ئێک ژ بیرهاتنێن هەردەم زیندى د مێژویا مللەتێ کورد دا ئەوە دبێژن ئادار هەیڤا کوردانە بێى کو پرسیار بهێتە کرن ئایا ئادار بویە هەیڤا مفا وەرگرتن و سەربوران بو مللەتێ کورد؟ ئایا مە کوردان چەند شیایە ئادارێ بکەینە دەستپێکەکا نوى بو ژیانەکا نوى و پشت گوهـ هاڤێتنا ئەوان کەلتور و دیاردەیێن کەڤن یێن کاریگەریێن خراب لسەر مللەتێ مە دروست دکەن..
زوربەی مللەتێن پێشکەفتى یێن جیهانى مێژویێ دکەنە تومارا نڤێسینا بویەر و رویدانێن گرنگ بو هندێ بەردەوام ژلایێ سیاسى و کەلتورى ڤە خواندنا ئەوان بویەران بکەن و بزانن ل کیژان خال و د چ بابەت و رێکەفتن گوهورین د خالێن وان یێن لاواز و خالێن بهێز دا دروست بوینە دیسان، بو دارێشتنا پلانێن دوم درێژ یێن ستراتیژى مفایى ژ سەربورێن خو یێن کەڤن ببینن، بەلێ زور بەداخەوە ل زوربەیا هەلکەفتێن مە ب چەند ئاهنگا پێشەوازیێ ل ئادارێ دکەین و ئەڤ پێشەوازى کرنە چ فەرمى بیت یان لسەر ئاستێ تاکەکەسان بیت.
مە نەشیایە رەخنەیا خو بکەین و چ نەبیت ل دوازدە هەیڤێن سالێ هەیڤەک بو پرسیارکرنێ بیت دگەل ناخێ خو کو بیردانکا مە بو مێژویێ ب زڤرینیت ئایا ئەو قوناغا ئەم نوکە تێدا مە چەند شیایە بکەینە د خزمەتا کێشەیا خودا چ وەکو مروف یان وەکو مللەت.
هەتا کو ئەم رەخنەیا خو نەکەین دەستێ مە نەکەڤیتە سەر برینێن مە ب زەحمەتە ئەم دانپێدانێ ب شکەستن و سەرکەفتنێن خو بکەین، ل ڤێرە د شکەستنا دا ئەم ئێک و دوو سوجدار دکەین ب خیانەتێ بێى کو ئەم دوژمنێ خو ب نیاسین و گەلەک جاران ئەم دبینە کرێگرتى بو پروژێن هەرێمایەتى ل دەڤەرێ هەر ژ سەردەمێ کەڤن و تانوکە، د سەرکەفتنا دا ژى ئەم هەمى خودانین بێى کو ئەم بزانین دێ چەوا ئەڤان سەرکەفتان پارێزین.
وەزیفەتا هەر تاکەکێ د ناف جڤاکى دا ئەوە پێداچوونا خو و مێژوویا خو بکەت تەنها تەماشەکەر نەبیت بو بویەران و وەزیفەتا کەسانێن رەوشەنبیر و ئەکادیمى ژى ئەوە خواندنەکا جودا بو ئەڤان بیرەوەریان بکەن و نابیت وەکو مروڤێن سادە هزربکەن بو هندێ بەرهەمێ وان یێ هزرى ببیتە ژێرخانەک بو زەنگین کرنا هەمى بیاڤێن ژیانا وى خەلکێ ئەو دگەل دژین و دویر نینە هندەک تەخ ئەوان هزران قەبیل نەکەن بەلێ یا گرنگە ئەو هزر بهێنە گوتن و ببنە پروژە و مروڤ خودان هەلویست بیت ل سەر وى پروژێ مروڤى باوەرى پێ هەیى و یێ ئامادە بیت قوربانیێ پێناڤ بدەت بو هندێ دەرئەنجامێن وێ د خزمەتا مروڤایەتیێ دا بن.
گرنگ نینە ئەم نیشا بەرەبابێن داهاتى بدەین کو فلان سالێ خیانەت ل مە هاتە کرن لێ گرنگە ئەو بخو دوژمنێن خو ب نیاسن چ ل نافخو یان ژ دەرڤە تاکو دوبارە بوونا ئەوێ خیانەتێ نەبیتە کارەسات بو جڤاکێ وی سەردەمى دیسان دڤێت مە ئامادەکاریێن خو هەبن کو دگەل گورانکاریێن جیهانێ ب رێڤە بچین نەکو تازە هزر ل پروژێن خەلکى بکەین بەلکو ئەم ژى خودان پروژە بین.
ل قوناغێن پشتى سەرهلدانا پیروز مللەتێ کورد بەردەوام ئادار وەکو هەیڤەک بو خوشى و نەخوشیێن خو پێناسەکریە بەلێ مە نەشیایە بکەینە هەیڤا بریارا کوردان کو بەرەف ئاراستەکا باشتر و و خالێن مێژویی یێن گەنى یێن ب سەرێ مە هاتین ب هاڤێژینە د مەزبەلا مێژویێ دا و دەست ب ژیانەک نوى بکەین، حکومەتا هەرێمێ گەلەک گرنگى دایە ئەڤێ چەندێ بەلێ میکانزمێن جێبەجێ کرنا وێ ل ئاستێ پێویست نەبویە و بەردەوام کوسپ و ئاستەنگێن مەزن هەمبەرى حکومەتێ هەبوینە تایبەت ژلایێ سیاسى ڤە.
لەورا ژمە دهێتە خواستن ئەم ئادارێ بکەینە هەیڤا پێداچوون و ریفورما سیاسى و جڤاکى و رەوشەنبیرى بو هندێ د ئایندەیى دا ئارمانجێن ئادارێ بومە رونتر بن.