ڤەگەرا ئاشتیێ بۆ باکورێ کوردستانێ بابەتێ گەرمێ رۆژەڤێیە ژ پێخەمەت چارەسەرکرنا پرسا کورد ل باکورێ کوردستانێ دگەل تورکیا. کو ئەڤە زێدەتری ٤٠ سالانە شەر و پەڤچوون دناڤبەرا ھەردوو ئالیاندا دبەردەوامن، واتە حکومەتا تورکیایێ و پەکەکێ، بڤێ چەندێ ھژمارەکا زۆر ژ ھەردوو ئالیان بووینە قوربان و زیانێن مەزن بەر ب ھەردوو ئالیان کەتینە. نەخاسمە ل دەڤەرێن کوردان، کو ژبلی زیانێن گیانی، زیانێن ئابوری و بازرگانی و شارستانی و دیرۆکی ب دەڤەرێن وان گەھشتینە ئەوێن شێنوارێن دیرۆکی پێڤە دیار، بۆ میناک ناڤچەیا سورا ئامەدێ. ئەڤە زێدەباری زیان گەھاندن ب باشورێ کوردستانێ و بتایبەت ل ناڤچەێن سنوری، ئەڤان شەر و پەڤچوونان مەودایەکێ دیرۆکی ھەیە. ب واتیەک دن برینەکا کەڤن و دیرۆکییە دناڤبەرا ھەردوو ئالیاندا. تاکە چارەسەر ژی بۆ ئەڤێ پرسا دوم درێژ ھەر ڤەرگەرا ئاشتیێ و دانوستاندنێن ئاشتیانەیە. کو د دەم سالا ٢٠١٣ ھاندا رێککەڤتن دناڤبەرا ھەردوو ئالیاندا ھات پەژراندن. ب ناڤبژیکار و ھاریکاریا حکومەتا ھەرێما کوردستانێ نەمازە ل سەر ئاستێ ھەردوو سەرۆکایەتیان، ژبوی کو ئەڤ پرسا دیرۆکی برێکا ئاشتیێ بھێتە چارەسەرکرن. ئەڤێ گاڤا گرنگ و دیرۆکی دەنگڤەدانا خوە ھەبوو ل سەر ئاستێ ناڤخویی و ھەرێمی و نێڤدەولەتی. لێ بمخابنیڤە درێژە نەکێشا و جاردن پشتی تەقینێن ناڤچەیا پرسوسێ، ئێدی وەلاتێ تورکیا دەست ب ئوپەراسیونێن خوەیێن سەربازی کر. ل باکور و باشورێ کوردستانێ دژی پەکەکێ و بتایبەت ل دەڤەرێن کوردان بڤێ چەندێ ژی ئاگرێ شەر و پەڤچوونان سەرھەلدا. دگەل سەرھەلدانا شەر و پەڤچوونان سەرۆکێ نھایێ ھەرێما کوردستانێ ب ھەول و گاڤێن خوەیێن ئاشتیانە بەردەوام بزاڤ دکر کو ھەردوو ئالی بگەھنە رێککەڤتنێ ژبوی کو جاردن ئارامی و ئاشتی بۆ دەڤەرێ بزڤرێت. د دوماھیک گاڤا خوەدا سەرۆکێ ھەرێما کوردستانێ د ھەمیا رۆژێن دەربازبوویدا پێشوازیا شاندەکێ بلندێ HDP ب سەرۆکاتیا "سەزای تەمەللی"کر. درۆنشتنا خوەدا سەرۆکێ ھەرێما کوردستانێ ھەند بابەتێن گرنگ دگەل وان گوتوبێژکرن و جاردن ھەلویستێ خوە بۆ چارەسەرکرنا پرسا کورد ب شاندا ناڤبری ڕە خوەیا کر و گۆت:" نابە جاردن دەلیڤەیا ئاشتیێ ل تورکیا بھێت ژ دەستدان" مەبەست ژ ئەڤێ گوتنێ ئەو بۆ کو ئەو دەلیڤەیا زێرین ئەوا بۆ کوردێن باکور ھاتیە رۆژەڤێ د دەم سالێن بوریدا دڤێ جاردن دگەل رایەدارێن خوە و یێن حکومەتا تورکیا بکەنە بابەتێ گەرمێ دانوستاندنیێن سیاسی د ھەر دەم و ساتەکێ دا. ژبەرکو ناڤبری دزانیت کو ئەگەر پرسا کورد ل باکور برێکا دیالوگ و زمانێ ئاشتیێ نەھێتە چارەسەرکرن ب ھێچ رەنگەکێ برێکا شەر و ئالوزیان ناھێت چارەکرن. چونکی شەر ۆ ئاشتی دو چەمکێن ھەڤدژن. د مودێلا پولەتیکایا ئەڤرۆدا ماف برێکا ئاشتیێ دھێن بدەستخستن، نەک برێکا شەری. ئەگەر برایێن مە ل باکور بڤێت مافێن خوە ژ حکومەتا تورکیێ بستینن، بتایبەت برێکا سیاسەتێ دڤێ کو فشاران پێخنە سەر پەکەکێ ژبوی کو خەباتا چەکی پێگھور بکەت، دگەل خەباتا مەدنیەت و دیموکراسیەتێ. ھەر لسەر ئەڤێ مژارێ سەرۆکێ ھەرێما کوردستانێ تەکزی ل وێ یەکێ ژی کر کو ئەو دێ ھەمی ھەول و گاڤێن خوە بکارئینیت، ژبوی ڤەگەراندنا ئاشتیێ و راوەستاندنا خەباتا چەکداری ل باکور و باشورێ کوردستانێ ئەوا پەکەکێ گرتییە بەر ل دژی حکومەتا تورکیایێ. لەورا ب ڤەگەرا ئاشتیێ، دبە کو جاردن ئاشتی و ئارامیا سیاسی و ئابوری و ئاڤەدانی و گەشتیاری و بازرگانی بۆ دەڤەرێ بزڤرە.