كورد ب دیتنا دوژمنی و داگیركەری گاور و تیرۆریستە لەوا ژی هەردەم گۆند و باژێڕێن مە ب بۆمبە یێن تۆپ و فرۆكەیان دهێنە وێرانكرن، و مرۆڤێ كورد د هێتە كوچبەركرن و ب دارڤەكرن و د ڵایڤێن تیرۆریستاندا دهێتە سەرژێكرن.
ئەم هەردەم یێن هاتینە كوشتن ب دەستێ تورك و عەرەب و فارسان، ب بوهانە یێن جودا، لێ سەدەما سەركی هەر ئەو بوویە كو كوردین.
ئەڤ نەتەوە یێن سەردەستێن ڤان دەولەتان دڤان سەد ساڵان دا، هەركو بهێزبوون و فشارێن دەولەتان ل سەر نەمان دێ بەربنە گیانێ كوردان و هەوێن قركرنێ بەرپاكەن، لەوا ژی كورد نەچاربووینە د رەوشەكێ دا بژین كو ناخوازن ب وی رەنگی بن، چونكە دەما كوردان پشتدانی لسەر دەولەتێن تورك و فارس و عەرەب كری، روبروویی ژناڤبرن و سەركوتكاریێ بوون، هەیا زمانێ ئاخفتنێ ژی ژمە كوردان قەدەغەكرن، و دەما پشدانیێ لسەر دەولەتێن زلهێز و كاریگەرێن وەك ئێكەتی یا ئەوروپا و ئەمریكا دكەین، مە ب خائینێن نشتیمانی ل قەلەم ددەن.
لەوا كورد دناڤبەرا چەكوچێ داگیركەران و سندانێ هەڤال و دوست و هەڤپەیماناندا، یێن كو چەند جارە مە بۆ رەحما داگیركەرێن هۆڤ ب جه دهێلن، لەوا ژی، ب دیتنا من کێشا مە کوردان نە ل بەغدا و نە ل ئەنقەرە و تەهران و نە ژی ل دیمەشقێ ناهێتە چارەسەرکرن، چونکە گرفت نە ب تەنێ ب مە ڤە گرێدایە، مانێ گرفت ئەوە ئەڤ دەولەتێن داگیركەر مە ب هەڤوەڵاتی یێن خۆ نزانن، ئەو دەولەت د لاوازیێ دا دبێژنە مە هنگ هەڤوەڵاتی یێن مەنە و دەما ب هێز دکەڤن مە ب مرۆڤ ژی نزانن! هەروەكو ل ئیراقێ هاتییە رویدان، و هەر دەما کورد ژی بهێزکەفتن یان مەترسی لسەر دەولەتێن وان دروست بوون ژلایێ دەولەتێن زلهێزڤە، دێ بینی داخوازا دان و ستاندن و چارەسەریێ کر، پاشان دێ هەوەکا لەشکری و قڕکرنا گەلێ کورد دەست پێکەن.
دوژمنێن مە هەردەم ژ بوهانەیەكێ گەڕیاینە، داكو كوشتارگەهـ و ئۆپەراسیۆنان، ل دژی مە كوردان بەرپادكەن، ئەڤە نە ل ئەڤرۆیە و زۆر ژمێژە كەڤنە ددیرۆكێ دا، بۆ میناك توركان ل دەرسیم و ل شۆرشا شێخ سەعیدێ پیران ساڵا 1925ێ دەهان هزار كورد شەهیدكرن ، فارسان پێشەوا قازی موحەمەد ب دارڤەكرن" و عەرەبان تاوانێن ئەنفالكرن و كیمیابارانا هەڵەبجە بۆ قركرنا كوردان ئەنجامدان.

دڤان هەموو ساڵێن درێژێن پشتی سایكس پیكو دا" ب تەنێ داگیركەری دڤێت كورد نەبن!، و ب دیتنا دوژمن و داگیركەران كورد هەموو تیرۆریستن!، ڤێجا ب چ بوهانەیەكێ بیت نە گرنگە، و دوژمن جوداهیێ ل ناڤبەرا كوردان ناكەت، لەوا ژی دڤێت ئەم ژی د توند و رەگەزپەرست بین هەمبەر دوژمنێن داگیركاران" و د نەرم و نیان و لێبووردە و كوك بین ل گەل خۆ، و هەڤهەڵوێست و ئێكرێز بین ل هەمبەر گەف و هەولێن دۆژمنێ داگیركار، ئەگەر نە د روبروویی مەترسی یا ژێردەستیێ و قركرنێ بین.