دھەلبژارتنێن ڤێ داویێ یێن ھەرێما کوردستانێ دا ھند دروشم و ھوتاڤێن سیاسی ژ ئالیێ ھەمی حزب و لایەنێن سیاسیێن ھەرێما کوردستانێ ھاتنە بلندکر. کو ئەڤە سرۆشتێ ھەلبژارتنانە دگورەپانا سیاسیا ھەر وەلاتەکێ خودان سیستەمەکێ دیموکراسی دا. داکو ب ئەوان ھوتاڤێن سیاسی دەنگێ جەماوەری ب دەستخوڤە بینن بۆ گەھشتن ب دەستھەلاتێ یان خورتکرنا پێگەھێ خۆ و بەردەوامیدان ب خەباتا سیاسی و ئەوێ ئایدولوژیا حزبێ کرییە پەیروپیروگرامێ خۆ دقادا گورەپانا سیاسی دا. ھەروەسا ژپێخەمەتا بەرەڤانیکرن و مانەڤا ئەوێ حزبێ د ئەوێ گورەپانێدا و بەرجەستەکرنا باوەریا جەماوەرێ خۆ بدەستخستنا ھژمارەکا زۆرا دەنگان د ئەوان ھەلبژارتناندا. لێ زۆر جاران ئەڤ ھوتاڤێن ھەنێ ژلایێ ھند حزبانڤە تنێ بۆ خاپاندن و بسەردابرنا جەماوەری و رایا گشتینە. کو ئەو حزب دور ژ ئەتەکێتنێن سیاسی و حزبایەتی سەرەدەریێ دکەت. ب رەنگەکێ دی بێژین ئەو ھوتاڤێن ھەنێ دبنە خالەکا رەش و دیرۆکی د خەباتا سیاسیا ئەوێ حزبێدا. دیسان دێ بنە ئەگەر کو ئەو متمانا ھەی دناڤ جەماوەریدا ژ دەست بدەت. مەبەستا من ل ڤێرێ ئەو چەندە کو ئەڤە نێزیکی شەش مەھانە ھەلبژارتن بداوی ھاتین ھێش دیالوگ و کومبونێن دناڤبەرا حزباندا دبەردەوام ژبوی وێ چەندێ کو کابینەیا نوی یا حکومەتا ھەرێمێ پێک بینن. ھەرچەندە پارتی ژپێخەمەت ھەستکرن ب بەرپرسیاریەتێ و راگرتنا ھەڤسەنگیا سیاسیا ھەرێما کوردستانێ کاردکەت، کو ئەڤ چەندەژی سرۆشتێ پارتی یە، ھەردەم د ھەمی کاودان و دەلیڤێن بەرتەسک و بەرفرەھدا خۆ وەکو بەرپرسێ ئێکێ دزانیت. دیرۆک ژی دیدەڤانێ ئەڤێ گوتنا مەیە. ھەر لسەر ئەڤی بنەمایی پارتی بۆ پێکھینانا کابینەیا نویا حکومەتا ھەرێمێ ھەر ژ دەستپێکێ وەکو سەرکەفتیێ ئێکێ دھەلبژارتناندا دەست ب دانوستاندن و کومبونان دگەل ئالیێن دیترێن سیاسی ل ھەرێمێ کر. ژپێخەمەت پێکئینانا حکومەتا نوی، ھەرچەندە دەرئەنجامێن باش ھەبوون و رێککەفتن دروست بوون دناڤبەرا پارتی و ھەردوو حزبێن دیتر یەکێتی و گوران دا. بەلێ ئەوا جھێ پرسیار و ل سەر راوەستانێ خۆ ڤەدزینا یەکێتی یە ژ بەرپرسیاریەتیا سیاسی و جێ بەجێ نەکرنا ئەوێ رێککەفتنا ل مەھا شوباتێ دروستبوی دناڤبەرا ھەردوئالیاندا. بدیدا من رازی نەبوونا یەکێتی بۆ پێکئینانا حکومەتا نوی یا ھەرێمێ ژ پێخەمەت بدەستخستنا ھند پلە و پوستانە، ئەو پلە و پوستێن کو ب ھێج رەنگەکێ پارتی رازینابیت ببنە پشکا یەکێتی، چونکی پشکا پارتی نە وەکو سەرکەفتیێ ئێکێ د ھەلبژارتنێن بوریدا. ئەڤە ژ لایەکێڤە، ژلایەکێ دیترڤە ل ھەڤنەھتنا یەکێتی دگەل پارتی ژ ئەگەرێ فشارێن ئەوی بالێ ناکوکێ کەڤنەشوپێ یەکێتی یە ئەوێ دژایەتیا پارتی ب ئاشکرایی ل جادەیا سلێمانیێ دکەت. بڤێ چەندێ یەکێتی دێ خۆ ئێخیتە ژێر بەرپرسیاریەتی و فشارێن مەزنتر و مەترسیدارتر. ھەروەسا ھەمی ئەو ھوتاڤێن وێ بلندکرین ل دەمێ ھەلبژارتنان و ئەوێن رۆژانە ژ زار دەڤێ کەسایەتیێن حزبی و پلەدارێن یەکێتی یێ ب رێکا مەدیا و تورێن جڤاکی مە گوە لێ دبیت، ئەو نەشێت بکەتە کریار و دێ ل سەر وێ ب گران راوەستن و ئەو بخوە ژی دێ باجا ئەڤێ چەندێ دەتن چ دور یان نزیک. ئانکو دێ توشی دادگەھا مللەتی بیت ھەروەکی بەریا نھا باجا ئەڤێ چەندێ دای.