لەگەڵ برادەراندا، رۆژانە سەردانی لقی چوارمان دەكرد، كە ئەو دەمە بارەگاكەی لە گوندی(هەرگێنە)ی پێنجوین بوو، هەتا ئاگاداری بارودۆخەكە بین، برووسكەیان بۆ سەرەوە كرد، هەتا رێوشوێن ئەركمان بۆ دیاری بكەن، زۆربەی كاتیشمان لە گوێ چەم و ناو دارستانەكان، بەسەر دەبرد، رۆژانەش سێ چوار ژەم فڕۆكەكانی بەغدا بۆردمانی ناوچەكەیان دەكرد، بەڵام چونكە ناوچەكە سنووری بوو لە ترسی تەیارەشكێنەكانی ئێران، خێرا تێیان دەتەقان و هەڵدەهاتن.
هێشتاوەكو گرووپەكەمان دەستبەكار نەبوو بوو، رۆژانە لە گوێ ئاوی سەر سنوورەكەی نێوان( بایەوە) و(بناوە سووتە) كاتمان بەسەر ئەبرد، بەتایبەتی لەگەڵ نیشتمانپەروەری خوالێخوشبوو كاكە(نووری ئەحمەد تەها)، حەزم دەكرد بدوێ و گوێبیستی بیرەوەرییەكانی ببم، لە هەنگاوی دروستبوونی پارتییەوە بە ڕابەرایەتی بارزانی نەمرو رۆژانی كۆماری مەهاباد، زۆرجار بە تەوسەو تەنزەوە ئەدواو جارو بارەش دیژلەمەیەكمان ئەخواردەوە،هەندێ رۆژیش هەر لەسەر لبادەكەی كاك نووری، هونەرمەندی مەزن (رەشۆل) ئەبووە میوانمان، ئیتر لەسەربووردەكانی شۆڕشەكانی شێخی نەمرەوە، باس ئەكراو هەندێ جاریش یادی مەزنە هونەرمەندانی جاران وەكە(سەید عەلی ئەسغەری كوردستانی)و (ئەحەی ناسڕ) ئەكرا.
گێڕایەوە: ئەو دەمە هێشتا مێردمنداڵ بووم، كابرایەكی زێڕینگەری جوولەكە میوانداری(ئەحەی ناسڕ)ی كردبوو، منیشی بانگهێشت كرد، دەمەو ئێوارە بەرەو گەڕەكی جوولەكان بووینەوە، خوان بە خۆشترین خواردن رازابوویەوە، بەر لە تێچریكاندنی گۆرانیبێژ فەخفوری و بلوورەكانی سەر رەفە گەچینە دیوار نەزرەكانیان داگرت، ئیدی بڕوام بەوە كرد ئەو جۆرە گۆرانیبێژانە، وەك ئەحەی ناسڕو (سەید عەلی ئەسغەر) لە هەستان و پەردە پەردە هەڵكشانی دەنگیاندا بلوور و فەخفوری سەر رەفان وردو خاش بوون و بلووری پەنجەرەی داخراویش هاڕەی كردووە و بەربوونەتەوە.
هەر لەسەر بیرەوەرییەكانی وتی:( ئەحەی ناسڕ) خۆی بە قوتابی(شیێخ نووری شێخ ساڵح)ی شاعیر دادەنا، حەزی ئەكرد كاتێ(شێخ نووری) گورانی بووتایە، ئەو گوێگری بووایە، بۆ ئەوەی پتر شارەزای مەقامەكان بوایە.
وا رێكەوت لەگەڵ(شێخ نووری) سەردانێكی(تاران) بكەین ئەو دەمە باو باوی(دلكەش)بوو، ئەو شەوە مقامی دەشتی وت، منیش دەنگم لێ هەڵبڕی(دلكەش) هاتە خوارەوە و دەستی گرتم بۆ سەر شانۆكەو منیش چی هونەرم هەبوو لەو شەوەدا نواندم.
سەبارەت بە توانای دەنگی(ڕەشول) لە كاك(ئەمین مەولود)ی خوالێخۆشبووم بیستبوو:خۆم گوێم لە مامۆستا(عەلی مەردان)ی مەزنە مقامبێژ بووە، كە ئەیووت:((ئاخ ئەگەر دەنگی رەشول م هەبوایە خوا شایەت موجیزەم ئەنواند)).
دیارە ئەو ساڵانەی خوالێخوشبوو(ئەمین مەولود) لە كولێجی بازرگانی سەر بە زانكۆی بەغداد ئەیخوێند، لە رادیۆی كوردی بەغداد كاری ئەكرد، بەرنامەی(شیعروهەڵبەست)ی پێشكەش ئەكرد، كە لەسەرەتاكانی پەنجاكاندا بوو، هەر بەو بۆنەیەوە، شیعری(ست فاتیمە)ی مامۆستا (ئەحمەد هەردی) لە دوتۆی یەكێ لە بەرنامەكانیان خوێندبووەو، كە بە دەستی لە مامۆستا(هەردی) وەرگرتبوو، كە مامۆستا لەسەر كوردایەتی لەسەر كارەكەی دەركرابوو، گێڕایەوە: هەر كە شیعری(ست فاتیمە)م خوێندەوە، مامۆستا(عەلی مەردان) بەر دەرگای ستۆدیۆكەی لێ گرتبووم و داوای شیعرەكەی لێكردم و دانیشت بە دەسخەتی خۆی نووسیەوەو هێندەی پێ نەچوو ئەو گۆرانیی یە هەمیشە زیندووەی لێ دەرچوو، لێرەداو هەر بەم بۆنەیەی مەردان و هەردییەوە كە دەستەملانێی دوو مەزنە كوردە، كۆپلەیەكی شیعری چەپكە گوڵێك بۆ(ست فاتمە) بەسەر ئەكەمەوە:
(فاتیمە، دوو چاوی مەستت پڕ تەلیسمی جوانییە.
پڕ شەڕابی خۆشەویستی و ئارەقی یەزدانییە
بەژن و باڵاكەت نموونەی هەیكەلی یۆنانییە
لار و لەنجەت مۆسیقایە، بەستەیە، گۆرانییە
بووكی رازاوەی خەیاڵم گیانەكەم ست فاتیمە
تاقە پرشنگێكی چاوت ئەو پەڕی ئاواتمە.)
لە گەرمەی گێڕانەوەكانی سەر بووردەكانی رۆژانی رابوردوو دابوون، باس هاتە سەر باسی بایەخدان بە مێژووی كورد و سەر لە نوێ نووسینەوەی، لە پڕدا جاحێلێكی لادیێ سڵاوی كرد و رووی كردە كاك(نوری)و گوتی:مامۆستا كەپرێك لەو ژوورەوە گڕی گرتووە، ئەیان وت كەپری كاك(نوری)یە.
: كوژێنرایەوە؟
:پاش چی، پاش ئەوەی دامركایەوە، لە جانتایەكدا هەندێ شڕو پرە و كاغەز و ماغەزی تیابوو، كە هەڵیان ڕشت نیوە سووتابوو بوو.
: ئەوە گشت سەروەت و سەرمایەكەی تەمەن بوو، چەند بەڵگەو وێنەو یاداشتەكانم- ئەوەش نەما، دیارە پۆساپۆرتەكەشم سووتاوە...
كەمێك دڵیمان دایەوەو هەستایین لەگەڵ چەند كوڕو كاڵێكدا رووە و كەپرە سووتاوەكە چووین.
كاك نوری بە شپرزەییەوە دەستی بۆ شتە نیوە سووتاوەكان بردوو تاك و تەرای كە كەمێك ئەناسرانەوە گلی دانەوەو ئەوانی دیكەی توڕدایە ناو ئەو ئاگرەی هێشتا دوكەڵی لێ هەڵئەسا- ئێمەش مات و مەلوول و بێدەنگ، بەوپەڕی هێمنییەوە سەیری یەكمان كردو بە دەنگێكی بریندارەوە فەرمووی:ئەوە ئەوانەش نەمان.
گەڕاینەوە شوێنەكەی خۆمان و كاك نووری هەر ئەمدیوو ئەودیوی بە وێنە سووتاوەكاندا ئەكرد، هەندێكیانم لە دەست وەرگرت و لێیان ورد ئەبوومەوە بە ئومێدی ئەوەی داخۆ چارەسەر ئەكرێن، یان نا؟
رووبەری ئەو وێنانە گرنگییەكی گەورەی مێژووییان هەبوو، بەتایبەت ئەوانەی پەیوەستی مێژووی خەباتیی بوون، كە زۆربەیان لەگەڵ (بارزانی نەمر) دابوو، لە رۆژانی كۆماری مەهابادو پاشان لە پاش گەڕانەوەی بارزانی نەمر و هەڤاڵانی لە وڵاتی(سۆڤیەت) لە چەند وێنەیەكیشدا لەگەڵ پێشەوا(قازی محەمەد)ی نەمر.
: كاكە نووری ئەمانە بپارێزە، بواری نوێكردنەوەو چاككردنەوەیان هەیە، گوناهە لە ناوبچن، ئەم وێنانە چەندین ساتی رابوردوی راگرتووە و پاراستوونی و جارێكی دیكە دروست نابنەوە.
كەمێك باری دەروونی هاتەوە وێنی خۆی و ئیدی كاك (رەشۆل) باسی كرد: سبەینێ بۆ نەشتەرگەری ئەچمە(سەردەشت)و پێوەندیم بە دكتۆرەكانی خۆمانەوە كردووەو ئەمە دنیایە، كێ ئەزانی ئەتانبینمەوە!
برادەرە چایچییەكەم بانگ كرد: بۆ سبەی نیوەڕۆ خواردنێكی باشمان بۆ ئامادە بكە، باشە برادەر ئەم هەموو گەڵامێوە ناسكە لێرە هەیە، بۆ رۆژانە مەنجەڵێ یاپراخی لێ دروست ناكەیت؟
خۆ هیچی وای تێناچێ.
سەری رەزامەندی بۆ لەقاندم.
دیارە چوونەكەی كاك(رەشۆل) كەوتبووە پاش نیوەڕۆ، وادەی نانخواردنمان هات و هات بەلامانەوە: بە قسەم كردی یاپراخێكی پەلكە مێوم بۆ لێناون لە ماڵیشا لێنانرێ، ئەوە لەگەڵ گۆشتی برژاودا ئەیهێنمە خزمەتان، هەر ئەوەندەی بڵێی یەك و دوو نایە بەردەممان وفەرمووم لێ كردن. زۆر تامەزرۆی بووم یاپراخێكیخرپنم نایە سەر قاپەكەی بەردەمم.. كەوچكم لێدا، بێ سوودبوو، بەدەست تێی بەربووم، نەخێرگەڵایەك، دووان ، سێیان ، چوار... بەحاڵ چەند دەنكە برنجێ لە ناویا خۆی گورگە كردبوو، ئەوە ئەوانیش سەیرم ئەكەن، هاورام لێ هەستا: ئەرێ برا لە من داوای یاپراخم لێ كردی، یان كەپرو ساباتم بۆ دروست بكەیت؟