گەلێ کوردستانێ دهەمی قۆناغاندا پێدڤی ب ئێک رێزی و ئێکگرتنا جڤاکی ، ئولی ، نەتەوەیی هەبویە و هەیە ، هەتاکو سەقامگیریا سیاسی و ئاشتیا جڤاکی تێدا یێ پاراستی بیت و بشێت روو بڕوویێ هەمی مەترسی وگەفێن دوژمنان ببیت ، و دهەمان دەمدا دگەل پێشهات و گوهوڕینێن سیاسی ب سەرکەفتیانە پێنگاڤان بهاڤێژیت، و بەرەڤ ئەوێ ئارمانجێ بچیت ئەوا زێدەتر ژ سەد سالایە خوینا خۆ بۆ درێژیت و قوربانیێ بۆ ددەت.
ب درێژاهیا دیرۆکێ مرۆڤ لهەر جهەکێ هەین و لسەر رویێ ئەردی ژیابن و کاودانێن ژیانا وان هەرچاوابیت ، خودانێ هەر رەوشت و تیتال و زمان و ئاینەکێ بن ، پێدڤی هەڤدوو بوینە .ئانکو مرۆڤ ئەو بونەوەرە کو نەشێت تنێ و بێی دەوروبەرێ خۆ بژیت و هەردەم پێدڤی ب پێکڤەژیانێ هەیە.
دناڤ هەی گیاندارێن دونیایێ تنێ مرۆڤن کو زێدەتر پێدڤی ب ژیانا ب کۆمەل و پێکڤە ژیانێ هەیە ، تنێ مرۆڤن کو پێدڤیە پلان و بەرنامەکا گونجای بۆ داهاتویا خوە دابڕێژن ، تنێ مرۆڤن کو ئەزمونێ ل سەرکەفتن و شکستێن بوری وەردگرن و دکەنە هێڤێنا ژیانەکا باشتر بۆ داهاتویا ژیانێ .
مالپه‌رێ واشنتۆن تایمز یێ ئه‌مریكى، گۆتاره‌ك ل دۆر سه‌رۆكێ هەرێما کوردستانێ نێچیرڤان بارزانى به‌لاڤ كریە و تێدا هاتیە : " نێچیرڤان بارزانى پارێزه‌رێ ئاشتى و لێبۆرینى یه ‌ل رۆژهه‌لاتا ناڤه‌راست." د گۆتارا خوه‌ دا مالپه‌رێ واشنتۆن تایمز، ئاماژه‌ دایه‌ دیرۆكا كارێن سیاسى و كارگێرى یێن نێچیرڤان بارزانى و دیار كرییه‌، پشتى ده‌ستبكاربوونا وى ل پۆستێ سه‌رۆكاتیێ، ئێدى هه‌رێما كوردستانێ ده‌ربازى قۆناغه‌كا نوو بوو، ژبه‌ركو نێچیرڤان بارزانى پارێزه‌رێ ئاشتى و لێبۆرینى یه‌ و جهێ باوه‌ریا هه‌موو پێكهاته‌یێن ئۆلى و نه‌ته‌وه‌یى یه‌ و گه‌لێ كوردستانێ ب هیڤیه‌كا مه‌زن ڤه ‌ل هیڤیا گاڤێن سه‌ركه‌فتنا وى نه‌. دا یه‌ زانین ژى: نێچیرڤان بارزانى نموونه‌یا سه‌ركرده‌یێن رۆژهه‌لاتا ناڤه‌راسته ‌و دێ شێت ب هه‌لوه‌ستێن خوه ‌یێن ئاشتیانه‌ و دوپاتیا وى ل پێكڤه‌ژیانێ و بزاڤێن وى یێن خورتكرنا په‌یوه‌ندیێن ل گه‌ل به‌غدا، هه‌رێما كوردستانێ كه‌ته ‌جوانترین نموونه‌یا رۆژهه‌لاتا ناڤه‌راست.
ئاشکرایە کو سەرۆکێ هەرێمێ پارێزەرێ پێکڤەژیانێ و جهێ باوەڕیا نەوە و ئولێن جودایە ل هەرێما کوردستانێ ، هەروەکی د گوتارا دەست بکاربونا خوە دا وەک سەرۆکێ هەرێمێ هەمی نەەتەوە و ئولێن جودا ل کوردستانێ پشت راستکر و گۆت : " دێ بزاڤێ کەین مافێن دەستوریێن کوردستانێ وەرگرین ، دابینکرنا ماف و ئازادی و بەرکەفتەیێن هەمی چین و تەخێن جڤاکی و نەهێشتنا هەمی جۆرە توند و تیژیەکێ و بهێزکرنا پێکڤەژیانێ و ئێکتر قەبولکرنێ د وەلاتەکێدا کو دێ وەلاتێ مە هەمیا بیت و هەرتاکەک خوە ب خودانێ وی وەلاتی بزانیت . ئێک رۆژ لسەر سەرێ مە هەمیا بلند دبیت و ئێک ئاسمان مە دادپۆشیت و مە ئێک ئایندە و ئێک چارەنڤیس هەیە ) ئاشکرایە کو هەرێما کوردستانێ خودان چەندین پێکهاتەیێن ئاینیێن ئەتنی و جڤاکیێن جودا جودایە . و ئارمانجا سەرۆکێ هەرێمێ دڤێ گۆتنا لسەری مە بەرچاڤکری دیار دبیت. کو دێ بزاڤێن وی بەردەوامبن بۆ پاراستن و پێشڤە چوونا ئەو پێکڤە ژیانا دناڤ جڤاکێ کوردیدا هەیە و هەروەکی چاوا لە چەند سالێن بەرێ ب جدی کار لسەر دکر، هەرئەڤەژی بویە هێڤێنا گوتارا مالپەڕێ واشنتۆن تایمز یێ ئەمریکی . ئەگەر ئەم ل دیرۆکێ بنێڕین گەلەک جاران دناڤ جڤاکێ مەدا بەرئێککەفتن و ئاریشە دناڤبەرا چین و تەخێن جودا جودایێن جڤاکێ مەدا دروست بوینە لێ ل سەردەمێ نها گورینەکا بەرچاڤ پەیدابویە . ئیدی تاکێ کورد و ئەو نەتەوەیێن کو ل کوردستانێ دژین گەهشتنە وێ باوەڕێ پێدڤیە ب رێکا دیالۆگ و ئالوگۆڕیا هزری لهەڤ دوو بگەهن و ئاریشەیێن خوە چارەسەر بکەن .هەلبەت ئەڤە رامانا هندێ ددەت کو سەرۆکێ هەرێمێ باوەریەکا مەزن پێکڤە ژیان و کارکرنا بکۆم هەیە و کەسەکێ تاک رەو نینە د بڕیاردانێدا ، و دڤێت جڤاک هەمی د پێشکەفتنا وەلاتیدا پشکدار بیت . ژبەر وێ یەکێ لسەر تاکێ کورد پێدڤیە گرفتێن گەڤن بهێلیت و هزرا خوە د داهاتویا وەلاتیدا بکەت و کار لسەر ئەڤێ پرۆسەیا پێکڤەکارکرن پێکڤە ژیانێ بکەت و بڤی رەنگی جڤاکەکێ ساغلەم تەندروست دێ پەیدابیت کو هەمی ئول و نەتەوە تێدا هەست ب ئارامیا ژیانێ بکەن و ل جیهانا دەرڤە وەک جڤاکەکێ ئاشتی و ئازادیخواز بهێینە دیتن