سامانێ ساخله‌میێ به‌ری زێر و زیڤی!!
شێرزاد نایف
مه‌هاتما غاندی چو بۆ مه نه‌هێلایه و نه‌گۆتی، به‌لێ باش بیرا مه ل گۆتنا وی یا راست دهێت ل سه‌ر گرنگیا ساخله‌میێ و كه‌رتێ ساخله‌میێ ده‌مێ گۆتی: ساخله‌می سامانێ دروسته نه‌ك پارچه‌كا زێری یان زیڤی. ئه‌ڤه دهێت ل چالاكیێن حوكمه‌تا مه یا هه‌رێما كوردستانێ یێن سه‌كته‌رێ ساخله‌میێ بۆ ڤه‌كرنا پێشانگه‌ها نیڤه‌ده‌وله‌تی یا ده‌رمانان ل هه‌ولێرا پایته‌خت، هه‌ولێرا ئاڤه‌دان و پێشكه‌فتی و ساخله‌م، ماده‌م لاشێ هه‌رێمێ یێ ساخله‌م بیت، واته مێشكێ ساخله‌مه!!، ئه‌ڤ مێشكێ تووشی هنده نه‌خۆشی و ئاسته‌نگان بووی، سه‌ربۆران كریه سه‌ره‌كێ ساخله‌م مینا دبێژن: مێشكێ ساخله‌م یێ د له‌شه‌كێ ساخله‌م دا. هه‌ر د ڤێ چالاكیێ دا نێچیرڤان بارزانی سه‌رۆكێ حوكمه‌تێ مێشكێ هزركارێ كوردستانێ ئاماژه ب ڤێ راستیێ دا كو هه‌بوونا ئیراده‌كا ب هێزا حوكمه‌تێ بۆ به‌رپێدان و چاكسازی د كه‌رتێ ساخله‌میێ، گه‌شتوگوزار، ساخله‌میا كه‌رتێ گشتی دا بێ به‌رامبه‌ر و جوداهی بۆ هه‌می هه‌ڤوه‌لاتیان كریه. هه‌ژی سه‌رراوه‌ستانێ یه، چونكو چو تشت وه‌كو ساخله‌میێ نینه، به‌ری هه‌یامه‌كێ ژی دیسا بیرا مه ل بیرا هنده‌ك بریارێن وی دهێت ده‌مێ ل سه‌ر ده‌رمان و جۆرێن وان راوه‌ستیای نه‌خاسمه یێن ده‌مسه‌رڤه‌چووی، هه‌روه‌سا سزادانا وان كه‌سێن بازرگانی ب ساخله‌میا هه‌ڤوه‌لاتیان دكه‌ن و ژبیر دكه‌ن كو زارۆیێن وان ژی مرۆڤن و تووشی نه‌خۆشیان دبن، كا ئه‌وان پێ خۆشه زارۆیێن وان ژی ببنه تۆمكێ بازرگانیكرنێ، ئه‌ڤنه هه‌موو ل راده‌یێ وان راوه‌ستاندن و هه‌ر گه‌نده‌لیه‌كا د ڤی بیاڤی دا هه‌بیت نه‌هێلا، ئه‌ڤه ئێكه جهێ خوشده‌روونیا هه‌می هه‌ڤوه‌لاتیان بوو، پێنگاڤه‌كا جهێ رێزێ بوو، چونكو هه‌رێم د دۆخێن نه‌خوازیار دا بوو، شه‌رێ تیرۆرستان ل سه‌ر سه‌رێ مه، قه‌یرانێن مه‌زن تێكچوونا ئابووری و ..هتد. ئه‌ڤرۆ ژی ئه‌و بریار و كریارێن ده‌سپێكی ئه‌ڤرۆ مه‌زنتر لێهات و هه‌ولێر ژبلی بیاڤێن دیتر بوویه جهێ سه‌رنج و ڤه‌كێشانا سازی و رێخراو و لایه‌نێن په‌یوه‌ندار ل سه‌ر ئاستێن نیڤده‌وله‌تی كو ته‌ماشه سه‌ربۆرا هه‌رێمێ بكه‌ن و حه‌سوودیێ پێ ببه‌ن!!، هه‌ر وه‌كو سه‌رۆك نێچیرڤان بارزانی ژی د رۆهنكرنه‌كا گۆتارا خوه دا چه‌ند سه‌رژمێری داین دیاركرن كو رێژه‌یا نه‌خۆشخانه‌یێن حكومی ژ 26 بووینه 76 و بنگه‌هێن ساخله‌میێ ژ 78 بووینه 967. رێژه‌یا قه‌ریوله‌یێن نه‌خۆشان ژ 3731 بلندبوویه بۆ 7805، هۆلێن نشته‌رگه‌ریان ژ 45 زێده‌بووینه بۆ 252، ژماره‌یا نۆشدارن ژ 826 بووینه 6814 و ده‌رمانخانه ژ 48 بووینه 1236 ، كه‌رتێ تایبه‌ت ژی 47 نه‌خۆشخانه ل هه‌رسێ پارێزگه‌هان هه‌ولێر و دهۆك سلێمانیێ هه‌نه. ئه‌ڤه ب زمانێ ژماره‌یان گرۆڤه‌یێن پێشڤه‌چوونا ڤی كه‌رتی یه. هه‌موو ژ سه‌ربۆر و پێدڤیاتیێ ئه‌ڤ كه‌رته چوویه پێش، دوور شاشیێن نۆشداران كو ل هه‌موو دونیایێ یێن هه‌یین، بیرا من ل گه‌له‌ك نه‌خۆشێن پارێزگه‌ها مووسل دهێت، نها هه‌موو یێن قه‌ستا دهۆكێ و هه‌ولێرێ دكه‌ن بۆ ئه‌نجامدانا گه‌له‌ك نشته‌رگه‌ریان، وه‌كو قه‌سته‌رێ و گه‌له‌كێن دیتر. ئه‌ڤه ژی جهێ شانازیێ یه كو ئه‌م هه‌می سه‌رێ خوه پێ بلند بكه‌ین و بێژین ئه‌ڤه ئه‌م كوردین و ئه‌ڤه نیازێن مه‌نه، سه‌ره‌رای نه‌بوونا بۆدجه و مووچه‌یان و هه‌ڤركیا به‌غدا ب خوه ل گه‌ل مه كری، نها ره‌وشا مه باشتره ژ یا وان ژ ئاڤه‌دانی و سیاسی و جڤاكی و ...هتد. ب تایبه‌ت ژی كه‌رتێ ساخله‌میێ نه‌خاسمه وه‌زیرێ ساخله‌میا عیراقێ ب خوه ژی مێهڤانێ ڤێ بۆیه‌رێ بووین, ب چاڤێن خوه یێ دبینیت و ب گوهێن خوه
گوهلێدبیت. دێ بیته زه‌نگه‌ك د بیردانكێ دا، هه‌كه ده‌مه‌ك بهێت و جاره‌كا دی خودێ حه‌زنه‌كه‌ت غه‌دره‌كا دی یا وه‌كو جاران ل هه‌رێمێ و خه‌لكێ وێ بهێته‌كرن، ئه‌ڤه پێشده‌م به‌رسڤێن ره‌نگڤه‌دانن بۆ گه‌ره‌كا پاشه‌رۆژێ. باشتر ژی ئه‌وه بۆ گه‌ره‌نتیكرنێ كو ئه‌ڤ چالاكیه ببیته سالانه وه‌كو سه‌رۆك وه‌زیرێن هه‌رێمێ داكۆكی ل سه‌ر كری.
