زۆربەی كات(باجی فاتم) لەسەر دوكانە خنجیلانەكە دادەنیشت، خانمێكی بەژن بەرزی سیما نوورانی بڕ میهرو نەوابوو، هەمووان پێیان دەگوت :(دایكی گەرەك)، ئێمەش بە دایكی خۆمان دادەنا
یەكێك لەو شوێنانەی لە زەینا چوون نەقشی بەردە، دوكانی كۆڵانەكەیە، كە رۆژانە، بەتایبەت لە رۆژانی پشوودا هەر پاش وەرگرتنی (خەرجی) رۆژانە، منداڵ رووی تێدەكات، ئیدی ئەوە نوقڵ و مەسكەت و لەبزینە و حاجی بارام و سۆدە و سیفۆن) جۆرەك و رەحەتەللوقمی شروبی . دوكانی خوالێخۆشبوو(مام سەعی منەوەر) بوو، كە پۆلیسی سوارە بوو، پیاوێكی بەژن بەرزی قۆز، بەتایبەت كە بە جلە پۆلیسیە ئەفسەری رەنگ وقایش و قرۆش و قۆپچە زەركەفتییە بریسكەدارەكان و گوێترە و چەكە قەترانییەكەیەوە، سواری ئەسپە كحیلە یاڵ شۆڕ و بریسكە دارەكەی دەبوو بۆ سەر كارەكەی، كە لەوبەر ماڵەكەیانەوە تەویلەیەكی بۆ كردبوو، هەر هەفتەی یەك دووجار بە فڵچەیەكی گەورەی زبر پاكی دەكردەوە و ئەوسا زین و لغاو و سەركڵاوەی لێ دەبەست، زۆربەی كات(باجی فاتم) لەسەر دوكانە خنجیلانەكە دادەنیشت، خانمێكی بەژن بەرزی سیما نوورانی پڕ میهرو نەوابوو، هەمووان پێیان دەگوت:
(دایكی گەڕەك)، ئێمەش بە دایكی خۆمان دادەنا، ئەو خانمە لە چارەسەركردنی كێشە و گرفتی ماڵانی كۆڵانەكەدا، كاریگەری دەستگایەكی گەورەی ئەمڕۆمانی هەبوو، وەك یەك ماڵ بووین (كاكە كەمال) برا گەورەیان بوو، (كاكە جەمال)یش هەر خۆشەویستم بوو، بێوەی و هێدی ترین مناڵی گەڕەك بوو.
ساڵی( 1984) لە (شانۆی سالار) سەرقاڵی پرۆڤە بووم، گوتیان، میوانێكت هەیە، كە چووم (كاكە جەمالی مام سەعیدم) بینی، نزیكەی سی ساڵ بوو نەمدیبوو، دەستەو ملانی یەكدی بووینەوە پاش چاك و چۆنی و هەواڵپرسینی گەرم و گوڕ، قاتێ جلی بە عەلاگە كراوی دایە دەستم، وتی: ئەمە ئەو قاتە جلە پۆلیسییەی باوكمە، كە بەمنداڵی زۆر پێت جوان بوو، ئەوا جوان لە ئوتووم داوە و بۆم هێناوی رەنگە بۆ كاری شانۆیی پێویستت بێ، منیش بە سۆز وخۆشەویستیمەوە وەرمگرت و ماچم كرد و بە سنگمەوە نووسان، ئیدی لەو رۆژەوە ئەو برا ئازیزەم نەدییەوە، بەری چەند مانگێك بۆ كارێكی ئەدەبی پێویست و سەردانی برایانم (یاسین بەرزنجی و ئاشتی دانش) سەردانی كتێبخانەی گشتی سلێمانیم كرد، خانمێك بەرەو و رووم هات و چاك و چۆنی لەگەڵ كردم، وتی: دەمناسیتەوە؟ لەگەڵ ئەوەشدا كاتێ ئەو (گوڵستان) خانەم دیبوو، منداڵێكی ژیكەڵەی، هەروا شەش ساڵان دەبوو، بە چاوەكانیا ناسیمەوە، دەسبەجێ گوتم: ئەی چۆن؟
تۆ دادە گوڵستانی مام سەعی و دایە فاتم نیت؟
ئیدی كەوتمە پرسیاری دایك و باوك و خوشك و برا، بەتایبەتی كاكە جەمال، زۆر بە هەواڵیان دڵتەنگ و خەمناك بووم و هەستم بە شەرم و پەشیمانی كرد، نەمدەزانی هیچیان نەماون، هەر لەو ساتە چاوتروكانەدا، هەر هەموویان هاتنەوە بەرچاوم و چی بیرەوەری ئەو گۆشەیەی مەملەكەتەكەی كۆڵانەكەمان بوو.لە مێشك و ناخمدا وروژان، چۆن وروژانێ! (سەرجەم هەستەكانمی وەگەڕنا، تەنانەت بۆنی ئاوڕشێنی دەمەو عەسرانی بەر ماڵەكەشیانم، كردەوە... لە دڵی خۆمدا بە حەسرەتێكی زۆرەوە وتم:
ئای رۆژانی تەمەنی سەردەمە ئاڵ و واڵاكان رۆژانە لە بوونمان دادەتاشرێن و دابڕ دەبێ، كەچی هێندە بێ ئاگابن، یان گەلێك دڵ سەنگین و پێ نازانین!؟
هاوسێیەكمان هەبوو، هەر لەسەرەتاوە دیواری نێوان حەوشەكانیشمان نەبوو، پیاوێكی رووخۆشی قسەخۆش و ئازیزی هەمووان و (داینەمۆ)ی هونەر لە شارەكەدا، مامۆستای خوالێخۆشبوو،(ئەنوەر تۆڤی) باوكی(دكتور دلێر) كە لە هاوڕێ خۆشەویستەكانی ئەو سەردەمە و هەتا ئەمڕۆشە، مامۆستا خەڵكی (بامەڕنی) بوو، هەر كە خانەی مامۆستایانی گوندیی(دار المعلمین الریفیة) ی لە (رۆستەمیە)ی بەغدا تەواو كردبوو، یەكسەر لە (تەوێڵە)ی(هەورامان) وەك مامۆستا دەستبەكاربوو بوو.. پاشان هاتە شاری(سلێمانی) و بووە و دراوسێمان. ئەو دەمە مامۆستای هونەربوو، لە ئامادەیی پیشەسازی، كە سەرەتا لەو شوێنەدا دەیانخوێند كە پاشان بوو بوو بە (گەراجی كارگێڕی ناوخۆ) و ئێستا (بەڕێوەبەرایەتی رەگەزنامە)یە، كە تەنیا(20) مەتر لە ماڵەكەیانەوە دووربوو، ئەم مامۆستایە یەكێكە لە رابەرەكانی هونەری شێوەكاری لەو شارەدا، شان بە شانی (حەسەن فەلاح) و (خالید سەعید) و (جەمال بەختیار).. جگە لەوەی ئەم مامۆستا هونەرمەندە، بووە بزوێنەری گیانی هونەری لە گشت بوارەكانی هونەرە جوانەكاندا، بەتایبەتی هونەری شانۆ..... ماڵی، ئەم هونەرمەندە، لانەی خوشك و براو برازاكانی و تەنانەت گشت ئەوانەی لەو دەڤەرەوە، چ بۆ خوێندن یان بۆ كاركردن روویان لە سلێمانی دەكرد، خویەكی زۆر سەیری هەبوو، بەبێ دەنگی(رادیۆ) خەوی لێ نەدەكەوت، گەر(رادیۆ) كەیان بكوژانایەوە دەسبەجێ رادەچڵەكی، دەبێ ئەوەش بڵێم لە هاویناندا، ئەو (رادیۆ)یەی ئەو بوو بووە رادیۆی مەملەكەتەكە، چونكە بمانویستایە و نەمانوویستایە هەر هەمووان گوێمان لێ دەبوو، ئەویش لە شیرینی خەوی خۆیدا بوو.