مافی بڕیاردانی چارەنووس لە ڕوانگەی ئیسلامەوە
عه‌بدولره‌حمان سدیق
وەك پێشتریش نووسیومە ئەمڕۆ لەم هەلومەرجە نێودەوڵەتییەی كە ناوچەكەی گرتۆتەوە، پێویستە وەك سەرەتایەك رێكخراوە تایبەتمەندەكانی پەیوەست بە مەسەلە سیاسیی و نەتەوایەتییەكانەوە لەئێستاوە كەمپینێكی سیاسیی سەرتاسەریی رێك بخەن بەنێوی (كەمپینی 2016) وە، كە چالاكیی جۆراوجۆری تێدا ئەنجام بدرێت لەئێستاوە هەتا ساڵی (2016)، بەمەبەستی بیرخستنەوەی بەریتانیاو فەرەنسا بەو هەڵەو تاوانەی كە پێش سەدەیەك دەرهەق بەئێمەیان كردووە، كوردیان لە دەوڵەتی سەربەخۆ بێ بەشكردو، بەم هۆیەشەوە تووشی ئەم هەموو كارەساتە بوو لەگشت پارچەكانی كوردستاندا.
لەم نێوانەشدا وا چاكە ئەم جارەیان زانایانی ئاینیی كوردستان بێنە ئەم مەیدانەوەو قسەو فەتوای خۆیان هەبێت لەبارەی مافی سەربەخۆیی كوردستانەوە، بەتایبەت پاش ئەوەی چەندین كەسایەتیی ئاینیی شۆڤێنی و رێكخراوی بەناو ئیسلامیی توندڕەو فەتوای حەرامكردنی مافی كوردیان راگەیاندووە.
بۆیە من بەش بەحاڵی خۆم مایەی بەختەوەریم بوو لەرۆژی (5/3/2014)دا، لەگەڵ ژمارەیەك لەمامۆستایانی ئایینیی و نووسەرو توێژەران ئامادەی كۆنفرانسی مافی چارەی خۆنووسین بووین لە ڕووانگەی ئاینی ئیسلامەوە.
بۆ ئەو مەبەستەش لەسەر داوای لیژنەی سەرپەرشتیاری كۆنفرانس لە ستاندارد بۆ بەدەوڵەتبوونی كوردستان، داوام لێكرا كە ڕەشنووسێك بۆ دەسپێكی كۆنفرانسەكە ئامادە بكەم، منیش ئەمەم بۆ نووسین وەك دەستپێك:
بەناوی خوای بەخشندەی میهرەبان
سەبارەت بەمافی بڕیاردانی چارەنووسی گەلان كە زۆرێك لەگەلانی دنیا لێی سوودمەندبوون و، گەلانێكی دیكەش لێی بێ بەش بوون، لەپێش هەمووشیانەوە گەلی كوردستان، لەبەر چەندین هۆكاری پەیوەست بەبەرژەوەندیی زلهێزان و براوەكانی دوای هەردوو جەنگیی یەكەم و دووەمی جیهان.
جێگەی خۆیەتی ئاماژە بەم خاڵانە بدەین:
یەكەم: لەدوای رووخاندنی خەلافەتی عوسمانییەوە لە(3/3/1924)ەوەو، لەگەڵ دامەزراندنی دەوڵەتی عێراقی عەرەبیدا لەلایەن ئینگلیزەكانەوەو، بەزۆر لكاندنی ویلایەتی موسڵ بەو دەوڵەتەوە، حكومەتە یەك لە دوای یەكەكانی عێراق بەچاوی كەمینەیەكی ترسناكەوە لە كوردیان روانیوەو، لە پێناوی لاوازكردن و كۆنترۆڵكردن و، دواجاریش قڕكردنیدا خۆیان لە بەكارهێنانی هیچ شێوازێكی نایاسایی و نائاسایی و نامرۆڤانە، نەپاراستووە.
سەردەمێك بە نكوڵی كردن لە مافە رۆشنبیریییەكانی، سەردەمێكیش بە گۆڕینی ناوی شارو گوندەكانی و، سەردەمێكی دیكەش بە بەعەرەبكردن و، جارێكیش بە راگوێزانی، جارێكی دیكەش بە سوتماك كردنی خاكی و، دواجاریش ناپاڵم و كیمیا پیاكردنی و، هەوڵدان بۆ كوشتن و لەناوبردن و قڕكردنی لەژێر ناوی سورەتێكی قورئانی پیرۆزدا.
دووەم: لەڕووانگەی ئەو راستییە قورئانییەی كەخودای گەورە فەرموویەتی:
(ومِنْ آيَاتِهِ خَلْقُ السَّمَاوَاتِ وَالأَرْضِ وَاخْتِلافُ أَلْسِنَتِكُمْ وَأَلْوَانِكُمْ إِنَّ فِي ذَلِكَ لَآيَاتٍ لِّلْعَالِمِينَ) (الروم :22)
بۆیە سڕینەوەی ناسنامەو زمان و مۆرك و كەلتووری گەلان تاوانێكەو دژ بە ویستی خوایەو، خودای گەورە قەبوڵی ناكات.
سێیەم: لەڕووانگەی ئەو راستییەش كە مافی سروشتی و خواپێداوی خۆمانە خاك و نیشتمان و زێدی باوو باپیرانی خۆمانمان خۆش بوێت، بە تایبەت كوردستانی ئێمە، كەخوای گەورەش لە قورئانی پیرۆزدا ئاماژەی بۆ شوێنی بەرچاوو هەڵكەوتووی دەكات وەك خاكێكی پڕ خێرو بەرەكەتی نەبڕاوە كە شایانی ئەوە بوو ببێتە شوێنی نەجات بوون و لانكەی دووەمی مرۆڤایەتی و چەق و سەنتەری دیمۆگرافی بازنەی ژیانی مرۆڤایەتی .
چوارەم: لامان وایە كە ئیدی كاتی ئەوە هاتووە كۆمەڵگەی نێودەوڵەتی بزانێت كە رێككەوتنامەكانی(سایكس پیكۆ)و (لۆزان) چ كارەساتێكیان بەسەر گەلی كوردستاندا هێناوە.
بۆیە ئێمە لەڕووانگەی ئەوەی كە پێكەوەژیان و پێكەوەبوونی مرۆڤەكان لەبچووكترین بازنەدا تا پێكەوەبوونی گەلان لەیەك دەوڵەتدا، ئیرادەی ئازادو قەبوڵكردنی سەربەستانەی دەوێت و، پێكەوە لكاندنی بەزۆری گەلان و تێكەڵكردنی خاك و نیشتمانەكانیان، هەنگاوێكی كارەساتهێنە، بۆیە:
1- ئێمە ئەوە رادەگەیەنین كە گەلی كوردستان لەلكاندنی بەم عێڕاقەوە پرسی پێنەكراەوە، بۆیە مافی بڕیاردانی چارەنووسی خۆی هەیە بۆ راگەیاندنی دەوڵەتی خۆی و، جۆری ئەو سیستمەی كە ئارەزوومەندانە بۆ خۆی و نەتەوە هاوژیانەكانی هەڵیدەبژێرێت.
2- لەڕووانگەی ئایەتی (يَا أَيُّهَا النَّاسُ إِنَّا خَلَقْنَاكُم مِّن ذَكَرٍ وَأُنثَى وَجَعَلْنَاكُمْ شُعُوبًا وَقَبَائِلَ لِتَعَارَفُوا إِنَّ أَكْرَمَكُمْ عِندَ اللَّهِ أَتْقَاكُمْ إِنَّ اللَّهَ عَلِيمٌ خَبِيرٌ ) (الحجرات : 13) بەمەبەستی بەرقەراركردن و چەسپاندنی ئاشتیی جیهانیی و ئیقلیمی، داوا لەكۆمەڵگەی نێودەوڵەتی و دامەزراوە جیهانییە پەیوەندیدارەكان دەكەین كە هەوڵەكانیان چڕ بكەنەوە بۆ سڕینەوەی ئاسەواری هەڵە كوشندەكەی خۆیان و، قەرەبووكردنەوەی گەلانی زیان لێكەوتوو، كە مافی پێكەوەژیانی ئارەزوومەندانەو، مافی بڕیاردانی چارەنووس بۆ گەلی كوردستان بەڕەوا بزانن.
