جڤاک بێی هزرمەندێن کو پرسیاران ئاراستە دکەن، پێش ناکەڤیت، ئەڤرۆ مە پێتر هەر دەمەکێ دی پێدڤی یا ب رەوشەنبیر و کەسێن کو پرسیاران ئاراستە دکەن هەی، لەوا ژی پێدڤی یە هەڵسەنگاندن و دید و بۆچوونێن رەوشەنبیری ژ یێن سیاسەتکارەکی جودا بن، چونکە کەرستێ رەوشەنبیری، ئاقلە، نە سۆز و باوەری یە، و خەما وی ئازادی یە، چونکە چ کارێن رەوشەنبیری بێی ئازادی ناگەهن، نەمازە یێن کو گرێدان ب کێشە یێن رەوا یێن جڤاکیڤە هەی، کو پێدڤی یە رەوشەنبیر خۆ لێ بکەتە خودان.
دیسان دڤێت کاری لسەر هشمەندییا پاشڤەرو ژی بکەت ئەوا کو ژێیاتییا عەشیرەتێ خورتکری و بها و پیڤەرێن خۆ لسەر بزاڤا سیاسی سەپاندی، کو ب ئەگەرێ پەیوەندی یێن کاریزمایێ، و خۆویستیێ، پارتایەتی یا بەرتەنگ، و ...تد. دەرکەفتییە مەیدانێ، لەوا دیار دبیت کو هشمەندییا ناڤنجی یا هوشیار بەرەڤ دەستنیشانکرنا ئێشێ و گەشبیریێ چوو، سەرباری بەرتەنگی یا بیاڤی و کێمی یا دەلیڤەیان، ئەڤجا دڤێت رەوشەنبیر لدەستپێکێ دیرۆکێ بناسیت، و کێشەیان شرۆڤە بکەت، و شاشی یێن هزرێن ئینایی و دارێژدانکێن بەرهەڤکری یێن بیانی، روناهیێ بئێختە سەر تاڕیتی یێن جڤاکێ مە یێ کوردان، و کرێتی یێن هشمەندییا پاشڤەڕۆ بەرچاڤ بکەت.
خویایە کو پێشکەفتنا دیرۆکی، و ئابۆری و جڤاکی و هشمەندی یا مە کوردان، نە وەکی یا رۆژئاڤایە، هەیا ئەو هزر و ئایدولۆژیا لسەر بهێنە پەیڕەوکرن، لەوا ژی بەهرا پترێ ل وان هزر و باوەڕان ب راستییا کەتواریڤە پرچقین، و دهەمان بازنەدا دزڤڕن و مانەڤە بەس ناڤێن بێ ناڤەڕۆک و روحەکا بێ لەش، ئینانا وان هزرێن بەرهەڤکری بۆ بازدانەک لدویڤ سێبەرێ و نڤیانەک چێکر و ئەو نڤیان و راوەستیانا ل هەما جه ژی، بۆ غاردانا لدویڤ سێبەرێ و نەزانینێ و پاشڤەمانێ، کو هش جەمداند و گرێدا و هێلا یێ ب سۆز بیت لسەر کەڤناتیێ و سترانان ب کەڤن و بەرێ بێژیت.
لەوا ژی ئەگەر ل جیاتی وێ چەندێ زانست ئینابایە دا دشیان دا بیت کو هشەکێ کوردی یێ زاستی بهێتە ئاڤاکرن، و دا کەڤنەپەرستی ژی هێتە بنبڕکرن، لێ مخابن کو ئەو یەک نەکر و رونەدا، چونکە رەوشەنبیر پشتی بوویە سیاسەتکار دکەتوارێ کەڤنەپەرستیێ دا، ئێدی ئەرکێ خۆ یێ رەوشەنبیری کو چێکرنا پرسیار و کارکرن و رەخنەگرتنە لسەر هشمەندی یا جڤاکی و رەهەندێ خۆ یێ رەخنەیی ژ دەست دا و خیانەت ل پرسیار و رەخنە و داهێنانێ کر، و دیسان بەشەکێ رەوشەنبیران و هەڤشێوە یێن وان یانکو یێن کێم رەوشەنبیری ژی هەی، توشی دەردێ خۆ نێزیک کرنێ ژ بەرپرسان بوون، لەوا ژی پۆستێن سیاسی و کارگێڕێ وەرگرتن و نەشیان خۆ ل گرێ یێن سیاسی و جڤاکی ، و ئابۆری و رەوشەنبیری رزگار و قورتال بکەن، و پێنگاڤان بەرڤ داهێنان و بەرهەمئینانێ بهاڤژن و بەرڤ بەڵاڤکرنا رەوشەنبیری وزانینێ بچن.
ل دوماهیێ پێدڤی یە رەوشەنبیر یێ ب پرسیار و بەرپرسیار بیت❗، هەیا کو بمینیت پێشەنگێ گوهڕین و پێشڤەبرنا جڤاکی و ببیتە ڕوناهییەکا گەش بۆ کاروانێ پێشڤەچوونێ، و دلێ تکتکین بیت د رەوشەنبیری و هزر و زانینێ دا.