كە باس لە ئیسلامی سیاسی باڵی ئیخوان دەكەین، مەبەستمان دژایەتیكردنی هیچ لایەنێك نییە بە مانای دژایەتی، بەڵكو زیاتر ناساندن و تێگەیشتنە بۆ ئەوان، چونكە ناكرێ حزبێكی سیاسی هەبێت و قسەی خۆی لەهەنبەر پرسە سیاسی و كۆمەڵایەتی و ئابووری و نیشتمانییەكانمان بكات و پێچەوانەی كولتوورو بڕوانیشتمانییەكانی كورد بدوێت و، تەنانەت بێت قسە لە كولتوورو بیروباوەڕیشمان بكات، كەچی ئێمە راستییەكان نەڵێین لە كاتێكدا ئەوەی ئەوان دەیڵێنەوە ئاوەژووكردنەوەو هەڵگەڕانەوەیەكی تەواوە لە تەواوی ئەو پرسانەی كە باسمان كرد.ئیخوانەكانی كوردستان، لە ئەنجامی ئەو پڕۆسە دیموكراتیەوە هاتوونەتە دروستبوون، كە ساڵەهایە گەلی كوردستان رووباری خوێنی بۆ رشتووە، بۆیە نابێت ئەوە فەرامۆش بكەین، كە ئیخوانەكانی كوردستان هیچ شەرعییەتێكی شۆڕشگێڕییان نییە، لەوەش زیاتر ئەوان زۆر قەرزاری ئەو گەلەن كە لە ئەنجامی تێكۆشانەكەیان یارمەتیدەری راستەوخۆ بوو، تا ئەوان جورئەت بكەن خۆیان رابگەیەنن، كەواتە هیچ فەزلێكیشیان بەسەر ئەم میللەتەوە نییە.
ئەوەی ئیخوانەكانی كوردستان لە ئیخوانەكانی جیهانی عەرەبی جیا دەكاتەوە ئەوەیە، ئیخوانی عەرەبی هەمیشە جەختی لە ئوممەی عەرەبی كردۆتەوە، عەبدولناسر ئەندامێكی ناو ئیخوان بوو، ساداتیش هەر ئیخوان بوو، بەڵام هەر بەدەستی ئەوانیش تیرۆر كرا، كەچی ئیخوانەكانی كوردستان هەمیشە هەوڵیان سڕینەوەی هزری نەتەوەیی بووە،لە شوێنی سڕینەوەی هزری نەتەوەییمان هەوڵیان بۆ هێنانی هزری عەرەبی داوە، كە بەشێكە لە پڕۆسەی تەعریب، ئەگینا ئەو مزگەوتی سەوافە كە گەورەترین مزگەوتی پایتەختە بۆچی بەناوی سەوافەوە ناوبنرێ، ئایا ئەمە ئیهانە نییە بۆ تەواوی گەورە پیاوانی ئایینیمان بە درێژایی مێژووی زیاتر لە هەزار ساڵەمان، ئایا دەكرێ حكومەتی هەرێم لە بەرانبەر ئەم كردەوەیە بێدەنگ بێت؟ ئایا دەكرێ عەلی قەرەداخی لە قەتەر بە عەگال و دیشداشەوە فەتوا بدات و لە كوردستانیش بە جلی هەورامییەوە خۆی نیشانبدات و ئەو پارەوپوولەی لە قەتەرو سەعوودییە وەریدەگرێت بێت لە هەزارا یەك كەمتریش بكاتە خێرو سەدەقە بۆ لایەنگرانی خۆیان؟ .دەبوو ئیخوانەكانی كوردستان بەر لە هەرچی كارێك بیریان لە مەرجەعێكی كوردی بكردایەوە نەك بیروهزری حەسەن بەناو سەید قوتب و یوسف قەرزاوی بخەنە گوێچكەی لاوی كورد، كاتێك یەكگرتووی ئیسلامی مۆسیقایان حەڵاڵ كردو جگەرەیان حەرام كرد پشتیان بە فەتواكانی قەرزاوی بەستبوو. ئەگەر یەكگرتوو كەسایەتییە ئایینییەكانی كوردی بكردایە مەرجەع بێگومان ئەركەكانیشی سووكتر دەبوو، بەڵام نەیانكردو نایشیكەن، لەكاتێكدا نموونەی زۆرمان هەن، چ لە هەرێمی كوردستان یا بەشەكانی دیكەی كوردستان ئەمەش لەوەوە سەرچاوەی گرتووە ئیسلامی سیاسی بە گشتی و یەكگرتووی ئیسلامی بە تایبەتی، لە نێو مزگەوت و تەكیەو خانەقاكانەوە سەریانهەڵنەداوە، بەڵكو وەك هەر حزبێكی سیاسی عەلمانی لە قوتابخانەو زانكۆكانەوە سەرچاوەیان گرتووە، پاشان بۆ مەبەستی سیاسی نەك ئایینی بەرەو مزگەوت گەڕاونەتەوە .ئەگینا هەموو ئەو ئیسلام و ئایینەی یەكگرتوو یا تەواوی ئیسلامی سیاسی لێی دەدوێن، بە دوو وشە وەڵامدەدرێنەوە كە ئەوەیە كام شەرع بۆ مرۆڤ باشترو راستترە، شەرعێك كە خودا داینابێ، یان شەرعێك مرۆڤ داینابێ؟؟.
خاڵكی تر كە جێگای پرسیارە لەدوای راپەڕینەوە كە ئەوە (18) ساڵە ئیسلامی سیاسی بە هەموو باڵەكانیەوە، چ پڕۆژەیەكیان هەبووە بۆ گرفتی بێكاری، باری ئابووری كوردستان، چاكسازی كۆمەڵایەتی، توندوتیژی بەرامبەر بە ئافرەت، بە دامەزراوكردنی دامودەزگاكانی حكومەت، بەرگرتن لە كۆچی لاوان،....هتد؟ تا ئێستا ئیسلامی سیاسی لە كوردستاندا خاوەنی تیۆرێك نین هەر لە بواری سیاسییەوە تا دەگاتە بواری فیقهی..
بەكورتی ئەوهەنگاوانەی پێویستە حكومەتی هەرێم هەنگاوی جیدی بۆ هەڵبگرێت، پێش هەموویان هەڵگرتنی وشەی ئیسلامە لە تەواوی ئەو حزبانەی بەو ناوەوە خۆیانی پێ با دەدەن، چونكە زیاتر لە (10-15) ساڵە لە وڵاتانی عەرەبیش پێڕەو كراوە، بۆ نموونە لە تونس (حركة الأتجاه الأسلامي) گۆڕدرا بۆ (حركە النهضة) و لە رۆژهەڵاتی جەزائیریش (الجماعة الأسلامیة) كرا بە (حركة النهضة) لە ساڵی 1996 یشدا (حركة المجتمع الأسلامي) كرا بە (حركة المجتمع السلم) لە ساڵی 1998 یشدا (الجماعة الأسلامیة) لە لوبنان كرا بە (الأصلاح)، هەردووباڵی ئیخوانی ئوردن كە ناویان (جبهة العمل الأسلامي)و(المقاومة الأسلامیة)بوو، حزبی (الخلاص الوطني) لێهاتە كایەوە.بۆیە لێرەش دەبێت دەستپێبكرێت و ئەگەر دوێنێ زوو بوو، ئەوا سبەیش درەنگە. كەواتە ئەمڕۆ.