نێچیرڤان بارزانی وەک سیاسەتمەدارەک دناڤ پارتی دیموکراتی کوردستاندا ، ھەردەم جھێ باوەریا زۆر خەلکێ کوردستانێ بوویە ، پشتی دناڤ حکومەتا ھەرێما کوردستانێ ژی پۆستێ جێگرێ سەرۆکێ حکومەتێ و پاشان سەرۆک حکومەتێ وەرگرتی ، ئەڤ باوەریە زێدەتر بوو ، ژبەکۆ کارێن نێچیرڤان بارزانی یێن سیاسی و کارگێری و ئابووری بۆ خزمەتا وەلاتیان دبێ سنوور بوون ، ھەردەم نێچیرڤان بارزانی پەناگەھا ھەژار و بەلەنگازا بوویە .
لسەر ئاستێ نشتیمانی ژی لسەر دەستێ جەنابێ وی سەرکەفتنێ، مەزن ھاتینە تۆمارکرن و پێشڤەچوونێن مەزن بخۆڤە دیتی نە ، پشتی ھەلبژاردن و سونن خارنێ ژی وەکی سەرۆکێ ھەرێما کوردستانێ ، شێوازێ رێورەسمێن سۆند خارنا جەنابێ وی وێ بەرھەڤی و پشتەڤانیا نافخۆیی و ھەرێمی و نیڤ دەولەتی ئۆمێدا خەلکێ کوردستانێ ب نێچیرڤان بارزانی وەک سەرۆکێ ھەرێما کوردستانێ زێدەتر کر .
پەیڤا چەند خۆلەکی یا سەرۆکێ نوو یێ ھەرێمێ پشتی سوند خارنێ ، پلان و بەرنامە و ستراتیژیەکا دارشتی بۆ چار ساڵێن داھاتی ھاتە دیارکرن ، پەیڤەکا چەندین رەھەندی بوو ژوانا ، چەسپاندنا دیموکراسیەتێ و رێزگرتن ل دید و بۆچوونێن جودا ، ھەر وەکی سۆپاسیا ھەردوو بەرەیێن دەنگ پێ دایی و دەنگ پێ نەدای ، ئەڤەژی نیشانێ ھندێ یە کۆ نێچیرڤان بارزانی سەرۆکێ ھەرێما کوردستانێ کەسەکێ دیموکراتخواز و رێزێ ل بیر و بۆچوونێن جودان دگریت و لدەمێ سەرۆکاتیا خۆدا ب گیانەکێ کوردستانیا نە دێ سەرەدەیێ دگەل ھەمی لایەنان دکەت و کار بۆ بەرفرەھترکرنا دیموکراسیەتێ و ئازادیا ھزر و بیرا کەت .
ژلایەکێ دی بەحسێ ژبیرنەکرنا روودانێن خوش و نەخۆش ، یێن دوور و نێزیک کری ، ئەڤەژی نیشانێ ھندێ یە ، جەنابێ وی لدەمێ سەرۆکاتیا خۆدا دێ ھەوڵێن جددی دەت ، مفای ل سەربۆرێن دیرۆکی وەرگریت ، بۆ دووبارەنەبوونەڤا روودانێن نەخۆش یێن کۆ مللەتێ مە پێ ھاتینە ئێشاندن و برینداربوون وەک شەرێ داعش و ھەولێن جەنابێ وی دێ بۆ بەختەوەریا خەلکێ کوردستانێ بن و خەلکێ زەرەرمەند و قربانیدەر ناھێنە ژبیرکرن و دادوەریێ دێ چەسپینیت و ڕەش و سپی لێک ھێنە جوداکرنر .
پەسنا جەنابێ سەرۆک مەسھود بارزانی ژی نیشانێ ھندێ یە ، کۆ جەنابێ سەرۆک نێچیرڤان بارزانی درێژەپێدەرێ سیاسەتا جەنابێ وی یە نەخاسمە بۆ بەرھنگاربوونا تیرۆرێ و ڤیان پێشمەرگەھی و پاراستنا ھەرێما کوردستانێ و بەرفرەھتکرنا دەسکەفتێن نەتەوی و نشتیمانی برەنگەکێ ئاشتیانە .
پویتەپێدان ب پەیوەندی و ھەڤکاریێ دگەل عیراقێ و دەڤەرێ و جیھانێ ، پشکەکا دیترا گۆتارا سەرۆکێ ھەرێمێ بوو ، ئەڤەژی دیار دکەت کۆ جەنابێ شرۆڤەکرنەکا زۆرا باش و ئەرێنی گرنگیا پەیوەندیان ھەیە و دڤان ساڵێن داھاتی لسەر دەستێ جەنابێ وی ئاستێ پەیوەندیێن ھەرێمێ دێ بەرەڤ مۆکۆمتریێ چن بۆ خزمەت و بەرژەوەندیا خەلکێ کوردستانێ .
ل تەوەرەکێ دیکەدا جەنابێ وی گۆت " مە دڤێت دەستێ ھاریکاریێ و ھەماھەنگیێ و پێکڤە کارکرنێ بۆ ھەمی یان درێژ بکەین ، ئەم د قۆناغەکا نازکیا جیاوازیێن سیاسی و جڤاکی دەرباز دبین .
ئەڤەژی نیشانێ کۆمکرنا ئالیێن خودان رەئیێن جودایە بن سەیوانا کوردایەتیی و ئێکرێزیا ئالیێن سیاسی یێن کوردستانێ و جەنابێ وی باوەری ب کۆدەنگیێ ھەیە لسەر پرسێن چارەنڤیسساز و ژلایەکێ دی دژبەریا تاکڕەویێ و خۆ سەپاندنێ یە ، پەیرەوکرنا ڤێ رەنگە سیاسەتێ فاکتەرێ دابینکرنا پشتەڤانیا نیڤ دەولەتی و سازی و رێکخراوێن دیموکراتخواز و جڤاکێ سڤیلن بۆ جڤاکێ کوردستانێ و ھەرێما کوردستانێ ژلایێ سیاسی و کارگێری .
دەربارەی ئاستێ نافخۆیی و سەرۆکێ ھەرێمی د گۆتارا خودا ئاماژە دایە فەرھەنگا سیاسی و میدیایی و ململنێن سیاسی و ........ ، بلا نھو وێڤە ل ھەمی ئاستێن جڤاکی و سیاسی دگەل ئێک کۆک و تەبابین . دیارە جەانابێ سەرۆکێ ھەرێمێ ب گۆری چویە دناڤ پرسێن ئاڵۆزێن جڤاکی و سیاسی یێن کوردستانێ و جەنابێ وی باوەری بخۆ ھەیە کۆ لدەمێ سەرۆکاتیا خۆدا دێ ھەولێن جدی ھاڤێت بۆ چارەسەرکرنا ڤان پرسا و ب دیتنا جەنابێ وی چارەکرنا پرسێن جڤاکی پرسێن سیاسی ژی دێ ھێنە چارەکرن لەوما پەیڤا جڤاکی بەری سیاسی ئینایە . ئەڤەژی دیتنەکا لۆژیکی یە و دووربینا جەنابێ وی یە .
ب ئاسایی زانیا دزانم ململانێ و جیاوازیان ، ژلایێ سەرۆک نێچیرڤان بارزانی ، مۆکۆمیا باوەریا جەنابێ وی یە ل دیموکراسیێ و ئازادیا بیر و بۆچوونان ، ڤەگەریان بۆ ھزرێن چارەسەریا ناکۆکیان ن پانتایەیە کا بەرفرەت ل گۆتارێ ڤەگرتیە ، ئەڤەژی نیشانێ ھندێ یە سەرۆکێ ھەرێمێ دێ ھەمی ھەول و شیانێن خۆ تەرخان کەت بۆ کۆمکرنا ھەمی ئالیان ب سەیوانا وەلاتی ، ئەڤ چەندە رێکا دەربازبوونا پرسا سیاسی و کارگێریا کوردستانێ یە بۆ قۆناغەکا گەشتر و مەزنتر کۆ تێدا ھیڤیێن خەلکێ کوردستانێ بجە بھێن .
( بلا نوونەرێن پێکھاتێن ھەرێما کوردستانێ ، ب ھەمی رەنگێ، جیاواز ، پشکداریێ د ڤەژاندنا ھەرێمێ و بھێزکرنا بنەمایێن بەرڤ پاشەرۆژا مە بکەن ) ئەڤەژی ڤەکرنا دەرگەھێن پشکداریا ھەمی تەخ و چین و ئۆل و ئەتن و کێم نەتەوەێن دیترێن کوردستانێ ل دەسھەلاتێ و رێزگرتنا جەنابێ وی یە لڤان ھەمی یان و دیارە جەنابێ وی نە تنێ پشتەڤانێ وانە بەلکێ بەرەڤانکارە ل ماف و ئارمانجێن وان و یێ بێ شکە کۆ پاشەرۆژا کوردستانێ بەرەڤ گەشەبوون و بەختەوەریێ دچیت .
ب کورتی ئێکەم گۆتارا سەرۆکێ ھەرێما کوردستانێ ، ئۆمێدا خەلکێ کوردستانێ ب وەلاتی و پاشەرۆژا سیاسی و جڤاکی گەشتر و مۆکۆمتر کر و گۆتارەکا کۆرتا ھەمە لایەنە و بڕ ڕامان بۆ و دێ شێین بێژین بەرنامێ کارێ چارساڵێن داھاتی یێن سەرۆک نێچیرڤان بارزانی بۆ خەلکی ئاشکرا بوو .