ئاکرێ وەکو باژێڕەکێ کوردستانی خوەدی گەلەک تایبەتمەندی یێن دەگمەنە و جھگەھەکێ گرینگێ سیاسی، ئابووری، رەوشەنبیری، کشتوکاڵی و ئاژەڵداری د نەخشەیێ ھەرێما کوردستانێدا ھەیە ، باژێڕەکێ دیرۆکی، کەڤنار و گەشتیاری یە، سەرباری کو دەستپێشخەرێ ئاڤاکرنا ئێکەم سەنتەرێ رەوشەنبیری بوویە ل سەر ئاستێ ھەرێما کوردستانێ کو ل ئێکێ تیرمەھا ١٩٩١ێ پشتی سەرھلدانێ ھاتییە دامەزراندن، و دڤان بیست ساڵێن دوماھیێ دا ژی ئێک ژ تایبەتمەندیێن دی یێن ئاکرێ، کو ھەر ساڵ دەھان ھزار گەشتیارێن عەرەب قەستا سەیرانگەھێن سیپەیێ ئاکرێ و سیپەیێ بجیلێ و کانیزەرک و گەلیێ زنتە و سویلێ و تەکیا شێخ عەبدولعەزیزی و کویسکێ و گربیش و...تد دکەن.
دیسان ھەر ساڵ، لرۆژا ٢٠ێ ئادارێ، دەھان ھزار کەسێن دی قەستا ئاکرێ دکەن، ب مەرەما بەشداربوونێ د کەرنەڤاڵێ ھلکرنا ئاگرێ نەورۆزێ دا، کو ب ئەگەرێ تەبۆگرافییا کەلھا ئاکرێ یا بێ ھەڤتا و گەرم و گۆڕی و ڤیانا بێ سنوور یا گەنجێن ئاکرێ، بۆ ساخکرنا رۆژا نەورۆزێ، نەورۆزا ئاکرێ بوویە ئێک ژ جوانترین و بەرچاڤترین و نەمازەترین تابلۆیێن نەورۆزێ یێن باڵکێش لسەر ئاستێ ھەرێما کوردستانێ و جیھانێ، ب دیدەڤانییا وان ھەموو کەناڵێن راگەھاندنێ یێن ناڤخۆیی و جیھانی، کو ب رومالێن خۆ یێن ئێکسەر و دروستکرنا راپورت و مێزگەرد و دیداران، ناڤ و بانگەک بەرفرەە بۆ نەورۆزا ئاکرێ چێکرییە.
لێ ئەوا من دڤێت بدەمە دیارکرن و بێژم، بۆ ھەموو وان گەنج و لایەنێن داخوازا وێ ئێکێ دکەن کو ئاکرێ ببیتە پایتەختێ نەورۆزێ، و ئەز ژی لگەل وانم، لێبەلێ ب شێوازەکێ دی و دبیت داخوازا من ژ یێن دی جودابیت دچەوانییا پایتەخترکرنێ دا، ھەڤالێن ھێژا، بەری بیست ساڵان ل ١٩٩٩ێ بریارا پارێزگەھبوونا ئاکرێ ل پەرلەمانێ کوردستانێ ھات دەرئێخستن، لێ ھەیا نھا جێبەجێ نەبوویە و ئاکرێ ھەر قەزایە!!، و بۆ پایتەختێ نەورۆزێ ژی پێدڤی یە بەری ڤێ داخازا پڕی سۆز و رەوا بکەین شەنگستەیێن پایتەختبوونێ یێن گەشتیاری ژ مۆتێل و ئۆتێل و شارێن یارییان بۆ زارۆکێن نەورۆزڤان و پارکێن راوەستانا ئۆتومبێلێن وان و پەرجانکرنا کەلھێ و دانانا ھێمایێن ھشیاریێ ومەترسیێ، داکو چ نەورۆزڤان دکەلھێدا نەکەڤنەخوار و تەقەکرن بھێتە قەدەغەکرن، داکو چ گوللە ب سەرێ چ نەورۆزڤانان نەکەڤن، و خودێ نەکەت ببنە قوربانی بێ پلانیێ، بۆ زانین "بێ پلانی ژی پلانە!، لێ دێ دەرئەنجام و دانێن خۆ یێن نەدیار و خراب ھەبن"چونکە داخازکرنا خەلکی بۆ کەرنەڤاڵێ نەورۆزێ بەرپرسیاری یێن یاسایی و ویژدانی دکەڤنە سەر ملێ مە وەکو حکومەت ژ لایەکی و ژ لایەکی دی ئەو بەرپرسیاری لسەر ملێ مە خەلکێ ئاکرێ ھەر ھەموویانە، ئانکو ب دیدا من دێ یا دروست بیت، کو ئەم داخازا بودجەیەکی بکەین و ھانا کومپانیا و وەبەرھێنەران بدەین، کو دچەند ساڵێن داھاتیدا بۆ مە نەورۆزا ئاکرێ بەرەڤ پایتەختکرنێڤە ببەن، ژبەرکو ب کێماسیڤە دڤێت ل پایتەختێ نەورۆزێ "٤-٥" شارێن یارییان بۆ زارۆکان و "٦-٧" مۆتێل و ئۆتێل و (٨-٩) پارکێن گەشتیاری و "٩-١٠" پارکێن راگرتنا ئوتومبێلان و ...تد. ژ پێدڤی یێن دی کو دەلیڤا نڤیساندنا ھەر ھەموویان نینە.
ھەکە ب ڤی ئاوایی نەبیت، ئەڤ داخازە دێ داخازەکا ژ دەرئەنجامێ سۆزێ و دارەکا خرش بیت و چ ژێ چێنابیت، بلا ب دەردێ پارێزگەھبوونا ئاکرێ نەچیتن!، کو لدوماھیێ پێدڤی ب رەزامەندییا حکومەتا فیدڕال بکەت!، بلا مە زێدەتر بێ ھیڤی نەکەن!، چونکە ھەتا ڤێ گاڤێ، نە حکومەتێ، و نە دەولەمەند و سەرمایەدارێن ئاکرآ ب ڤێ حوکومەتێ پارە خرکرین و دەولەمەند بووین، پشتەڤانییا کەرنەڤاڵێ نەورۆزێ نە کرییە، بگرە بۆ زارۆکان شارەکێ یارییان ژی ل ئاکرێ ئاڤا نەکرییە!، و ھەتا ڤێ گاڤێ یێ ب ھیڤییا ھێزۆک و یاریوکێن خودێ خێرا وی بنڤیست خال"شید"ی، کو ل جەژنان زارۆکێن مە تێدا یارییان دکەن و دکەڤنەخوار و بریندار ژی دبن جار جار!.
ب راستی ئەم ھەموو ھەتا ڤێ گاڤێ ژی نەشیاینە کێشەیێن خۆ یێن جڤاکی، دارایی و تاوانکاری ل دادگەھێ ئێکلا بکەین!، و نەشیاینە پڕەقوشک و تەقەیێ کلاشینکوڤان قەدەغە بکەین و پێرابوونان ل ھەمبەر سەرپێچیکاران وەربگرین و رەوانەی دادگەھێ بکەین، داکو سزایێ خۆیێ رەوا وەربگرن، ژبەر گەلەک سەدەم و سەدەمکاران.
ب ھیڤییا وێ چەندێ کو ئاکرێ ببییتە پارێزگەە و پاشان ببیتە پایتەختێ نەورۆزێ ژی و ئەم ھەموو پێکەڤە د باژێڕێ خۆ یێ خۆشتڤیدا ب پارێزگەھێ و پایتەختێ نەورۆزێ بەختەوەر ببین.