ئەوێ کو ئێکەتی وەکو گڤاشتن و کارتەک بخوە ب کار ئینابوو ل سالێن بۆری، پەرنابرنا بەر بەغدایێ ل دەمێن بۆری، ھەروەسا پێشنیارکرنا برینا بۆدجەیا ھەرێمێ ل سالا ٢٠١٤، و راوێژکرن ب سەرەدەرکرنا بەغدایێ ل گەل ھەرێما کوردستانێ وەکو پارێزگەھەکێ ئیراقێ بیت ، واتە وەکو پارێزگەھـێن دی یێن ئیراقێ سەرەدەریێ ل گەل پارێزگەھێن ھەرێما کوردستانێ بکەت و ھەرێم وەکو قەوارە رەت بکەت، تارادەیەکێ ژی نزیکی ئەڤە جھـ بگریت و دەستپێکێ د پرۆژە بۆدجەیا سالا ٢٠١٩ دا ناڤێ ھەرێما کوردستانێ نەھاتبوو، پاشان پشتی سەرەدانێن جودایێن سەرۆک بارزانی و نێچیرڤان بارزانی بۆ بەغدایێ، ئیدی ئەو بزاڤ و ھەولدان سەرنەگرت و گھۆرین د پرۆژەی دا ھاتنە کرن. ھەلبەت ژ بلی ڤانا ئێکەتیێ گەلەک رێکێن دی ژی بکار ئینان، لێ ھەبوونا حکومەتەکا بھێز و خوەدان پەیوەندیێن دبلۆماسی شیان پلانێن کو ل دژی قەوارەیێ ھەرێما کوردستانێ دھاتنە دانان ھەموویان ژناڤ ببەت، کەواتە ئەوا نھا ئەم دناڤبەرا بەغدایێ و ھەولێرێ دا دبینین ب ١٨٠ پلەیان جودایە یاکو ل سەردەمێ حەیدەرێ عەبادی و نووریێ مالکی چێبوون، ھەموو ئەو شاندێن بزاڤ بۆ چارەکرنا وان ئاریشەیان کرین ژی سەرۆکێ حکومەتا ھەرێما کوردستانێ و سەرۆک بارزانی و بەرپرسێن دیارێن پارتی بوون. کو ھەموو لایەنێن سیاسی دبێژن پاشکەفتا مووچەی ستەمەکە ل فەمانبەران دھێتە کرن و پارتی پێ تاوانبار دکەن، پارتی ژی ب ھەمان شێوە ناڤەشێریت و بزاڤێن چارەکرنێ دکەت، کەواتە پارتی خوە ب خوەدانێ ئاریشە و بەرپرسیارێ چارەکرنێ دزانیت. دھێتە بیرامن ل دەما شازدەی ئکتۆبەرێ دەما مە تەماشەی کەنالێن ھەموو حزبێن دی دکر، ئەرکێ وان ببوو چاندنا تۆڤێ بێ ھیڤیبوونێ دناڤ خەلکێ کوردستانێ دا و ل بەرەیێ حەشدا شەعبی رۆمالا ھێرشا سەر کەروککێ و ھێزێن پێشمەرگەی دکرن، لێ ھەر وی دەمی سەرۆکێ حکومەتا ھەرێما کوردستانێ وەلات وەلات د گەریا ژبۆی کو گەلێ کوردستانێ ژ وان دۆرپێچێن حکومەتا ئیراقێ رزگاربکەت، کەواتە کی خوە ب خوەدانێ ھەرێمێ دزانیت و دخەما ناڤ و دەنگیا ھەرێما کوردستانێ یە؟ نھا ئێکەتی ھەول ددەت پرسەکا دی ب ئازرینیت ئەو ژی ئەگەر پارتی دیموکراتی کوردستان د پێکئینانا کابینەیا نوو یا حکومەتا ھەرێمێ دا نەھێتە بن بارێ وان و داخوازیێن وان ب جھـ نەئینیت، ئەو دێ رەوشەکا ئالۆز و نەخواستی ل ھەرێما کوردستانێ دروست کەن کو کارتێکرنێ ل ناڤ و دەنگیا ھەرێما کوردستانێ بکەت؛ ئەڤە بخوە وێ یەکێ دبێژیتە مە کو ناڤ و دەنگیا ھەرێما کوردستانێ واتە ناڤ و دەنگیا پارتی، چونکی ئێکەتی گەھشتیە وێ باوەرێ کو ب تەنێ پارتی ل بەغدا و ل سەر ئاستێ ناڤ دەولەتی نوونەراتییا ھەرێمێ دکەت و ژ بۆ مافێ مللەتێ خوە دانوستاندنێ دکەت، ئالیێن دی بۆ وەرگرتنا پۆستەکی و پێشنیارکرنا برینا بۆدجەیا ھەرێمێ و نە فرێکرنا پارەی بۆ حکومەتا ھەرێمێ و فەرمانبەران ل رێکا بەغدایێ سرایێ دگرن.