بەرێ دەولەتێن كوردستان داگیركری و ب پشتەڤانییا دەولەتێن زلهێزێن وی دەمی، كورد دكوشتن و دگۆت ئەڤە كاروبارەكێ ناڤخۆیی یە، و كەسێ مافێ مایتێكرنێ تێدانییە، و نها د هەوێن پاككرن و قركرنا نەژادی یا توركیا یا ئیخوانی یا ئیسلامی دا ب پشتەڤانییا ئەمریكا و رۆسیا، كوردان دكوژن ب بهانە یا گەفا لسەر ئاساییشا نەتەوەیی.
هەروەكو هەبوونا مللەتێ كورد گەفەك بیت لسەر ئاساییشا نەتەوەیی و هەرێمی و جیهانی و ئەختەری و ستێرێن وێ و گەف بیت لسەر هەموو ستێرێن كاكێش-ی و هەتا ئەم گەفین لسەر ئاساییشا گەردوونی ژی!.
نهێنی ئەوە كو بەرژەوەندی یێن دەولەتێن زلهێز و دەولەتێن كوردستان داگیركری، لسەر لەشێ زارۆكێن مە و تێكبرنا خەونێن مە و هەڕشاندنا هیڤی یێن مە ب هەڤ دگەهن!.
ئایە ما رەوشێ پێدڤی ب ئاساییشا نەتەوەیی یا كوردان نییە، ئەوێ دۆژمنێ هەبوونا نەژادێ من بیت ل وێرێ دێ دۆژمنێ من بیت ل ڤێرێ ژی، و هەڤاڵ ژی هەڤاڵە چ ل ئێرە و ژ ل وێرێ، و ئەڤە ژی ئاساییشا نەتەوەیی یا كوردایە.
د سەد ساڵی یا دو هزارێ دا دەولەتان كومەكا رێككەفتنێن دژی كوردان مۆركرن، د بیست ساڵی یا هزاری یا سێ یێ دا ژی دۆژمن و داگیركەران و ب پاڵپشتییا بەشەكێ دەولەتێن زلهێز لبەرە ب هەمان میكانیزم كومەكا دی یا رێككەفتنان لسەر هەبوون و نەبووونا كوردان مۆربكەن، پێدڤی یە هندی هێش زوی یە كونگرێ نەتەوەیی لسەر داخوازا سەرۆك مەسعوود بارزانی بهێتە گرێدان و ب سەرۆكایەتی سەرۆك بارزانی ئەڤ قوناخا مەترسیدار ل سەر مللەتێ مە بهێتە تێپەڕاندن و پێكڤە ئەم كورد ل هەر چار پارچەیان بگەهینە كەنارێن ئارامیێ.
دۆژمنێ داگیركار داخوازا نەهێلانا كوردان و دورپێچكرنا وەڵاتێ مە دكەت ژ روویێ ئابۆری و هەردەما ب سەر كەفت و ئەڤ رێككەفتنا توركیە لگەل ئەمریكا كری هاتە جێبەجێكرن، و كوردان هێزێن خۆ ل رۆژئاڤا ڤەكشاندن، دێ ئەم كورد ل باشورێ كوردستانێ ژی سەرباری ژلایێ ئابۆریڤە دێ ژلایێ سیاسیڤە ژی هێینە دورپێچكرن، و هەر دەما توركیە بخوازیت دێ مە خەندقینیت.
چونكە بەرێ ژی داگیركەران ئەڤ كارە و سیاسەتە پەیڕەوكریە دژی مللەت و هێزێن مە كوردان و پشتەڤانییا هێزێن پارچەكا وەڵاتێ مە كری یە، داكو خوەدی رزگاری و ئازادی یا پارچەكا دی دەرنەكەڤن هەر بۆ نمونە: پشتەڤانی و بەشداری یا بارزانیێ نەمر ل كۆمارێ كوردستانێ ل ساڵا 1946ێ، ژلایێ هەردو دەولەتێن عیراق و ئیرانێ یێن داگیركەر و پشتی راگەهاندنا كۆماری بریارا سێدارەدانێ بۆ بارزانیێ نەمر دەرئێخستن و بارزانی كوچبەری ئێكەتی یا سۆڤیەتی بوو و ئەو بریار ژی نەهاتن راگرتن هەتا ساڵا 1958ێ و ڤەگەڕیانا بارزانیێ نەمر بۆ عیراقێ و ئەو بریارا سێدارەدانێ یا ئیرانێ ژی لسەر بارزانیێ نەمر هەر ما هەتا ساڵا 1968ێ.
ب كورتی و كورمانجی و كوردی، گەفەكا مەزن یا لسەر هەبوونا سیاسی و بەرژەوەندی یێن مە كوردان ل هەر چار پارچێن كوردستانێ هەی، رێیا هەرە كاریگەر ژی كونگرێ نەتەوەیی و ئاڤاكرنا ئێكڕیزی یا مە یە و پەیوەندیكرنە ب هێزێن دیموكراسی یێن جیهانی و سازی و رێكخراوێن پاراستنا مرۆڤان، كو ل دژی ڤێ سیاسەتا داگیركاری راوەستن یاكو توركیە ل دژی مللەتێ مە ل رۆژئاڤایێ كوردستانێ پەیڕەودكەت، دیسان پێدڤی یە دەزگەهێن راگەهاندنێ و سوسیاڵ میدیا، و ڕەوشەنبیر، نڤیسەر، هۆنەرمەند، رێکخراوێن جڤاکێ مەدەنی و چاڵاکڤانێن كورد و كوردستانی، ڕۆڵەکێ ئەرێنی یێ هاندەر و ئاڤاکار بگێڕن، پێخەمەت ئاڤاكرنا ئێکڕێزیێ، ژبەرکو وەڵاتێ مە کوردستان ئێکە، لەوا ژی داکەفتن و سەرکەفتنا هەر بەشەکێ کوردستانێ، بۆ مە کوردان ئێکە، چونکە ئەم ئێک نەتەوەینە، داگیرکار ژی هەر چەند ب ژمارە چارن، لێ د راستیدا ئەو تەڤ ئێکن، و دژمننێن سەرسەختێن هەبوونا مە کوردانە.