نوی بوون ، دادپەروەری ، پێکڤەژیان . هەرسێ دروشم و هێمایێن پارتا دیموکراتا کوردستانێنە . پارتەکا نیشتیمانی یە و باوەڕی ب مافێن مرۆڤی و دادپەروەریا جڤاکی و ئازادیا تاکەکەسی و مافێ نەتەووەیا کورد و نەتەوەیێن دن ل بڕیاردانا پرسێن چارەنڤیس ساز هەیە . ئەڤ پارتە هەردەم بزاڤێ دکەت کو مفای ژ ئەزمونێن گەلان وەرگریت و دگەل ژیوارێ کوردستانێ بگونجیت . ل ۱٦ ی تەباخا ۱۹٤٦ ێ ب سەرۆکایەتیا ( مەلا مستەفا بارزانی ) و (۷۰) نوینەرێن دن ل مالا (سەعید فەهیم ) ل بەغدا ، کۆنگرەیا ئێکێ یێ حزبێ هات گرێدان و ئەڤ پارتە هاتە دامەزراندن . ل دەسپێکێ ناڤێ وی ( پارتا دیموکراتا کورد ) بویە . پاشی ل کۆنگرەیا سێیێ کو ل ۲٦ . ۱ . ۱۹٥۳ یێ ل باژاڕێ کەرکوکێ هاتبوو گرێدان ، بڕیار هاتەدان کو ناڤێ حزبێ بهێتە گوهوڕن بۆ ( پارتا دیموکراتا کوردستان ) ێ ، ئەڤێ پارتێ هەتا نها( ۱۳ ) کۆنگرە گرێداینە . د هەمان دەمدا ۱٦ ی تەباخا ۱۹٤٦ ێ رۆژا ژدایک بوونا سەرۆک ( مەسعود بارزانی) یە . سەرکردەیەک هندی لدویڤ کوردستانەکا ئازاد و گەلەکێ بەختەوەرە ، هند گرنگی ب رۆژا ژدیک بوونا خوە و حزبا خوە نەدایە ؛ چونکی وی هەردەم ڤیایە کریار و رەفتارێن وی پیڤەربن بۆ هەلسەنگاندنا وی نەک یادکرنا بەروارەکێ بۆ رۆژا ژدایک بونێ . خەبات و تێگۆشانا وی یێ بەردەوام کو زێدەتر ژ نیڤ سەدەیە و کارتێکرنا وێ خەباتێ لسەر بزاڤا کوردایەتیێ سامانەکێ مەعنەوییە و جهێ شانازیێ یە .ئەوی حزبا خوە کریە ئامرازەک ژبۆ گەهشتن ب ئارمانجیێن نەتەوەیی . ئەم هیڤیا تەمەنەکێ درێژ و ساغلەم بۆ دخازین بۆ خزمەتکرنا گەل و وەلاتی . بێگومان هەر پارتەکی د خەباتا خوەدا کۆمەکا ئارمانجان هەنە کو بزاڤێ بۆ دکەت بدەسڤە بینیت. دێ بزاڤێ کەین هندەک ژ ئارمانجێن نەتەوەییێن پارتا دیموکراتا کوردستانێ بەرچاڤکەین :
۱ـ بزاڤکرن ژبۆ ب نێڤدەولەتی کرنا دۆزا کوردی ، د چارچۆڤا رێکخراوێن نێڤدەولەتی . ئەڤەژی ب ئاشکرایی د سیاسەتا پارتیدا رەنگڤەدایە و کار لسەر کریە .
۲ـ مکومکرنا پەیوەندیێن برایەتیێ و پشتگیری و هاریکاریا لگەل سەرجەم حزب و رێکخراویێن دیموکرات و ئاشتیخواز و رەوەندێن کوردی ب شێوەیەکێ ئاشتیانە ، و پەنا برنە بەر توندوتیژیێ بهێتە حەرامکرن .
۳ـ زڤڕاندنا دەڤەرێن کوردستانیێن دەرڤەی هەرێمێ بەرنیاس ب ماددێ ۱٤۰ ێ .
٤ـ پاراستن و گرنگی پێدانا هەمی ئەو دەستکەفتێن نەتەوەیی و سیاسی و ئابوری و کەلتوریێن ب خەباتەکا دیرۆکی هاتینە بدەستڤە ئینان .
٥ـ چەسپاندن و بهێزکرنا ئێکبونا نیشتیمانی ل هەرێما کوردستانێ و ئیراقێ ، پێخەمەت ڤەدیتنا چارەسەریێن هەڤبەش ژبۆ کێشەیێن نافخۆیی ، بۆ ڤێ مەبەستێ ژی پارتی هەردەم دەستپێشخەر بویە و کار لسەر خالێن هەڤبەش کریە .
٦ـ دروستکرنا پەیوەندیێن دۆستانە داڤبەرا هەرێما کوردستانێ و وەلاتێن دەورووبەر لسەر بنەمایێ پرنسیپا بەرژەوەندیێن هەڤبەش . ئەڤ ئارمانجە ژی ب شێوەیەکێ بەرچاڤ ژلایێ تیما پارتی د حکومەتێدا کار لسەر هاتیە کرن ، ب تایبەت نێچیرڤان بارزانی کو خودان پەیوەندیێن بهێزە دگەل وەلاتێن دەوروبەر .
۷ـ دروستکرنا باشترین پەیوەندییان لگەل ئەو حزبێن دڤێ وەلاتیدا سیاسەتێ دکەن . د نهادا پارتی خودی پەیوەندیێن باشە دگەل هەمی حزبێن کوردستانێ و عراقێ ، ل دوماهیک سەرەدانا خوەژی بۆ بەغدا، مەسعود بارزانی سەرەدانا هەمی ئالیان کر پێخەمەت بهێزتر کرنا پەیوەندیان . هەلبەت ئەڤە و ب دەهان ئارمانجێن گرنگتر و مەزنتر کو ژبەر کورتیا بابەتی نەشێین دڤێ گوتارێدا ئاماژەی بدەینێ .
ل چەند سالێن بوری پارتا دیموکراتا کوردستانا رۆلەکێ مەزن ل بەرەڤ پێشبرنا هەرێما کوردستانێدا گێڕایە و کەشتیا هەرێمێ بەرەڤ جیهانی بوون و پێشکەفتنێن ل جیهانێ رووددەن و ب رێکەفتیە . هەلبەت کابتنێ ئەڤێ کەشتیێ ژی نێچیرڤان بارزانی بویە . ئەگەر ئەم ل کەرتێ خواندنا بلند بنێڕین وەک نمونە و بەراوردیەکێ دگەل چەند سالێن بوریدا بکەین دێ بۆمە دیاربیت کو پشتی سەرهەلدانێ ، مە ل کوردستانێ تنێ دوو زانکۆیێن حکومی هەبوون ، لێ نها مە ( ۱۹ ) زانکۆیێن حکومی هەنه . ئەڤە دەستکەفتەکا مەزنە کو ل کابینەیێن ئێک لدویڤ ئێک نێچیرڤان بارزانی کار لسەر کریە و رۆژ بۆ رۆژێ ئەڤ کەرتە ڤەژاندیە ، ئەڤڕۆ ب هزاران مامۆستا ب باوەڕنامەیێن بلند ل زانکۆ و پەیمانگەهێن هەرێمێ خزمەتێ دکەن . هەر ل پشتی سەرهەلدانێ هەتا نها ب سەدان ئاڤاهی و تاقیگەهێن زانستی هاتینە ئاڤاکرن و (۱۹) زانکۆیێن تایبەت و ئەهلی لێ هاتینە ڤەکرن و (۱٤) پەیمانگەهێن تایبەت هەنە . ب سەدان قوتابیێن کورد ل دەرڤەی وەلاتی ل زانکۆیێن جیهانێن ب ناڤ و دەنگ ل قۆناغێن ماستەر و دکتۆرایێ دخوینن و ل پێشە رۆژەکا نزیک وەکی یێن دن دێ شیانێن خوە ئێخنە د خزمەتا وەلاتیدا . ئەڤ ئامارێن لبەردەستێ مە باشترین بەلگەیە کو کەرتێ خواندنا بلند لسەردەمێ حکومەتا نێچیرڤان بارزانی گرنگیەکا مەزن پێ هاتیە دان و رۆژ بۆ رۆژێ پێشکەفتیە .