رۆژ بۆ رۆژی شەڕێ دناڤبەرا گەریلایێن پەکەکێ و لەشکرێ تورکیا دژوارتر دبیت و دەڤەرێن بن دەسهەلاتا حکومەتا هەرێما کوردستانێ دبنە مەیدانێن شەڕێن وان . د نهادا بنکە و بارەگەهێن پەکەکێ دەڤەرێن چیایی و سنورێن رۆژهەلات و باشور هەتا رۆژ ئاڤایێ کوردستانێ و دەڤەرەکێ بەرفرەهـ بۆ خوە کۆنترۆل کرینە ، لدویڤ راپۆرتەکێ کو ل رۆژنامەیا ( رووداو ) بەلاڤ بویە ، زێدەتر ژ ۳٤٪ ێ ل سنورێ پارێزگەها دهۆکێ لژێر کۆنترۆلا پەکەکێدایە و لسەر ئاستێ هەرێما کوردستانێژی زێدەتر ژ ( ٦٥۸) گوند لژێر کۆنترۆلا پەکەکێدانە.و ژیارا خەلکێ وان دەڤەران د مەترسیێ دایەو گەلەک ژوان رەز و باخ و زەڤیێن خوە هێلاینە و قەستا باژێڕان کرینە . خویایە جیهان و نەخاسمە رۆژهەلاتا ناڤین ب کاودانێن نە ئارام دەرباز دبیت . ئەمریکا و روسیا و وەک دوو جەمسەرێن زلهێز بەردەوام د هەڤرکیێ دانە . دیسان پەیوەندیێن ئەمریکا و ئیرانێ و ئەمریکا و تورکیا و ئیران و وەلاتێن عەرەبی ب تایبەت سعودیە هەروەسا ئیران و ئسرائیلێ رۆژ بۆ ڕۆژێ بەرەڤ ئالۆزیێ دچن . ژ ئەگەرێ رویدانا هەر جەنگەکێ ، هەرێما کوردستانێ ژ زیانێن مەزن بێ بەهر نابیت ، چونکی وەلاتێن جیران ژ ئەگەرێ لاوازبونا هەرئێک ژ وان یێ دی بزاڤێ دکەت هەژموونا خوە بەرەفرەهـتر بکەت . ژبەر ڤان ئەگەران فەرە هێزێن سیاسیێن کوردستانێ ب ژیرانە سەرەدەریێ دگەل کاودانێن دەڤەرێ بکەن . لێ مخابن هندەک ژوان بوینە ڕێ خۆشکەر بۆ دەست وەردانێن دەولەتێن بیانی .
پەکەکە ب هەجەتا خەباتێ ژبۆ کوردستانا مەزن ، ئەو ماف دایە خوە کو دەستوەردانێ د هەمی پارچێن کوردستانێدا بکەت . لێ دورشمێ کوردستانا مەزن زوو ب دوماهیک هات و ئەوان ل هەر پارچەیەکی حیزبەک دروستکر . ئەڤێ بریارێژی دوو ئارماج لپشت بوون : یا ئێکێ : بۆ ئیران و ئیراق و سوریێ دیاربکەن کو پەکەکە تنێ شەڕی دگەل تورکیێ دکەت و بەهنگاری وان نابیت . هەلبەت ئەڤ ئالۆزیا ل هەرێمێ ژی دروست دکەت د بەرژەوەندیا ئیرانێدایە و ئیران پەکەکێ ئاراستە دکەت داکو پەیوەندیا تورکیا و هەرێما کوردستانێ ئالۆزبکەت . ۱ـ هێرشکرنە سەر بۆڕیا نەفتا هەرێمێ و پەقاندنا وێ ل سەردەمێ قەیرانا دارایی کو زیانەکا مەزن گەهاندە ئابوریا هەرێما کوردستانێ . ۲ـ دروستکرنا هێزەکا چەکدار تایبەت ب باشورێ کوردستانێ بۆ هێرشکرنە سەر بەرژەوەندیێن تورکیا ل هەرێمێ . ۳ـ کوشتنا جێگرێ قونسلێ تورکیا ل هەولێرێ ژی ژ ئالیێ پەکەکێ ڤە باشترین بەلگەنە کو پەکەکە کار بۆ تێکدانا پەیوەندیێن هەرێمێ دگەل تورکیا دکەت . یا دووێ : هەتا پەکەکە ژ ژێدەرێ داراییا پارچەیێن دن یێن کوردستانێ بێ بەهر نەبیت .
بەری چەند سالان پەکەکێ باوەڕی ب دەولەتا نەتەوەیی و فیدرالی نەبوو و بەردەوام دژایەتیا وێ دکر . ل رۆژئاڤایێ کوردستانێدا بێ رێزی ب ئالایێ کوردستانێ دکر کو د رێکا وێدا هزارا شەهیدا خوە کریە قوربانی . دەمێ ئەم ل کریارێن پەکەکێ دنێرین ل کیش پارچا کوردستانێ بزاڤا کوردی بەرەڤ پێشڤە بچیت ئەو ل وێرێ دبنە ئاستەنگ ل هەمبەر دۆزا نەتەوەیی رێکێ خوەش دکەن لهەمبەر دەست وەردانا دوژمنێن دەرەکی. بۆ میناک نها هەرێما کوردستانێ ئازادە و روژ بۆ رۆژێ بەرەڤ جیهانا شارستانیەتێ پێنگاڤان دهاڤێژیت ، لێ پەکەکە بویە ئەگەرێ هندێ کو تورکیا گوندیێن سنوری بۆردومان بکەت خەلکێ سڤیل ببنە قوربانی . هەرچەندە مەیدانا خەباتا پەکەکێ باکورێ کوردستانێ یە لێ تا نها نەشیایە گوندەکێژی ل وێرێ رزگار بکەت ، هەرچەندە ئایدۆلۆژیا پەکەکێ رێکێ نادەت چ حزبێن کوردی یێن دن دگەل وان ب هەڤبەشی ل پارچەێن دن خەباتێ بکەن . لێ ل باشورێ کورستانێ داخوازا هەڤبەشیێ دکەت . ئەڤە وەکی وێ گۆتنێ لێ دهێت دەمێ دبێژن: ( هی خۆم بۆ خۆم و هی ئێوەش دەخۆم ) . پەکەکە بەحسێ فەلسەفا ئاپۆیزمێ دکەت لێ دڤێت رەوشەنبیرێن کورد ل خوە بپرسن ، داڕێژەرێ فەلسەفێ دڤێت فەیلەسوف بیت و فەلسەفەژی بەرهەمێ زهنیەتا فەیلەسوفایە ، پرسیار ئەوە دەمێ کو ئۆجەلان فەیلەسوف نەبیت ئیدی فەلسەفا ئاپۆیزمێ چ واتایەک هەیە ؟ هێشتا کەسەک نینە ژوان بپرسیت باشە دورشمێ خەبات ژبۆ کوردستانا مەزن چاوا بو کانتۆن و رازیبون ب فیدرالیزمێ ؟ هەمان ئەو فیدرالیزما سەردەمەکی ب تشتەکێ بێ مفا ژ ئالیێ وانڤە دهاتە وسفکرن لێ کو نها روسیایێ پێشنیار کریە ژبال وانڤە بویە شەکر !
گومان د هنێدا نینە حکومەتا هەرێما کوردستانێ ب شێوەیەکێ بەرچاڤ کار لسەر پێکڤە ژیانێ کریە و چەندین سالە لژێر چاڤدێریا نێچیرڤان بارزانی کۆنفرانسا پێکڤەژیانێ دهێتە ئەنجامدان . هەتا نەتەوەیێن جودا جودا ل هەرێما کوردستانێ ب ئارامی بژین . لێ ئەگەر ل بویەرێن ڤێ دوماهیێ بنێڕین کو ل تورکیا بێڕێزی ل هەمبەر ئالایێ کوردستانێ و هندەک گەشتیارێن کورد هاتە کرن . هەلبەت ئەڤەژی ژ ئەنجامێ ئەڤێ کارڤەدانێ هات کو سۆشیال مەدیایێن پەکەکێ کەیفخۆشیا خوە ب کوشتنا جێگرێ کونسولێ تورکی ل هەولێرێ راگەهاند و دگۆتن مە تۆلاخۆ ڤەکر . ئەڤ جۆرێن رەفتاران رەگەز پەرستیێ دروست دکەت بەروڤاژی پلان و ستراتیژیەتا حکومەتا هەرێمێ کو کار لسەر پێکڤەژیانێ دکەت . بێگومان ئەگەر بزاڤێن سەرۆکێ هەرێما کوردستانێ نێچیرڤان بارزانی و حکومەتا هەرێمێ نەبا رەنگە پەیوەندیێن تورکیا و هەرێما کوردستانێ بەرەڤ ئالۆزیێ ڤە چۆپا ، هێزێن ئەمنی ب زوترین دەم شیان تۆمەتبارێ سەرەکی دەستەسەر بکەن و ڤەکۆلینان بگەهینە ئەنجامێ.