ئه‌گه‌ر ب هوورى ته‌ماشه‌ى داخوازى و پێشنیارێن نێچیرڤان بازرانى سه‌رۆكێ حكومه‌تا هه‌رێما كوردستانێ بۆ نه‌ته‌وێن ئێكگرتى بكه‌ین، دێ باش ل وێ یه‌كێ گه‌هین كو ب بجهـ ئینانا وان پێشنیاران دێ بێته ئه‌گه‌رێ ب هێزبوونا پێگه‌هێ هه‌رێما كوردستانێ ل ده‌ڤه‌رێ، چونكىدو ژ وان داخوازیان په‌یوه‌ندى ب هه‌رێما كوردستانێ و ناكوكى و ئاریشه‌یێن وێ ل گه‌ل به‌غدایێ هه‌یه، كو ل دۆر كه‌ركووك و پرسا فیدرالیزما هه‌رێما كوردستانێ یه، ئه‌ڤ هه‌ردوو خالێن ژلایێ نێچیرڤان بارزانى ڤه بووینه پێشنیار، د ده‌ستورێ ئیراقێ دا هاتینه چه‌سپاندن و نه‌ته‌وێن ئێكگرتى هیچ به‌هانه‌یه‌ك نینه كو خوه لێ بده‌ته پاش و بێ ده‌نگیێ هه‌لبژێریت، چونكى هه‌رده‌ما نه‌ته‌وێن ئێكگرتى باس ل چاره‌كرنا ئاریشه‌یێن ناڤبه‌را هه‌ولێر و به‌غدایێ دكه‌ن، ده‌ستورێ ئیراقێ دكه‌نه ناڤبژیكار. هه‌روه‌سا ده‌رباره‌ى هه‌ر سێ پێشنیارێن دى یێن د نامه‌یا بارزانیێ سه‌رۆكوه‌زیر هاتینه ئاراسته كرن، پتر ده‌رباره‌ى رۆل و ئه‌ركێ نه‌ته‌وێن ئێكگرتى یه ل ئیراقێ و هه‌رێما كوردستانێ، ژ وان ژى كو داخازكریه ئاستا كاركرنا نوونه‌راتیا نه‌ته‌وێن ئێكگرتى ل هه‌رێما كوردستانێ بهێته بلندكرن، واته پتر ژ ده‌ما بۆرى چالاكى هه‌بن و ژ هه‌موو روویان ڤه بارێ گرانێ سه‌ر ملێ گه‌لێ كوردستانێ و حكومه‌تا وێ سڤك بكه‌ت، ژلایه‌كێ دى ڤه پێشنیار كریه كه‌سه‌ك وه‌كو به‌رپرسێ كاروبارێن مرۆڤى یا نه‌ته‌وێن ئێكگرتى بهێته دیاركرن، سه‌رۆكێ حكومه‌تێ باش دزانیت ئه‌گه‌ر به‌رپرسێ كاروبارێن مرۆڤی یا نه‌ته‌وێن ئێكگرتى ل هه‌رێما كوردستانێ هه‌بیت، دێ پتر رۆلێ خوه د ناڤا په‌نابه‌ر و ئاواره‌یێن هه‌رێما كوردستانێ بینیت، چونكى سه‌ره‌راى قه‌یرانان، ئه‌ڤ حكومه‌ته سالانه پاره‌یه‌كێ زۆر ژ داهاتێ خوه ل ڤان كه‌مپێن ئاواره و په‌نابه‌ران د مه‌زێخیت كو د راستى دا دڤێت حكومه‌تا ئیراقێ و نه‌ته‌وێن ئێكگرتى ب وێ ئه‌ركێ راببن، ژ بلى ڤێ یه‌كێ ژى نێچیرڤان بارزانى پێشنیار كریه كو بنگه‌ها سه‌ره‌كى یا به‌رنامێ مرۆڤى یا نه‌ته‌وێن ئێكگرتى ل به‌غدایێ ڤه بۆ هه‌ولێرێ بهێته ڤه‌گوهاستن، ره‌نگه ئه‌ڤ پێشنیاره ب دلێ وێ رێكخراوێ ژى بیتن، چونكى هه‌م ئارامیا هه‌رێما كوردستانێ، هه‌م ژى هژمارا زۆر یا په‌نابه‌ران ل هه‌رێما كوردستانێ وه‌كریه بیاڤێن كاركرنێ بۆ وێ رێكخراوا جیهانێ به‌رفره‌هتر بن، ل ڤێرێ بۆمه دیار دبیت كو نێچیرڤان بارزانى ئه‌و سه‌ركرده‌یێ كورده كو د نامه‌كێ خواستیه‌ب هاریكاریا وه‌لاتێن جیهانێ كوردستانێ بهێزتر بكه‌ت و ژیارا په‌نابه‌ر و ئاواره‌یێن ناڤا هه‌رێما كوردستانێ خوه‌شتر بكه‌ت
کارزان فەقێ
