سەرەتا پێویستە بڵێین: ئاشكرایە كە باندی تیرۆریستی داعش دروستبووی ئەمڕۆ و دوێنێ نییە، بەڵكو كارو هزرو هەڵسوكەوتی ئەو باندە درێژەپێدەری مێژوویەكی پڕ لە توندڕەوی و تاریكی تاقمگەلێكی ناسراون لە مێژووی ئیسلامدا بەناوی (الخوارج ) واتە: (دەرچووەكان). كە سەریان هەڵداو لە ڕەوتی ئاسایی میانڕەوی تێكڕای موسڵمانان لەسەردەمەكانی حەزرەتی عەلی یەوە (ر.خ) جیابوونەوە. پاشان ئەو كۆمەڵە دەرچووە لە ڕێڕەوی ڕاستەقینەی ئایینی پڕ لە لێبووردن و خۆشەویستی ناو بە ناو پەیدا دەبوونەوە بەپێی هەلومەرج و ژینگەی تایبەت، واتە هەر كاتوساتێك لەباربوایە بۆ بیری توندڕەوی (دەرچووەكان) دەمەودەست دەیانقۆستەوە و وەك قارچكی مارانەی بەهاران زیندوو دەبوونەوە بەخۆیانەوە خەڵكی نەفامی سادەیان هەڵدەخەڵەتاندو بەرەو هەڵدێری هەتا هەتایی دەیانبردن.. وەك گوتراوە (ئای ئەمڕۆش چەندە لە دوێنێ دەچێت!)، وەختێك كە (دەرچووەكانی سەردەم) لە ئایینی ڕاستەقینەی ئیسلام هەلومەرجیان بینییەوە بۆ ڕاگەیاندنی بیری توندڕەوی خۆیان، دیسان بەربوونەوە گیانی خەڵكی بە تێكڕاو جیهانی ئیسلامی بەتایبەت، ناشیرینترین و قێزەوەنترین كاریان ئەنجام دا بەتایبەتی خوێنمژەكانی رێكخراوی بە نێو (دەوڵەتی ئیسلامیی لە عێراق و شام)، كەلە ڕاستیدا نە ئەركان و پایەكانی دەوڵەتیان تێدا هاتۆتەجێ، نە هەڵسوكەوتیشیان لەگەڵ بنەماكانی ئیسلامی راستەقینەدا یەك دەگرێتەوە . بەڵام ئاشكرایە بۆ ئامانجە سیاسیەكانی خۆیان ئیستیغلالی دروشمەكانی ئیسلامیان كردووە. لێرەدا ئەوەی پێویستە بزانرێت دوو جۆر لە (داعش ) بوونی هەیە:
جۆری یەكەم: لە دەرەوەی سنووری هەرێمی كوردستان شەڕی ستەمكارانە لە دژی میللەتی كورد بە موسڵمان و تێكڕای كەمایەتییەكانی دیكە ئەنجام دەدەن. كە دوژمنێكی ئاشكران و شەڕی ئاشكرا لە دژی ئیرادەی میللەتێكی ئازاو ئازاددا دەكەن، ئاكامەكەشی بە یارمەتی پەروەردگار پاشان بە هیممەتی بازووی پێشمەرگە هەر شكستی تیرۆریستانە، ئەوەتا وردە وردە هەر لە دنیادا بە ئاگری دۆزەخ دەسووتێن و رۆژ لە دوای رۆژ دەپووكێنەوە.
جۆری دووەم: لە ناوەوەی سنووری هەرێمی كوردستاندا بوونیان هەیە و لەچوارچێوەی بڕێك هەلپەرستی توندڕۆی سەلەفیدا خۆیان دەبیننەوە، ئەمانە تابووری پێنجەمن و لە سەرەوە بە دەم لەگەڵ پێشمەرگەدان و لە ژێریشەوە بە كردەوە بەردەوام كار بۆ داعشەكانی دەرەوەی سنووری پێشمەرگە دەكەن، بە ئاشكرا لە رێگەی چالاكییەكانیانەوە ئابوونەو هێزی مرۆیی بۆ تیرۆریستان دەنێرن و ڕاگەیاندنەكانیان بەردەوام بیرو مەنهەج و عەقیدەی توندڕەویی سەلەفی داعشی بڵاو دەكاتەوە و گەنجانی كوردستان بەرەو دەرەوەی سنووری هەرێم دەنێرن یاخود هانیان دەدەن لە دژی ئەزموونی كورد كاربكەن كە لە چوارچێوەی دەزگا شەرعییەكانی سەرۆكایەتی هەرێم و پەرلەمان و حكومەتی كوردستاندا خۆی دەبینێتەوە. بەردەوام بە ناوی حەڵاڵ و حەرامەوە بیری سەلەفی داعشی بڵاو دەكەنەوە خەڵكێكی سادەش بە زمانی لوسی درێژی پڕ مەكرو خیانەت و فیتنە و دەجەل و شەعوەزەیان سەرگەردان دەبێت. بەڵام جێگەی سەرسوڕمان و نەنگییە كە هەندێك لەو توندڕەوانە تا ئەمڕۆش شوێن و پێگەی خۆیان هەیەو تەنانەت لە پەنا یاسا و لە بەرچاو دەزگاكانی پەرلەمان و حكومەتی هەرێمی كوردستاندا دەست واڵاكراون و كاریان مەیسەرە و پۆستیان پێدەدرێت و چالاكییە هەمەچەشنەكانیان درێژە پێدەدەن!.
هەر ئەوانەی تا دوێنێ پەرلەمان و حكومەت و پێشمەرگەیان بە كافرو لادەرو موشریك و زەندیق لە قەڵەم دەدا، ئەمڕۆ لە دەستگاكانی ئەم هەرێمەدا لە پێگەی هەستیاردان و باس لە مافی مرۆڤ و دیموكراسی دەكەن!! واتە 180 پلە (بە تاكتیك) لە بیرو باوەڕی ئەوسای خۆیان هەڵگەڕاونەتەوە، كە سەدان گەنجیان لە سەری بە كوشت دا وسەدانی دیكەیشیان تیرۆر كرد، نەشمانبیست لە دەزگایەكی فەرمی یان نافەرمیدا ئیدانەی رابردووی قێزەوەنی خۆیان بكەن، كەواتە ئەمەش جۆرێكە لە تاكتیك و بۆ هەلی گونجاو دەگەڕێن كە هەركات دەستیان كەوت ئەم میللەتە لە سەر بیروڕا قەتلوعام بكەن! بەڵێ ئێستا رۆژیان نییە و بە بارودۆخی ناوچەیی و نێودەوڵەتی بەسراونەتەوە، ئەگەر نا گومان لەوەدا نییە تەوبەكارێكی ساختەن و دەچنەوە سەر كەسابەتی جارانی خۆیان لە پێناو ئاغاكانیاندا خوێنی میللەت و پێشمەرگەو حكومەتیش ئەرزشی قیمەتی چەند فیشەكێكی نییە بۆیە بە شمشێر لە گەردنیان دەدەن!.
ئەوە كێ بوو ئێستا خۆی كڕ كردووە و ئەوسا دەیگوت و دەینووسی هەر كەسێك بچێتە پەرلەمانەوە ئەوە كافر دەبێت؟! كێ بوو دەیگوت حكومەتی كوردی حكومەتی دووەمی ئیسرائیلەو بەشداری كردن تێیدا كوفرو هەڵگەڕانەوەیە لە ئیسلام؟! كێ بوو دەیگوت سەگی سپی و رەش هەر سەگەو نەجسولعەینەو كوفرە و تەنیا وتەنیا پێویستە ئێمە پێشمەرگەی ئیسلام بین؟! كێ بوون دەیانگوت ئیتیحادی عولەما ئیلحادی عومەلایەو چوونە نێو ئەو یەكێتییە عەمالەتە بۆ پارتی و یەكێتی و كاری بۆ ئەوان كوفرو هەڵگەڕانەوەیە لە ئیسلام؟! كێ بوون و كێ بوون؟! بەڵام هەر بۆ خۆیان كە چوونە نێو پەرلەمان و حكومەتەوە ئیدی 180 پلەوە بۆ 1800 پلە وەرگەڕانەوەو فەتواكانیشیان چووە زبڵدانی مێژووەوە؟ بەڵێ راستیان گوتووە (دروغگوو محافەزە نەدارەد!). بەڵام ئەدی قەبرو قیامەت؟ ئەدی موحاسەبەی خوێنی رژاوی گەنجانی ئەم میللەتە چۆن وەڵام دەدەنەوە؟.
ئەوەی پێویستە ئەمڕۆ دەزگا پەیوەندیدارەكان لەلایەك و خەڵكی دڵسۆزی كوردستان لەلایەكی دیكەوە بیگرنەبەر بۆ ئەوەی چی دیكە داعشی سەلەفی بە بەرهەم نەیەت بریتییە لە پەیڕەوكردنی ئەم خاڵانەی خوارەوە:
1- ڕێگەنەدرێت چی دیكە دەزگاكانی راگەیاندن بكرێنە مینبەری داعشخوازانی كوردستان، چ تاكەكانیان وەك بە ناو (بانگخواز). چ دەزگاكانیان یان باندەكانیان وەك تەوژم و ئایدۆلۆژیا، چ لە چوارچێوەی فەرمی بوون، چ لە دەرەوەی سیاسەت و دەسەڵاتی ئاشكرا .
2- لیژنەیەكی زانستیی شارەزا لە مێژووی ئێستای سیفەت و سەرچاوەكانی بیری توندڕەوی سەلەفی داعشی لە تێكڕای پارێزگاكانی كوردستان بە كەركوكیشەوە پێكبهێنرێت بە مەبەستی:
أـ سەرلەنوێ داڕشتنەوەی مەنهەجی خوێندنی ئیسلامیی لە تێكڕای قۆناغەكانی خوێندندا .
ب ـ هەر وتاربێژو بە ناو بانگخوازێك كە رابردوویەكی روونی نەبێت پێویستە بە فلتەری ئەو لێژنەدا تێبپەڕێت و تاقیكردنەوەی پێویستی (ئازمایشگایی) فیكری و مەزهەبی و عەقیدەیی و زانستی و نیشتمانپەروەری و رادەی دڵسۆزیی بۆ خاك و نیشتمان و ئەزموونی كوردستان بۆ ئەنجام بدرێت و دوو مامۆستای بە ئەزموونی ناسراوی رابردووپاكیش پشتگیری لێ بكەن بە دوور لە مەحسوبییەت و حیزبایەتی و تاد. بە هەمان شێوەش بۆ دامەزراندن و گواستنەوەی راژەو ..تاد.
ج ـ چاو خشاندنەوە بكرێت بە تێكڕای ئەو مۆڵەتانەی كە بە فەرمی وەرگیراون لە دەزگا فەرمییەكانی كوردستان سەبارەت بە كاری میدیاو رۆژنامەوانی و نەقابەو رێكخراوەیی بەمەبەستی پاكسازی و چاكسازی و دانانی میكانیزم و مەرجی شایستەو گونجاو لە تەك هەلومەرجی ئەمڕۆی كوردستاندا بە مەبەستی پارێزگاری كردن لە ئاسایشی نیشتمانی كوردستان. كە هێڵی سوورە، ئەمەش سنووردانانە بۆ بەرەڵڵایی راگەیاندن نەك ئازادیی بیرو ڕا، چونكە بێگومان بەرژەوەندی و ئیرادەی میللەتێك لە پێش بەرژەوەندیی تاك و گروپ و تەنانەت حیزبەكانیشەوەیە. ئەم حاڵەتەش لە تەواوی وڵاتانی شارستانییەتی ئەمڕۆدا كاری پێ دەكرێت.
د ـ سنوورێك بۆ دەزگاكانی بڵاوكردنەوەو لە چاپدانی كتێب دابنرێت، بەتایبەت ئەو دەزگایانەی كە ساڵانە لە پێشانگای نێودەوڵەتیی كتێب لە هەولێر بەشداری دەكەن.
3- گرنگە دەزگا پەیوەندیدارەكان، چاوكراوەتر بن بە تایبەتی بەرامبەر ئەو سەدان هەزار بەناو ئاوارەی كە ئەمڕۆ بە هەر مەبەستێك كوردستانیان كردووەتە ئامانج و بوونەتە هۆی بارگرانیی ئابووری و زۆربوونی تاوان و كاری نابەجێ و بڵاوبوونەوەی بیری توندڕەویش، شوبهەی دروستیان لە هەر كەسێك هەبوو لێپرسینەوەی یاساییان لەگەڵدا بكەن و بەشیوازێكی دادپەروەرانە مامەڵەیان لە تەكدا بكەن و پاش لێكۆڵینەوە بیاندەنە دەست دادگاكان بەمەبەستی یەكلاییكردنەوەی فایلەكانیان، پاش بەربوونیشیان لەژێر چاودێریی یاساییدا بەپێی پێویست بهێڵدرێنەوە. چونكە زۆرێك لەو گیراوانە بەتایبەتی لە كەركوك و ناوچە دابڕێنراوەكانی كوردستان پاش بەربوونیان بەرەو داعش هەڵاتوون .
4- گرنگە سنوورێك بۆ ئەو دەیان تەن كتێب و نامیلكەو بڵاكراوانەی كە لە ڕێگەی فڕۆكەخانەكانەوە بە ئاشكرا بەناوی عەمرەو عەمرەكارانەوە دەهێندرێنە كوردستان دیاری بكرێت، لە وڵاتانی كەنداوەوە و بەتایبەتیش لە وڵاتی (سعودیە)، كە بیری توندڕەویی سەلەفی تەكفیری تەبدیعی تەشریكی بڵاودەكاتەوە، چونكە زۆرێك لەو كتێبانە سەلەفی و داعشی نووسیویەتی و بیری تیرۆر وتوندڕەوی بەرهەمدەهێنن .
5- پێویستە گرنگیی زیاتر بە لیژنەی باڵای فەتوای كوردستان بدرێت، بە مەبەستی گێڕانی ڕۆڵی شایستە بە خۆیان لەم هەلومەرجەدا و بڵاوكردنەوەی فەتوای پێویست بە دژی فەتوا بێ بنەماكانی داعشە سەلەفییەكان. چونكە بە راستی پێویستە بیرو هزری چەوت بە بیرو هزری راست و دروست بەرپەرچ بدرێتەوە، ئەوەش تەنها لیژنەی باڵای فەتوای كوردستان بە پاڵپشت بە دڵسۆزانی دیكە توانای راپەڕاندنی ئەو ئەركەیان هەیە ئەگەر هەلیان بۆ بڕەخسێنرێت و لەلایەن بەرپرسانەوە گوێیان وەك پێویست بۆ ڕابگیرێت، چونكە جێگەی داخە وەك هەستی پێدەكرێت ـ بە زانین یان نەزانین ـ بەربەست و ئاستەنگی ماددی و مەعنەوی لە رێگەی تواناكانی ئەو لێژنەیەدا دانراوە!.
6- دیاری كردنی مەرج و سنووری یاسایی بۆ ئەو لێشاوە خوێندكارەی كە بە چاك و خراپ، بە یاسایی و نایاسایی،بە پاكی و ناپاكی، لە دەرەوەی هەرێمی كوردستان خوێندنی باڵا تەواو دەكەن و دام و دەزگا ئایینییەكان دەكەنە ئامانج، بەشێكیان لە دەرەوە مێشكشۆریان بۆ ئەنجام دەدرێت كە دێنەوە دەبنە باندی توندڕەوی و بیری داعش و سەلەفییەت بە بەرهەم دەهێنن. بەشێكی دیكەیشیان مرۆڤی باشن، بەڵام بە تەواوەتی بنەما زانستییە یاسایەكانی خوێندنی باڵایان تێدا نەهاتووەتە جێ، هەردوو بەشەكەش بە هۆی كاریگەرییە نا یاساییەكان و گەندەڵی ئیداری نێو خودی هەندێك لە وەزارەتەكان پۆستی جۆراوجۆر وەردەگرن. هەندێكیش كەمیشیان مرۆڤی شایستەو بە توانان سوودمەندن بۆ ئاییندەی میللەتەكەمان، بۆیە گرنگە ئەم سێ جۆر قوتابییە لە یەكتر جودا بكرێنەوە و پۆلێن بكرێن.
7- گرنگە چی دیكە حكومەتی هەرێم بە واتا گشتییەكەی بۆ دەستەواژەو دروشمی بێ بنەمای سەلەفییەكان ملكەچ نەبێت كە تێیدا وەها بانگەشە دەكەن گوایە ئەوان لە سیاسەت دوورن و حوكمڕانییان مەبەست نییە! بێگومان ئەمەش پێچەوانەكەی بە تەواوەتی راستە، چونكە ئەزموونی سەلەفییەكانی پێنج وڵاتی رۆژهەڵاتی ناوەڕاست (واتە: میسر و یەمەن و سوریا و عێراق و جەزائیر) ئەو راستییەی سەلماندووە كە هەركات سەلەفیەكان هەلومەرجی حوكمڕانییان بۆ هەڵكەوت دەمەودەست لە دروشمەكانیان پاشگەز دەبنەوە و حزبی سیاسیی توندڕەو رادەگەیەنن و خۆیان بۆ پەرلەمان كاندید دەكەن و دروشمی خەیاڵپڵاوی (خیلافەت و حاكمییەت و ..تاد) بەرز دەكەنەوە و كۆمەڵگا بە تێكڕا كافرو بێ باوەڕ دەكەن، فەتوای هەڵگەڕاوە لە ئیسلام بۆ (راعیی و رەعییە) دەردەكەن، ئەوكاتیش حكومەت و دەسەڵات كاڵەك بە ئەژنۆ دەشكێنێت و ساویلكەیی خۆی و پاشقوولی سەلەفییەكانی بۆ روون دەبێتەوە، بەڵام وەك گوتراوە (ولات حین مندم). راستیان گوتووە عاقڵ ئەو كەسەیە كە لە چواردەور ئامۆژگاری وەردەگرێت و دووجاریش لە یەك كوندا ناگەزرێت. ئایا (ئەنسارولسوننەو جوندولئیسلام و هێزی لێدەرو هێزی ئیبن تەیمیە و هێزی سەید قوتب و ..تاد ئەو گروپە تووندڕەوانەی پێشوو كە هەورامانی سەركەشیان كردبوویە ئامانج و بێحورمەتیی گەورەیان نوواند بەرامبەر بە ئارامگای پیرۆزی زاناو شێخانی نەقشبەندی لە بیارەو باخەكۆن و ناوچەكانی تری دەڤەرەكە ئایا تێكڕایان گروپی سەلەفی نەبوون؟! ئایا بە فەتوای ئیبن تەیمیە و ئیبن عەبدلوەهاب و ..تاد ئەو كارە قێزەوەنانەیان ئەنجام نەدا؟ ئایا تەواوی ئیسلامییە سەلەفییەكانی كوردستان و دەرەوەی كوردستان بەو تاوانانە خۆشحاڵ نەبوون؟ ئایا بیستمان تا ئەمڕۆش سەلەفییەك یان ئیسلامییەكی توندڕەو بێتە گفت و ئیدانەی راستەوخۆی عەقیدەی ئەو گروپانە یان كردارەكانیان بكات، لە ساڵیادی ئەو بێحورمەتیانەیاندا یان هەر بۆنەیەكی دیكە؟ بۆیە دووپاتی دەكەینەوە كە ئەوانەو زۆری دیكەیش هەموو بەڵگەن لە سەر ئەوەی كە سیاسەتنەكردنی ئاشكرای ئێستای هەندێك لە سەلەفییەكان تەنیا تاكتیكە نەك ستراتیژ،ئەم راستییانەش لای دانشمەندان و رۆشنبیران و زانایان ئاشنان، پێویستیشە لای بەرپرسانی دڵسۆزی خاك و میللەت و نیشتمانیش ئاشكرابن..
8- گرنگە دەزگاكانی حكومەتی هەرێم چاوتیژتر بنواڕنە ئێستاو رابردوو و داهاتووی كوردستان، بە دروشمی بێ بنەما هەڵنەخەڵەتێن، چاو بە پەیوەندییەكانیان لە ناوەوەو دەرەوەی هەرێمدا بخشێننەوە، (ناكرێت و ناگونجێت و سەریش ناگرێت و قەبوڵیش ناكرێت كوردستان بكرێتە عەرەبستانی سعودییە)، خەڵكی ئەمڕۆ كاغەزی سپی دەخوێنێتەوە، بێگومان هەر یەكێك بیەوێت ئەو ئەزموونە بگوازێتەوە ئەوە ئینتیحاری بە ئێستاو داهاتووی خۆی كردووە. پێویستە بە تەواوەتی میدیا و سایت و پێگە و سنوورەكان كۆنترۆڵ بكرێن و سنوورێك بۆ هەوڵی نەزۆكی بە سەلەفیكردنی میللەتی كورد لە لایەن وڵاتانی كەنداو و گوێلەمشتەكانیان لە كوردستان دابنرێن.
10- پێویستە میللەتی كورد بە گشتی و بەرپرسانیش بەتایبەتی بزانن ئەوە چ بیرو هزر و تەوژمێكی میانڕەو بوو كە لە رابردوودا هەموو پێكهاتەكانی میللەتی كوردی لە سەر یەك سفرەو خوان كۆكردبوویەوە؟ چ رێبازێكی فریشتە دەرون بوو كە سەدان گەورە پیاو لە زاناو دانا و ئەدیب و شاعیری بە بەرهەم هێنا لە نموونەی مەولانا خالیدی نەقشبەندی و مەلای جزیری و ئەحمەدی خانی و شێخی سیراجەددین و مەولەوی و كوردی و مەحوی و نالی و وەفایی و مەلا سەعیدی نوورسی و مەلاعەبدولكەریمی بیارە و مەلا باقری باڵەك و هەزارانی تریش؟ كە بە هۆی بیری میانڕەویی پڕ لە هەست و شعوری مەردایەتی و كوردایەتی و عەشقی ئیلاهی ئەوانەوە میللەتی كورد تا رۆژی قیامەت سەربەرز و رووسوورە لە هەردوو دنیاداو لە بەردەم تەواوی میللەتانی دنیادا. بەڵێ تا بیری پڕ لە حیكمەتی ئەوان گرنگی پێدەدرا نەبیسترا رۆژێك لە رۆژان هیچ نەتەوەو ئایدیاو ئایینزایەك لە كوردستاندا هەست بە پەراوێزخستن بكات یان خوانەخواستە بەجێی بهێڵێت. ئایا ئەو قوتابخانانەی ئەو كەڵە پیاوانەی بە بەرهەم هێنا چ جۆرە قوتابخانەیەك بوو؟ كە جێگەی رێزو حورمەتی تێكڕای میللەتی كورد بوون بە درێژایی 1400 ساڵ لە مێژووی كوردستان، كە بە هۆی رەوشتی بەرز و گوفتاری جوان و شیرینیان هەموو میللەت پێكەوە دەژیاو بیری توندڕەوی سەلەفی تێدا نەبوو؟ ئایا ئەو كەڵە مەردانەی كە تێكڕای شۆڕشەكانی میلەتی كوردیان هەڵگیرساند لە هەر چوار پارچە داگیركراوەكەی كوردستاندا لە چ قوتابخانەیەكی پەروەردەیی سلووكی دەرچوون؟ بەڵی تێكڕای ئەو سەركردە ئایینی و رۆشنبیری و شۆڕشگێڕانە تەنیا و تەنیا لە مەدرەسەی عیلم و عیرفانی تەصەووف تێگەشتن و پێگەشتن و بوونە چرای پرتەوبەخش، بۆ خۆیان سووتان لە پێناو روناكیی رێگای ئاییندەی میللەتەكەیان بە بێ بەرامبەر، وەك سەربازی وون تێكۆشان و نەسرەوتن، گیانی برایەتی و خۆشەویستی و لێبووردەیی و گفتوگۆیان بە نێو خەڵكدا بڵاوكردەوە، دڵی خەڵكیان ئاواشتەكردەوە بە رەوشتی جوان و كردەوەی موسڵمانێكی بە سوودی پڕ ئەوین، نەك ئیسلامییەكی توندڕەوی دڵپڕ لە قین..
با بەس بێت خۆدزینەوە لە مێژوو . بەس بێت خۆ هەڵەكردن لە واقیع . بەس بێت هەڵخەڵەتان بە دروشمی بریقەدار. بەس بێت خوێندنەوەی نادروست بۆ میژوو وئێستاو داهاتوو. دەست لە دەست و هێزیش لە خودا بەرەو ئاییندەیەكی گەشتر. بەرەو دنیای ئەوینداری و لە یەكتر بووردن، بەرەو هەڵكردنی پەرچەمی دەوڵەتی كوردستان لە سنووری چیا تا ئێستا داگیركراوەكانی حەمرین، دەوڵەتێك تێیدا رۆحی زانا و داناو سەركردەو شاعیر و ئەدەبدۆستانی میللەتەكەمان ئاسوودەبێت، (دەرچووان) و توندڕەوان و تیرۆریستان و رەشبینان و دووڕووەكانیش ریسواترو نامۆتر ببن، و بیری قێزەوەنیان بچێتە زبڵخانەی مێژووی مرۆڤایەتییەوە. خوای گەورە یارمەتیدەری دڵسۆزانە.

پڕۆفیسۆری یاریدەدەر لە زانكۆی سەلاحەددین/ هەولێر