جیۆپۆلۆتیکا کوردستانێ د رۆژهەلاتا ناڤین گرنگیەکا مەزن هەیە و بویە ئەگەرێ هندێ کو ئەمریکا و وەلاتێن رۆژئاڤا گرنگیەکا تایبەت ب هەرێما کوردستانێ بدەن . بۆ ئەمریکا و رۆژئاڤا سەقامگیری و ئارامیا هەرێما کوردستانێ گرنگە ؛ چونکی دەڤەرەکێ ئارامە و دناڤ شەڕ و ئاژاوەیا ئیراقێ و رۆژهەلاتا ناڤیندا . هەلبەت پاراستنا هەرێما کوردستانێ ژلایێ ئەمریکاڤە و هەبونا گرێبەستێن لهەڤ گەهشتنێ بۆ دروستکرنا پەیوەندیەکا بهێز یێ بازرگانی دناڤبەرا هەرێما کوردستانێ و ئەمریکا ب ڕامان و پاراستن و زێدەکرنا کاریگەریا ئەمریکا ل ئیراقێ دهێت . دەربارەی ڤێ چەندێ رۆژنامە نڤیس و بیرمەندێ بناڤ و دەنگێ ئەمریکی ( فەرید زەکەریا ) دبێژیت : (پاراستنا کوردان د بەرژەوەندییا ئەمریکادایە . کورد هێزەکێ دیموکراتیکە و دۆستێ رۆژئاڤایە لدەڤەرێ هەرچەندە ئەگەر ئەمریکا و هەرێما کوردستانێ لسەر کێشەیا نەفتێ ناکۆک بن ، لێ ل واشنتۆنێ کێم کەس هەنە دوێ باوەڕێ دا نەبیت کو کورد نێزیکترین هەڤپەیمانێ ئەمریکایە ل ئیراقێ ) . هەروەسا ئەمریکا و وەلاتێن رۆژئاڤا وێ یەکێ باش دزانن کو هەرێما کوردستانێ دوماهیک ئارامگەها نەتەوە و ئاینێن جودایە ل ئیراقێ . ئەڤەژی خالا بهێزا هەرێما کوردستانێ یە لجەم دەولەتێن رۆژئاڤا .

بیرامن ل گۆتنەکا سەرۆک مەسعود بارزانی دهێت بەری چەند سالا ،دەمێ چویە ئەمریکا و رێککەفتن دگەل کۆمپانیا ( ئێکسۆن مۆبیل ) ئەنجامدای کو ل هەرێما کوردستانێدا د کەرتێ پەترۆلێ دەست ب کارکرنێ بکەت . پشتی کو ل ئەمریکا زڤری د کۆمبونەکێدا گۆت : ( مەزنە کۆمپانیێن ئەمریکی ل کیش وەلاتی کاربکەن سەقامگیریا وی وەلاتی لجەم ئەمریکایێ گرنگە ، مە رێککەفتن دگەل کۆمپانیاێن مەزنێن ئەمریکایێ کرن ، ئەگەر دخەما گەلێ مەژی دا نەبن بێگومان دێ دخەما بەرژەوەندێن خوەدابن ل هەرێما کوردستانێ و دێ بزاڤێ کەن د پێلان و ئالۆزیێن رۆژهەلاتا ناڤین وەلاتێ مە سەقامگیربیت...). هەلبەت ئەڤ راستیە پشتی هێرشا مەزنترین رێکخراوا تیرۆرستیا داعشێ بۆ سەر هەرێما کوردستانێ دیاربوو و هێزێن ئاسمانیێن ئەمریکایێ رۆلەکێ مەزن هەبوو ل هەڤکاریا پێشمەرگێن کوردستانێ هەتا دووژمن تێکشکاندین ، ژبەرهندێ دێ شێین بێژین هەبونا بەرژەوەندیێن بازرگانیێن ئەمریکا ل هەرێما کوردستانێ مفایەکێ مەزن دگەهینیتە سەقامگیری و ئارامیا کوردستانێ ،
هەروەسا دێ شێین بێژین کو ل چەند سالێن بوری نێچیرڤان بارزانی سەرۆکێ بەرێ یێ حکومەتا هەرێما کوردستانێ و سەرکەفتی بوو ، و رێک خۆشکریە کو سەرمایەدار و بازرگان و کۆمپانیێن ئەمریکی ل کوردستانێ کاربکەن .
هەبونا پەیوەندییەکا بهێز دناڤبەرا هەرێما کوردستانێ و ئەمریکا د ڤان سالێن دوماهیێ ب ئاشکرایی هەست پێ دهێتەکرن . ل هەیڤا (۷) ل سالا ( ۲۰۱۸ ) ێ ، ب ئامادەبونا رێزدار نێچیرڤان بارزانی سەرۆکێ بەرێ یێ حکومەتا هەرێما کوردستانێ و سەرۆکێ نها یێ هەرێما کوردستانێ بەرێ بنیاتا مەزنترین کونسلخانەیا ئەمریکی ل جیهانێ ل هەولێرێ هاتەدانان . هەرچەندە بەری دانانا ئەڤێ پڕۆژێ کونسلخانا ئەمریکی ل هەولێرێ هەبوو ؛ لێ ب راگەهاندنا ئەڤێ پرۆژا مەزن گرنگیا هەرێما کوردستانێ لجەم ئەمریکا ب شێوەیەکێ مەزنتر دیاربوو . بزاڤێن نێچیرڤان بارزانی بۆ پێش ئێخستنا پەیوەندیێن دناڤبەرا هەولێر و واشنتۆنێ بەردەوامن ،پشتی کو وەکی سەرۆکێ هەرێمێ دەست بکار بوی رێککەفتی ۲۰۱۹/٦/۲۳ ێ نێچیرڤان بارزانی دگەل (ئەندرۆ پیک ) جێگرێ وزیرێ دەرڤە یێ ئەمریکا و بالیوزێ ئەمریکا ل ئیراقێ و جێگرێ سەرۆکێ ژورا بازرگانیا ئەمریکا ل رۆژهەلاتا ناڤین دگەل سەرۆکێ ژورا بازرگانیا عیراقی و هژمارەک ژ بەرپرس و بازرگانێن هەرێمێ یاداشتەکا لهەڤ گەهشتنێ دناڤبەرا ژوورا بازرگانیا ئەمریکا و پیشەسازییا هەرێما کوردستانێ بڕێڤە چوو ، د وێ رێورەسمێدا سەرۆکێ هەرێمێ گوتارەک پێشکەشکر و تێدا راگەهاند کو ئیمزاکرنا ئەڤێ یاداشتێ کارەکێ گرنگ بوو ،و ب پێنگاڤەکا د جهێ خۆ ل دەمێ خۆ دا وەسفکر . هەلبەت ژوورا بازرگانیا ئەمریکا مەزنترین رێکخراوا بازرگانیا جیهانێ یە و زێدەتر ژ (۱۰۰) نڤیسینگەهـ ل جیهانێ هەنە . و ئیمزا کرنا ئەڤێ یاداشتنامێ دەرگەهـێ زێدەتر ژ سێ ملیۆن کۆمپانیایێن ئەمریکی بسەر هەرێما کوردستانێدا ڤەکر ، و بازاڕەکێ مەزن بۆ کۆمپانیایێن ئەمریکی ڤەدکەت . سەرۆکێ هەرێمێ د گوتارا خۆدا دووپاتکر کو بۆ بلندکرنا ئاستێ وەبەرهینانا ئەمریکا ل هەرێما کوردستانێ هەمی ئاسانکاریان دکەن . هەروەسا جێگرێ وەزیرێ دەرڤە یێ ئەمریکا گۆت : کۆمپانیێن ئەمریکا دشێن ل هەمی کەرتێن جودا جودا هاوکاریا ڤەژاندنا ئابوریا هەرێما کوردستانێ بکەن .