هه‌لبه‌ت مه‌به‌ستا من بڤێ گوتنا مه‌زنان نه‌ك راسته‌وخویه‌. به‌لكو مه‌به‌ستا من پێ واتایا نه‌راسته‌خویه‌، ئه‌وژى ئه‌وه‌ كو كورد بخو دوژمنێ سه‌رسه‌ختێ دوزا خو بوویه‌ ب درێژاهیا دیروكێ. ئانكو ب واتایه‌كا دى بێژم كو هندى كورد دوژمنێ دوزا خۆ بووینه‌، هند ملله‌تێن دوژمن نه‌بووینه‌ دوژمن، بدرێژاهیا دیرۆكێ میناكێن به‌رچاڤ هه‌نه‌ بۆ سه‌لماندنا بوچوونا مه‌ ژ سه‌دسالیێن بورى بگره‌ و تا دگه‌هیته‌ ئه‌ڤرۆكه‌ هندى لبیرا مه‌یه‌ و دیرۆكا ملله‌تێ مه‌ یا بڤى ره‌نگى بوویه‌. له‌ورا دڤێت ئه‌م مفایى ژ بوریێ خۆ وه‌ربگرین و نه‌هێلین دوژمنێن مه‌ جاره‌كا دى مه‌ بكاربینن بۆ به‌رژه‌ندیێن خۆ ئاگرێ شه‌رى و دژیه‌تیكرنێ دناڤ مه‌دا خوش بكه‌ن. به‌لكو دڤێت ل هه‌رچار پارچێن كوردستانێ و ل هه‌ر ده‌را جیهانێ ئه‌م خۆ ب كوردبوونێڤه‌ گرێبده‌ین نه‌ك ب دژایه‌تیكرنێڤه‌.
دژایه‌تیكرنا په‌كه‌كێ بۆ باشورێ كوردستانێ نموونه‌یه‌كا دیارا روژه‌ڤا ئه‌ڤرۆكه‌یه‌ كو برێكا نه‌یارێن ملله‌تێ كورد ب تایبه‌ت دوژمنێن دیرۆكى مینا توركیا و ئیران و عێراق، ده‌هولا شه‌رى دقوتیت. چونكه‌ ئه‌ڤ هه‌رسێ وه‌لاته‌ یێ كاردكه‌ن ره‌وشا كوردێن باشورێ كوردستانێ تێكبده‌ن و ئه‌ڤێ ئارامیێ و خوشگوزه‌رانیێ جاردن بزڤرینه‌ڤه‌ خالا ده‌سپێكى كو ئه‌ڤ چه‌نده‌ژى خه‌ونا نه‌یارێن مه‌یه‌. له‌ورا دڤێت په‌كه‌كێ ب مه‌سئولانه‌ و ژیرانه‌ ب هه‌ما هه‌نگى دگه‌ل هه‌مى پارتێن باشورێ كوردستانێ بزاڤان بكه‌ت خو دیر بكه‌ت ژ هه‌ر گه‌ڤ و مه‌ترسیه‌كا دبیته‌ ئه‌گه‌ر كو جاردن شه‌رێ برا كوژیێ روینه‌ده‌ت. گه‌ڤێن په‌كه‌ێ ل باشورێ كوردستانێ هێز و پالپشتیه‌كا مه‌زنه‌ بۆ دوژمنێن مه‌. كو جاردن ئه‌ڤێ پارچا ئارام یا كو هه‌مى ملله‌تێ كورد شانازیێ پێ دكه‌ت، به‌ره‌ڤ ئاقار و شه‌ره‌كێ ئالوز و دوریانه‌كا ئالۆز ئاراسته‌ بكه‌ت.
دیسان ئه‌ڤ خه‌باتا نها په‌كێ دكه‌ت وه‌كو هێزه‌كا چه‌كدار مودیله‌كێ كه‌ڤنێ خه‌باتا سیاسی و شوره‌شگێریه‌. چونكى ئه‌ڤ مودیلێ خه‌باتێ به‌روڤاژى جیهانبینیا سیاسیا ئه‌ڤرویه‌. ژبه‌ركو دئه‌ڤرۆكه‌دا هێزا سیاسى بزاڤێ ب هێزا چه‌كدارى دكه‌ت و ئاراسته‌ دكه‌ت نه‌ك به‌رۆڤاژى، ئه‌ڤرۆكه‌ زمانێ دیلوگێ باشترین چاره‌سه‌ره‌ بۆ ئه‌وى شه‌رێ نه‌رمێ نها په‌كه‌كێ دكه‌ت. له‌وما ئه‌گه‌ر په‌كه‌كێ بڤێت دۆزا كوردى ل باكور به‌ره‌ڤ چاره‌كرنێ ببه‌ت وه‌كو باشور كوردێ وان د ته‌ناهیێ و ئارامیێ دا بژیت، دڤێت ده‌ست ژ خه‌باتا چه‌كدارى به‌رده‌ت و به‌ره‌ڤ هێزا سیاسیڤه‌ بچیت و ببته‌ قه‌لغانێ به‌ره‌ڤانیكرنێ بۆ چاره‌سه‌ركرنا پرسا كورد ل باكور. چونكه‌ دنهادا هه‌بوون و مانا په‌كه‌كێ ل چیایێن باشور ژبلى زیانێ چ مفایێ خۆ نینه‌، ژبه‌ركو هه‌ر ژ ده‌سپێكا دامه‌زراندنا خۆ هه‌تا نها پارتا په‌كه‌كێ نه‌شیایه‌ پێنگاڤه‌كێ به‌ره‌ڤ پێش بچیت هه‌ر یا مایه‌ڤه‌ ل ئه‌وێ دوریانا ئالۆز كو نه‌ پێش خۆ و نه‌ژى ره‌خ و دورێن خۆ دبینیت. زۆر جارانژى سه‌ركردێن كورد ل باشور بتایبه‌ت سه‌رۆك مه‌سعود بارزانى و سه‌رۆك نێچیرڤان بارزانى په‌یامێن ئاشتیانه‌ برێكێن جودا جودا ب ئاشكرا ئاراسته‌ى مه‌زنێن په‌كه‌كێ كرینه‌، كو ده‌ستان ژ باشورێ كوردستانێ به‌رده‌ن و به‌ره‌ڤ باكورێ كوردستانێ بچن. هه‌ر لسه‌ر ئه‌ڤێ چه‌ندێ د هه‌یاما بوریدا سه‌روكێ هه‌رێمێ رێزدار نێچیرڤان بارزانى دگوتاره‌كا خودا دا دیاركرن كو "نابیت ئاخا هه‌رێما كوردستانێ بۆ دژایه‌تیكرن و هێرشكرنه‌ سه‌ر وه‌لاتێن هه‌ڤسى بهێته‌ بكارئینان" به‌لێ به‌داخه‌وه‌ په‌كه‌كێ هه‌ریا رژده‌ ل سه‌ر وێ یه‌كێ كو دێ برێكا باشورێ كوردستانێ پرسا كوردان ل باكورێ كوردستانێ چاره‌سه‌كه‌ت. ئه‌ڤه‌ژى گه‌له‌ك یا بزه‌حمه‌ت و ئالۆزه‌. به‌لكو شه‌ره‌كێ نه‌رمه‌ و دوژمنێن مه‌ یێ ئه‌ڤى شه‌رى گه‌رم و گۆڕ دكه‌ن. له‌ورا بدیدا مه‌ دڤێت په‌كه‌كێ بیر ل رێگه‌ چاره‌یێن دى بكه‌ت بۆ چاره‌كرنا پرسا كوردان و بده‌ستخستنا مافێن كوردان ل باكورێ كوردستانێ. ژبه‌ركو ئه‌و ده‌هولا نها په‌كه‌كێ ل بشور دقوتیت دۆژمنێن كوردان یێ لبه‌ر ئاوازا وێ گوڤه‌ند و دیلانێ دكه‌ن.