وه‌رزش ل سه‌ر ده‌مه‌كێ زێرین
کارزان فەقێ
نێچیرڤان بارزانى ل ده‌مێ ده‌ستهه‌لاتا خوه‌دا هیچ ده‌مه‌ك وه‌رزش و وه‌رزشڤانى پشت گوه نه‌خستینه، ب وى ره‌نگى رۆژ بۆ رۆژێ بیاڤێ وه‌رزشڤانیێ د پێشخستن و گه‌شه ك‌رنێ دا بوویه، ل گه‌له‌ك چالاكى و كۆنگره‌ییێن بیاڤێ وه‌رزشێ دا نێچیرڤان بارزانى وه‌كو سه‌رۆكێ حكومه‌تا هه‌رێكا كوردستانێ ل سه‌رده‌مێ كابینه‌یێن ئێك ل دووڤ ئێكێ خوه پشكدار دبوو و پشتگیریا خوه ژ بۆ وى بیاڤى ته‌رخان دكر، ئه‌و پشتگیری ب تنێ د بیاڤێ گوتار و گۆتنێ دا نه‌دما به‌لكو پێشخستنا وى كه‌رتى ب ژماره و داتا وێ یه‌كێ دبێژنه‌مه كو حكومه‌تا هه‌رێما كوردستانێ گوتار و سۆزێن خوه ژ بۆ وه‌رزشڤانان كریه كردار، بۆ نموونه: ب گشتى پشتى سه‌رهه‌لدانێ و تا نها ل هه‌رێما كوردستانێ 88 یانه‌یێن وه‌رزشى هاتینه دامه‌زراندن، پتریا وان ژى ل سه‌ر ده‌مێ ده‌سته‌لاتداریا نێچیرڤان بارزانى بووینه، چونكى به‌ریا سه‌رهه‌لدانى، ئانكو درستر بێژین، به‌ریا نێچیرڤان بارزانى پۆستێن حكومه‌تێ وه‌ربگریت، یانه‌یێن وه‌رزشى ل هه‌رێما كوردستانێ ب تلێن ده‌ستان دهاتنه هژمارتن، لێ نها ژماره‌یێن یانه‌یێن تشته‌ك دى دبێژنه مه، حكومه‌تا هه‌رێما كوردستانێ د ته‌مه‌نێ خوه یێ حكومرانیێ دا پشته‌ڤانیا مادى یا ڤان یانه‌یان كریه و مه‌زاختیا هه‌موو قه‌هره‌مانیا دابین كریه، هه‌ر یانه‌یه‌كێ یاریگه‌هێن تایبه‌ت ب خوه‌ڤه هه‌یه، چار یاریگه‌هێن ناڤده‌وله‌تى ل هه‌رێما كوردستانێ هه‌نه، گه‌له‌ك جاران ئه‌و یاریگه‌هێن ناڤده‌وله‌تى قه‌هره‌مانیێن ناڤده‌وله‌تى ل سه‌ر ئاستێ كێشوه‌رێ ئاسیا و جیهانێ مێهڤانكریه، دناڤ هه‌ر یانه‌یه‌كێ دا جۆرێن تیمێن جودا ژ بۆ فۆتبۆل و باسكت بۆل و ڤۆلى بۆل و گه‌له‌ك جۆرێن دى یێن سپۆرێ هه‌نه، ژبۆ هه‌ر سپۆره‌كێ ژى قه‌هره‌مانیێن جودا ل سه‌ر ئاستێن نایاب و پله ئێك و پله دوو و پله سێ دهێنه‌ڤه‌كرن. هه‌روه‌سا بۆ ئێكه‌م جار ل سه‌رده‌مێ حكومرانیا نێچیرڤان بارزانى دا یانه‌یێن هه‌رێما كوردستانێ شیان ل سه‌ر ئاستێ ئیراقێ ببنه قه‌هره‌مان و پشكدارى قه‌هره‌مانیێن ل سه‌ر ئاستێ كیشوه‌رێ ئاسیا و جیهانێ ژى ببن، بێگومان ده‌ما یانه‌یا وه‌رزشیا هه‌ولێر و دهۆكێ ل سه‌ر ئاستێ خولا ئیراقێ دبیته ئێكه‌م، گه‌له‌ك پشته‌ڤانى ل پشت هێزا وێ یانێ ڤه دیاره، كو ژ هه‌موویان گرنگتر یێ حكومه‌تا هه‌رێمێ كو نێچیرڤان بارزانى سه‌رۆكاتیا وێ دكر، سه‌ره‌راى پشكداربوونا وان د قه‌هره‌مانیێن ناڤده‌وله‌تى ژى.
