكرد، هەموان رێزیان لێدەگرتم و پشتیوانییان لێدەكردم و هاندەرم بوون. ئەو دەمە وای بۆ چووم، كە دەبێت لەو هەواری هونەرەدا، منیش ماڵۆچكەیەكم هەبێ، یان دەوارو رەشماڵێكی خۆم هەبێ، چونكە لە روانگەیەكی دیكەوە لەهونەرم دەڕوانی. بۆیە لەتەك یارانێكدا لەسەر دامەزراندنی تیپێكی شانۆیی نوێ رێككەوتین و كارم بۆ كرد. تیپی پێشڕەوم دامەزراندن و زاڵبووم بەسەر دەیان كۆسپ و تەگەرەو رێگردا، جگە لەوەی دەبوو لەگەڵ خۆمدا چەند هونەرمەندێكی دەرچووی پەیمانگەی هونەرەجوانەكان یان ئاكادیمیی هونەرەجوانەكان بەشداری ئەو داواكاریی دامەزراندنە بن، ئەوەبوو ئەوانەی رووی داوام لێنان، كەسییان دەستیان بە روومەوە نەنا وەكو بەڕێزان(حەسەن تەنیا، سەلمان فایەق، نەوزاد مەجید، بەدیعە دارتاش .....) دەستمان بەكاركرد، ژمارەیەك بەرهەمی هەرە دیاری بزاڤی شانۆی كوردیم پێشكەش كرد، وەك(گۆرانی چایكا، پردی وڵات، چەخماخە، لانەوازان و لالۆ ڤانیا،خەج و سیامەند .....) لەسەروو ئەوەوە دەرهێنەروئەكتەرو مامۆستایان بووم، زۆر ناڕەحەتیشم لەئەستۆ نابوو، بەرەبەرە هەستم بە ركەبەرایەتی و ململانێیەكی قین لەدڵانەی تەواو ناڕەوا كرد، ناچار تیپەكەم بۆ بەجێهێشتن و گوتم دەسا با بە ئارەزووی خۆیان تەراتین بكەن و بۆیان تەخت بێ.
بەڵام ئەوەی سەیر هەندێ لەوانەی كە هەر لەسەرەتاشەوە بەئەندام بوونیان رازی نەبووم، چونكە لەئاستی رۆشنبیری و هونەری و رەوەشتی ئەوتۆدا نەبوون كە هاوشانم بن. گەلێك چاكەم دەرهەقی هەریەكێكیان كردووە، چاكەش، كورد واتەنی:((چاكە بكەو بیدەبەدەم ئاوەوە))، هەرچەندە كەسانێك لەو تیپەدا بوون لەو دنیاش هەر خۆشم دەوێن و خۆشیان دەزانن مەبەستم كێیە، ئەوانی دیكەش((لەخۆیان عەیانن)). بەداخەوە هەندێ لەو كۆلكە مرۆڤانە، بەهەڵە لەماركسیزمی لینینیزم گەیبوون، كە بۆ ئەوان حاڵی بوون مەحاڵ بوو،((حوشترو حەمام كوجا مەرحەبا))، دەنا ماركسیەت هەمیشە زانستێكی باڵاو بە نرخە، نازانم لەو كتێبی(سەرمایە)یەی(ماركس)كە بە چل ساڵێ ماندووبوون و كۆشش نووسیبووی، كە بەردی بناغەی ئەو ڕێبازەیە،چۆنی لێی تێدەگەن، چونكە بۆیان نەرمەقووت نییە، دیارە منیان بە بیری كوردایەتی یان ئەوپەڕی نەتەوایەتی تۆمەتبار دەكرد كە تاوان نییە، بەهەرحاڵ ئەم قینەیان هەر لە كن بوو.
ئەوەبوو لەو ماوەیەدا، كاكی ئازیزم مامۆستا(ڕەئووف بێگەرد)كە هەمیشە نووسەرێكی كوردپەروەرو بە هەڵوێست بووەو ئەدەبەكەی، بەر لە من گەواهی ئەو ڕاستیەی بۆ دەدەن، بەڕێزیان داوای لێكردم بۆ ژمارەی تایبەتی گۆڤاری ڕۆڤاربە هونەرمەندی خوالێخۆشبوو عوسمان چێوار كە ئەندامی تیپەكەم بووەو جگە لەوەی لە ژمارەیەك لە كارەكانی مندا ئەكتەر بووە، هەروەها بەڕێز مامۆستا(ئازاد بەرزنجی) كە هەمیشە مایەی شانازییەو بە نموونەیەكی باڵای زرنگی دادەنێم، ئەویش لەسەر هەمان بابەت و داوا جەختی فەرموو، منیش چ لەبەر گیانی كاكە عوسمان و هەروەها قەدرگرانی ئەو دوو مامۆستایەو ڕێزو خۆشەویستیم بۆ خێزان و بنەماڵەی خوالێخۆشبوو بە خامەی دڵ و ئەڤین و هونەرمەندانە هاتمە حزووڕ..
بەڵام ئەوەی لام سەیر بوو، چەند ئازیزێكم بینی نیگەران و لالووت بوون لەو گۆڤارو دەزگایە، بە ڕاستی منیش لەبەر دەردەداری بیناییم، كە دكتۆرەكانم خوێندنەوەیان لێ قەدەغە كردبووم، نەمخوێندبوویەوە، پاش زۆركردنم لەو دۆستانەم حاڵ و حسابەكەیان بۆ گێڕامەوە، منیش هەرچۆنێ بێ بەو زەڕەبینە لارجەرەوە كە بۆم تەرخان كراوە، نووسینی یەكێك لەو نابووتانەم خوێندەوە، كە جگە لە هێڕشی ناڕەواو قسەی هەلەق و مەلەق كە نیشانەی بێ ئەمەكی و بێ بەختیەتی كە بواری پەروەردەكردنی بۆ نەڕەخساوە، ئەمە هەرچۆن گۆرگی مەزن واتەنی(( بەلایەوە گرنگ نییە لە پای خۆگەرمكردنەوەی خۆیدا دارستانێك بسووتێنێ)).
جگە لەوە سوكایەتی بە هونەرو هونەرمەندانی شۆڕشی ئەیلوولی مەزن كردووە، كە مایەی شانازی ئەو ڕۆشنبیرانەیە كە شەرەفی بەشداریی ئەو شۆڕشەیان بەركەوتووە.
چونكە خۆی و كەسانێك بە ڕەوا دەبینێ كە بەشدارییان نەكردووەو مشەخۆرییان پێ ڕەواتر بووە، باشە بۆ ئەو مشەخۆرییەیان لە باوەش ڕژێمی بەغدادا نەدەكرد.
تانووتی لە شانۆیی(چاڵی جەرگی پیرێژن)م داوە كە لە چیرۆكی(حسێن عارف)ی گەورە نووسەرەو ئامادەم كردبوو و دەرهێنەریشی بووم، كە جاری یەكەم لە یۆبیڵی (پارتی دیموكراتی كوردستان) لە هۆڵی كراوەی( خلد) لە بەغدا پێشكەشم كردو بۆ جاری دووەم لە سلێمانی و پاشان لە كۆنگرەی ئەدیبانی كورد لە شاری هەولێر، لە ڕۆژانی شۆڕشیشدا لە سەر شانۆی گەڕۆك لە (حاجی هۆمەران) گوایە مامۆستام (حوسێن عارف)پێی باش نەبووە، حەز دەكەم لە مامۆستا بپرسن، من بەش بە حاڵی خۆم هیچ بەرهەمێكم نەكردووە كە بایەخ و بەهای جوانتری پێ نەبەخشم، بەڵام(پیرەمێرد) هەر زوو وەرامی ئەو نیمچە جانەوەرانەی داوەتەوە((پەڵی بەرد بۆ پەلی بەرزەو
لەقەش بۆ داری بەردارە))
جگە لەم پەرپووتە یەكێكی دیكەش لە سلێمانی لەسەر قسەكانم ناماقووڵی كردووە.
بەهەرحاڵ ئەوانە هەر خۆیان بە خۆیان بن و ناچار مام ئەوپەڕی پەشیمانی حاسڵ بكەم سەبارەت بە دامەزراندنی تیپی پێشڕەو هەر لەبەر دڵی ئەوان ئەو تیپەم لە خۆم بێبەری كرد، هەرگیز كارم تیادا نەكردەوە، تكایە یارانم لێم زویر نەبێ، حەپان بۆ مانگەشەو بێزاری كردووم، چغەشی دادیان نادات، مادامەكی ئەوانە لەو تیپەدا بوون، حاشا منی تیادا نەبووم..