سۆپه‌ر لێڤڵ و بورجا ئیڤڵ!
شێرزاد نایف
قووناغێن پێشڤه‌چوونا په‌یوه‌ندیێن هه‌رێما كوردستانا عیراقێ ل گه‌ل فره‌نسا رۆژ بۆ رۆژ گه‌شه‌ترن و جهێ كه‌ربوكینا دوژمنێن ڤه‌شارتی یێن كوردانه، چونكو رێیه‌كا سه‌ركه‌فتی یه ب وی جۆرێ تێگه‌هشتنێ ل گه‌ل وه‌لاته‌كێ هه‌موودونیا دزانیت یێ نه‌زیهه و خاپاندن و زه‌غه‌لی و موئامه‌ره د فه‌رهه‌نگا وی دا نینن، دیرۆكه‌كا سپی و سه‌ركه‌فتی هه‌یه، یاریێ پاقژ دكه‌ت، ب زه‌لامینی شه‌ری دكه‌ت، وه‌لاته‌كه شه‌رم ژ خوه دكه‌ت، هێمایێن وێ دونیا هه‌ژاندی یه ب ناڤێ خوه یێ بژاره و تو باوه‌ردكه‌ی نه‌ڤیێن وان خیانه‌تێ ل كوردێن سته‌ملێكری بكه‌ن، نه‌ڤیێ ناپلیۆن پۆناپه‌رت، ڤۆلتێر، دیكارت، جان جاك رۆسۆ، سارته‌ر، فۆگۆ.. هتد. فاكته‌رێ خرابناك د سه‌رده‌ریكرنێ دا نینه، دۆستاتیا دروست دكه‌ن، بۆ نموونه هه‌كه وه‌لاته‌كێ هه‌ڤدوژ ل گه‌ل كوردان په‌نایا پرۆتۆكۆلێن موئامه‌راتی ببنه فره‌نسا، چه‌ندی به‌رژه‌وه‌ندیا وان یا ب بها بیت، خیانه‌تێ ناكه‌ن، وه‌كو گه‌له‌ك رێككه‌فتن و موئامه‌رات ل سه‌ر سه‌رێ كوردان هاتینه كرن، له‌ورا ژی ئه‌ڤ جۆرێ په‌یوه‌ندیان ژی یێ كو كه‌سێ نێچیرڤان بارزانی ژێ گرتی و ل سه‌رێ لیستا ئه‌جینده‌یێن په‌یوه‌ندیێن سیاسی دانایی، فه‌رنسا بوویه و ئه‌ڤ په‌یوه‌ندیانه د چه‌ندین قووناغان ده‌ربازبووینه، هه‌روه‌كو ل مانشێتی مه كرینه لێڤڵێن سه‌ركه‌فتنێ.
چونكو هه‌رده‌م فره‌نسا ئێكه‌م وه‌لات بوویه د هاوارا كوردان دهێت ل ده‌مێن به‌رته‌گیان و نه‌خۆشیان، ل ده‌سپێكێ ب قووناغا پاراستنێ و سه‌میانبوونێ بوویه، ل سه‌رهلدانا 1991 بگره فه‌رنسایا (فرانسۆا میتران) بۆ پاراستنا كوردان ل عیراقێ ب ره‌نگه‌كێ فه‌رمی ب رێیا جڤاتا ئێمناهیا نیڤده‌ولی و په‌سنینا بریارا 688 ل 5 نیسانا 1991، به‌رێ بنیاتێ قانوونی ده‌ولی بوو، ژبۆ قه‌ده‌غه‌كرنا فرینا عیراقی، ب هه‌ماهه‌نگی ل گه‌ل برتیانیا و ئه‌مریكا، پاراستن ب ڤی ره‌نگی بۆ هه‌رێما كوردستانێ دابینكر، ل گۆر وێ ئێكێ ژی ژیرخانا كیانێ كوردی ده‌سپێكر، ب شه‌رعیه‌تا دستووری ل عیراقا پشتی سه‌دام ل 2005. رۆلێ دانیال میته‌ران ژی هند یێ به‌رز بوویه ب ناڤێ دۆستا گه‌لێ كورد هاتیه ناڤداركرن.
ئه‌ڤ سه‌متا فره‌نسا به‌رده‌وام بوو ل گه‌ل مه كوردان و ل قووناغه‌كا هه‌ستیار و مه‌ترسیدارتر ژی دیاربووڤه ل ده‌كێ هێرشا داعش سالا 2014 و هه‌روه‌سا هێرشا حه‌شدا شه‌عبی ژی پشتی پرۆسا ریفراندۆمێ ل چریا ئێك سالا 2017 ل سه‌رده‌مێ سه‌رۆكێ وێ فره‌نسۆا هۆلاند و سه‌ره‌دانا وی بۆ هه‌ولێرێ و به‌ره‌یێن شه‌ری ل گه‌ل سه‌رۆك مسعود بارزانی ده‌مێ په‌یوه‌ندیا ته‌لفۆنی هاتیه ئه‌نجامدان، هاتنا وی گه‌له‌ك به‌لانسێن مه‌زن گوهۆرین بۆ دوورخستنا مایتێكرنێن ده‌ولی ب به‌هانه‌یێن داعش و شه‌رێ سووریا و ناكۆكیێن دناڤبه‌را رۆسیا و توركیا دا، دوور نه‌بوو ئه‌م ژی هاتباینه دۆراندن، دیاركر كو هه‌رێم نه‌یا بێخودانه و هنده‌ك وه‌لات هه‌نه پشتا راستیێ و مه‌زلۆمان دگرن!!. ئه‌ڤجا ئه‌ڤ مژاره ژ بیاڤێ مرۆڤاتی بوو یێ سیاسی و پرۆتۆكۆلی و ئابووری و ئێمناهی و ..هتد.
ل دووڤرا ژی و پشتی سه‌رده‌می وی سه‌رۆكی، سه‌رده‌مێ ماكرۆنی هات، ئه‌و ژی به‌رده‌وام بوو ل گه‌ل هه‌ریمێ و د قووناغا هه‌ستیار و چاره‌نیڤساز دا ژی ل مه بوو خودان ل ده‌مێ قه‌یرانا ئابووری ل سه‌ر حه‌فكا مه شدیایی و بێهنا هه‌ڤوه‌لاتیان ته‌نگبوویی وحوكمه‌ت كه‌فتیه دده‌راڤێ نه‌خۆش دا و ململانا پتریا ده‌وله‌تان ل گه‌ل هه‌رێمێ گه‌هشتیێ لۆتكێ، سه‌رۆكێ حوكمه‌تا عیراقێ حه‌یده‌ر ئه‌لعه‌بادی دڤیا دانپێدانێ ب هه‌رێمێ نه‌كه‌ت ب گه‌ل و حوكمه‌ت ڤه، به‌لێ ماكرۆنی پیشوازیا نێچیرڤان بارزانی كر و دیسا په‌یاما فره‌نسا یا ب هێز گه‌هشته هه‌می لایه‌نێن زلهێز وه‌كو سه‌رۆكه‌كێ وه‌لاته‌كێ مه‌زن مه‌حفیرێ سۆر بۆ سه‌رۆكێ حوكمه‌تا هه‌رێمێ دانا.. ئه‌و لێڤلێ سه‌خت ژی ده‌ربازكر، ب راستی دڤێت ئه‌و قه‌نجی ببیته دیرۆكه‌كا شه‌نگدار د ناڤ به‌رپه‌رێن كوردینێ دا!!.
له‌ورا ژی ئه‌ڤرۆ ب گه‌رمی و ده‌مه‌كێ گونجای جاره‌كا دی پێشوازی ل نێچیرڤان بارزانی كر وه‌كو سه‌رۆكێ هه‌رێمێ و د گه‌ل دا كۆمبوو. ب هیڤیا لێڤلێن بلندتر و بلندتر. مه ل گه‌ل بلندیا بۆرجا ئیڤل بلند بكه‌ت ل هنداڤ سه‌رێ هه‌می نه‌حه‌ز و دوژمنێن ڤی مله‌تێ بریندار و مه‌زلۆم.
