ڕۆژا ڕەش و کـارەسـاتـا دلتـەزین و ب خـەم و ژان و ژبیـر نەکری تـایبـەت بۆ زاخـۆ و زاخۆیان ب هەمی هوز و خەلکێ ئاکنجیێ زاخـۆ، ل رێککەڤتی (۲۷)ی شۆباتا ساڵا (۱۹۹۵)ێ ل باژێرێ شورەشگێر و خزمەتکار و پیشەنگێن کوردینیێ و مەردە مێران و مێرخاسان زاخـۆکـا دەلال ل ناڤا بازارێ گشتیێ زاخـۆ و ل بازارێ پـارە گـوهـورا/سیکا دوڵاری کو ب جهەکێ تێر مرۆڤ و قەرەبالغ بوو، خەلک مژیلی کاروبارێن ڕۆژانە بوون و مژیلی کرینا کەل و پەل و پێدڤیاتیێن جـەژنـێ بوون و چەند رۆژەک ما بوون بۆ جەژنا ڕەمەزانا پیرۆز؛ لێ د دەمەک نەچاڤەرێکری و دەستێ پیسێ تیرۆرێ گەهشتە ڤی باژێری و ئـوتـومبێلـەکـا پری ماددەییێن تەقەمەنی TNT کری ل ناڤ بازارێ پارە گوهورا دپەقیــت، د ئەنجامێ وێ پەقین و کریارا تیرۆریستی دا نێزی (۱۰۰) کەسێن سڤیل و بێگونەهـ‌ شەهید دبن ژ زارۆک و گەنج و پیروکالان ب هەر دوو ڕەگەزان ڤە و زێدەتر ژ (۱۵۰) کەسان ژی بریندار دبن، جهێ بوویەر و کارەسات لێ هاتییە روودان هاتە کاڤلکرن و وێرانکرن ، ژبلی زیانێن گیانی یێن مەزن زیانێن مادی و سامانی ژی زۆر زۆر هەبوون .. ئەو جەژن لبەر دلێ خەلکێ زاخۆ کرە تازی و شینی و گری و زێمار.

دیرۆکا کوردان پرە ژ کومکۆژی و ئەنفال و کیمیا بارانکرن و قرکرن و کارەسات و روودانێن مەزن، هەلبەت ئەڤ کارەساتا مەزن ژی دهێتە هژمارتن ئێک ژ مەزنترین و دلتەزیترین ڕوودانێن خوێناوی و پری قوربانی؛ چونکی دئێک ڕۆژ دا زێدەتر (۲۵۰) کەسان و دئێک جهـ دا شەهید و بریندار دبن .. دۆژمن و نەحەزان ئەو جهـ وەکی کوشتـارگـەهـ و قەسـابخـانـەکـێ لێ کربوو! دەمێ کەسێن ل وێ بوویەر و روودانێ ئامادەبووین و بۆ مە جیلێ نوی ڤەدگوهێزن تایبەت دەمێ باس ل لاشێ وان شەهیدان دکەن و ببوونە پارچە پارچە و پارچەیەک ل فلان جهی و پارچا دی ل فلان جهێ دی بوو! بێهنا گۆشتی و جوبارێن خوینێ د هەرکین، دبێژن هندە کەس ل مالەکێ یان بنەمالەکێ یان گوندەکێ بتنێ بوونە قوربانی، کومکرنا لاشێن شەهیدان دکەن و بۆ سەر خابیری و شووشتنا وان یان باس ڤەگوهازتنا وان بۆ نەخۆشخانێ و برینێن بریندار دکەن، گرین و زێمارا خەلکی ... هتد، ب دەهان چیروکێن راستیێن پری خەمناک و تراژیدی و ب ترس دهێنە بیهستن؛ ب راستی دەمێ مە گوهـ ل ڤێ روودانێ و چیروکێن راستیێن ڤێ بوویەرێ دبیت هەست ب ئازار و دلتەنگیێ دکەین و وێنە و دیمەن و فلمێن تراژیدی و ب ترس و سەهم دهێنە پێش چاڤێن مە.

ئەڤە بۆ وژدانا دۆژمن و نەحەزان بۆ گەلێ مە بگشتی و تایبەت باژێرەکێ وەکی زاخۆ ستراتیژی و پرە ژ هەستێن کوردایەتیێ و شورەشگێریێ، پەیام و دیاریا تیروریست و دۆژمنا یا جەژنێ بوو! .. هەلبەت ڕوودانەکا ژبیر نەکرییە بۆ کوردستانێ و تایبەت باژێرێ زاخۆ و خێزانێن سەربەزێن شەهیدان و بریندارێن ڤێ کارەساتا پری خوێناوی، هێشتا دلێن خەلکی ئارام نەبووینە ..فەرە ئەم خوشی و نەخوشیان دا هوشیارتر بین و ب دەنگەکێ بڵند پێکڤە بێژین بەلێ بۆ ئێکرێزی و ئێکدەنگیا پارتێن کوردستانا باشوور و بکەینە کریار، ب هەڤرایی د خزمەتا دەزگەهێن خوە یێن ئەمنی دا بین ژبۆ کوردستانەکا بهێز و ئارام و هەرێم و باژێرێن خوە بپارێزین ژ ڤان کارێن پیسێن چەپەلێن هۆڤانە.
هەر کەسێ خوەدی وژدان بیت فەرە نەفرەتان ل تیرورێ و بکەرێن وێ بکەت و نەعلەت باران بکەن، سـەرشـووری و روورەشـی و شکـەستـن بـۆ تیروریسـت و دۆژمنێـن کـورد و کـوردستـانـێ یە و سـەربڵنـدی و رووگـەشـی و سـەروەری و سـەرکـەڤتـن بـاهـرا گـەل و وەلاتـێ مـە یـە، هـزاران سـلاڤ لسـەر گیـانێ پـاکژێ شـەهیـدێـن کـارەسـاتـا دلتـەزینـا (۲۷)ی شـۆباتـێ و هـەمـی شـەهیـدێـن پـاراستن و رێکـا ئـازادکـرنـا کوردستـانـێ بـن.