ل ئەنجامێ شەرێ ئێكێ یێ جیهانێ روژهەلاتا ناڤەراست وەكو گەلەك جهێن دی كەتە دناڤ گوهارتنێن مەزن دا و جیوپولیتیكا دەڤەرێ هاتە گوهارتن و كومەكا دەولەتێن تازە هاتنە دامەزراندن، ژبەركو كورد ئامادە نەبوون ژ رویێ سیاسی و زاتی ڤە دناف ڤان گوهارتنان دا و ل ئەنجامێ پەیمانا لوزان پارچە بون دناف چوار دەولەتێن داگیركەردا (توركیا ئیران و عیراق و سوریا)، گەلێ كورد بڤێ داگیركرنێ رازی نەبون و دەست ب سەرهلدان و شورەشێن كوردی كرن ل هەمی پارچێن كوردستانێ و دەولەتێن داگیركەر ژی بەردەوام دناف دان و ستاندنێ دابوون بو قركرن و داگیركرنا كوردستانێ... ڤان دەولەتا دوو سیاسەت پەیرەو كرن یان دوو بنگەهێن سیاسەتێ دامەزراندن پێكڤە بو داگیركرنا كوردستانێ و قركرن و حەلاندنا نەتەوا كورد. بڤی رەنگی:
1. سیاسەتا ئینكاركرنا گەلێ كورد.. ئانكو نەنیاسینا گەلێ كورد كو گەلەك نینە ب ناڤێ كورد دناف ڤان دەولەتان دا نەخاسمە ل قوناغێن قركرن و ژناڤبرنا سەرهلدان و شورەشێن كوردستانی.. وەكو كورد ل توركیا (توركێن چیانە) ل سوریێ دبێ ناسنامەنە و پارچێن دی ژی دەمێ دشیان كورد ئینكار دكرن.
2. سیاسەتا دوویێ ئینكار كرن و داگیركرنا خاكا كوردستانی (جوگرافیا كوردستانێ)یە، ئانكو خاكێ كوردستانێ ل توركیا و ئیران و عێراق و سوریا خاكێ ڤان دەولەتانە كورد دبێ خاكن ل ڤان دەولەتان وەكو گەلەكێ دەربەدەر هاتینە ڤان وەلاتان... ئەڤ دەولەتە خو حساب ناكەن ژ رویێ جوگرافی ڤە وەكو دەولەتێن (مركب) ئانكو ژ دوو جوگرافیا پێك تێن، جوگرافیا كوردستانێ كو گرێدای كوردستانا مەزنە و جوگرافیا وان وەلاتان كو گرێدایی نەتەوێن وانە.
ڤان دەولەتان ل سەر ڤان هەردوو سیاسەتان گەلێ كورد و خاكێ كوردستانێ ئینكار كرینە. ل گور باوەریا من پشتی (100) سەد سالێن داگیركرن و زولم و زورداریێ، و ئەڤ دەولەتە نەشیایین گەلێ كوردستانێ و خاكا كوردستانێ ژناف ببەن بریار داینە سیاسەتا خو بگوهرن بڤی رەنگی:
1. سیاسەتا ئینكاركرنا گەلێ كورد دەست لێ بەردن و گەلێ كورد بنیاسن كو هاولاتیێن ڤان دەولەتانە. كەلتور و زمانی و دیروكا خو هەیە و جیهان گێری ب راگەهاندن و تەكنولوژیا و ئالیەتێن گەهاندنێ و لوبیا كوردی و بەربەلاف بوونا گەلێ كورد ل جیهانێ رێكێ نادەن ئەڤ دەولەتە بەردەوامیێ ب نەنیاسینا گەلێ كورد بكەن و نەشیان كوردا دناف خودا حەلینن. نوكە ڤان دەولەتا بریارا ناسینا كوردا دایە كو كورد هەنە و گەلەكێ جودانە ل وەلاتێن وان و دانپێدانێ ب هەبوونا كوردا بكەن و دڤێن مافێ گەلێ كورد ل سەر ڤی بنگەهی بدەنێ. مافێ ناسبونی و هەبوونا گەلێ كورد ل وەلاتەكی مافێ مروڤی و ئازادی و هاوولاتی بوون و كەلتوریی یە. لدیف پرەنسیپێت دیموكراسیێ هەر هاوولاتیەكێ مافێ بەشداریێ هەیە د دەستهەلاتێ دا. گەلێ كورد ژی هاوولاتیێن ڤان وەلاتانە و مافێ بەشداریێ هەیە د دەست هەلاتێ دا. ئانكو مافێ گەلێ كورد بتنێ ئەوە بەشدار و شریكێ حوكمرانیا ڤان دەولەتا بن.
دەولەتێن داگیركەر بڤێ سیاسەتا خوو یا تازە دڤێن بێژن كوردا كێشا نەتەویی كێشا هاوولاتی بوون و كێشا حوكمرانی یە. ئەم دێ رێكێ ڤەكەین هون هاوولاتی بن و بەشدار بن د حوكمرانیێ دا.
2. ژلایێ دی ڤە ڤان دەولەتان بریار دایە سیاسەتا خو یا دوویێ كو ئینكار كرن و داگیركرنا خاكێ كوردستانێ یە، و بەردەوامیێ پێ بدەن و بێژن كورد دبێ خاكن، خاك یێ ڤان دەولەتانە.د رویێ سیاسی دا نەتەوەكا بێ خاك و مافێ نەتەویێ نینە ل وی دەمی دێ بتنێ مافێ هاوولاتی بوون و حوكمرانی یێ هەبیت. گەلەكێ خاك هەبیت مافێ نەتەویێ هەیە،ئانكو مافێ نەتەوەیی تو خودان خاك بی وب رەزامەندیا خو دەستهەلاتا خو ئاڤا بكەی ودەستهەلاتا خو ب دامەزرینیت ئەڤە مافێ نەتەوەیی یە.
ئانكو بكورتی ڤان دەولەتا د سیاسەتا خو یا نوی دا بریار داینە گەلێ كورد بناسن بەلێ خاكا كوردستانێ ناس ناكەن و بەردەوامی یێ ب داگیركرنا كوردستانێ بدەن.
- ژبەر ڤێ سیاسەتا تازە یا داگیركەرا ڤیا گەلێ كورد هشیاربیت پێشەنگیا سیاسیا كوردستانێ ڤێ سیاسەتێ رسوا بكەت وگەلێ كورد هشیار بكەت، چونكە ئەڤ سیاسەتە دووبارە خاپاندن و بەردەوام بوونا داگیركرنا كوردستانی یە كورد بێ خاك (ملكیەت) نەتەوە نابن و مافێ نەتەویی نابیت.ب تنێ دێ مافێ هاوولاتی بوون وبەشداربوونێ هەبیت.
جیهان و (الامم المتحدە) ژی دەمێ گەلەك خودان خاك بیت مافێ نەتەویی هەیە و خو دكەنە لایەك بو چارەسەریا ڤێ كێشێ.. بەلێ هەكە كورد گەلەكێ بێ خاك بیت، كێشاوان كێشا نافخویا وان وەلاتانە و جیهان خوو ناكەتە لایەك د چارەسەریێ دا.
- دەولەتێن داگیركەر زور ب زانینبون ئەڤ سیاسەتە هاڤێتیە دناڤ گەلێ كوردا و ب تایبەتی دناف رێكخستن و حزبێن كوردی دا، ب زانینبون یان نەزانینبون بەشەكێ مەزن ژ رێكخستن و حزبێن كوردستانی رازینە ب ڤێ سیاسەتا داگیركەران. و كێشا نەتەویی دكەنە كێشا حوكمرانیێ. ژبەر هندێ سیاسەتا وان ژی ئەوە ببنە شریكێن حوكمرانیا ڤان دەولەتان ود ئارمانج و داخازێن وان دا دیارە وەكو فدرالیا پارێزگەهان و كانتونات و خوسەریا دیموكراسی وئەڤە مافێ حوكمرانیێ یە. نەمافێ نەتەویی یە و ئەڤ حزبێن ڤێ سیاسەتێ د هەلگرن ئارمانجا وان نەتەویا حزبی یە..ئانكو حزب ببتە خودان دەستهەلات نە گەلێ كوردستانێ و دەولەتێن داگیركەرژی لسەر بنگەهێ سیاسی بو چارەسەریا كێشا نەتەویا گەلێ كوردستانێ دگەل ڤان حزبا نێزیكن و چو جوداهیا سیاسی نینە بو چارەسەریا كێشێ. بتنێ جوداهی هەیە كا چەند پتر بەشداریێ بكەن د حوكمڕانیێ دا. ئانكو رویێ سیاسی لێك نێزیكن بتنێ د چەوانیا بەشداریكرن د حوكمرانیێ دا جوداهی هەیە. براتیكا ڤان سالێن بوری عێراق و سوریا و توركیا و ئیران راستیا ڤان حزبا باش زەلال دكەن.
- ڤیا ئەڤ دەولەتە كوردا وەكو نەتەوە ببینن و دانپێدانێ بكەن كو كورد خودان خاك و ملكیەتن دیار بكەن وان دڤان (100) سەد ساڵان دا خاكێ كوردستانێ داگیركریە،دڤێت دەست ژڤێ داگیركرنێ بەردەن. پاشی لگەل كوردا پێكڤە دشێن د وەلاتەكی دا بژین یان جودا ببن سەر بنگەهێ رەزامەندیێ (أتحاد اختیاری) و هەركەسێ مافێ ڤەقەتاندنێ هەیە (جودابوون) برێكێن ئاشتیێ دەمێ نەشێن پێكڤە بژین.
-نە جێ بەجێ كرنا مادێ (140) و لێدانا پروژێ نەتەویی ریفراندوم و راوەستان دژیسیاسەتا دەولەتا سەربەخویا كوردستانی. مایتێكرنا بەردەوام یا دەولەتێن داگیركەر د هەرێمێ دا و دانا روناهیا كەسك بو (داعش) كو بێتە كوردستانێ و نەخاسمە ژ مەخمور هەتا شنگالێ. هەمی بو لێدانا پروژێ نەتەویی یە و سیاسەتا نەتەویی یا حەكیمانەیا سەروك بارزانی و رێبازا نەتەوەیی یا پارتی دیموكراتی كوردستانە.
-نوكە ژی دەنگێ دروست كرنا كانتونا ل شنگالێ و سلێمانیێ و دەنگێ یەك گرتنا عێراق و عێراقەكا یەكگرتی پیروزە ورێك گرتن ل ئێك گرتنا پێشمەرگەهێ هەمی سیاسەتا داگیركەرێن كوردستانی یە. چونكە دزانن ئەڤ قوناغە بو كوردا زور گرنگە و كورد حازریا پروژێ نەتەویی دكەنو روژهەلاتا ناڤەراست دناڤ گوهارتنێن مەزن دانە و دیزاینا روژهەلاتا ناڤەراست تازە دهێتە دانان و كورد د حازربن دێ شێن ل روژهەلاتا ناڤەراست جهێ خوكەن. بتنێ ب ڤێ سیاسەتێ دێ شێن رێكێ ل پروژێ نەتەویی گرن. ڤیا گەلێ كورد و هەمی رێكخستن و حزبێن كوردی خو نێزیكی پروژێ نەتەویی بكەن و دەست ژ سیاسەتا حوكمرانی و دەولەتێن داگیركەر بەردەن و رێكخستن و حزبێن كوردی ڤیا پروژێ نەتەوەیی بكەنە ئارمانج ونابیت ڤێ دەلیڤێ ژ دەستێ گەلێ كوردستانێ دەربكەن بو بەرژەوەندیا دەستهەلاتا خویا حزبی. ئەڤە یاریا داگیركەرێن كوردستانێ یە وئارمانج لێدانا ئیرادا كوردستانێ وپایتەختێ وێ هەولێرە.