بدرێژاھیا دیرۆکا مللەتێ کورد ب ھەمی قوناغ وکاروانێن وێڤە و نڤش بۆ نڤشی باس ل نەبوونا ئێکرێزیا مللەتی مە دھێتەکرن. ئەڤ چەندا ھەنێ ژی ژ ڤالاھیەکێ نەھاتییە. بەلکو راستیەکا حاشا ھەلنەگرە، ئەڤجا چ ژ ئەگەرێن ناڤخویی یان یێن دەرەکی بیت ئەوێن دوژمنێن مللەتێ مە ئیناینە بسەرێ مە. دڤان قوناغان دا ھەر جار کەسەک یان چەند کەسێن خاک دوست و بەرژوەندخوازێن مللەتێ کورد دەرکەتینە د گورەپا کوردایەتێدا، باس ل ئاشتەواییا نشتیمانی و ئێکرێزیا مللەتێ دھێتەکرن. بۆ میناک ئەگەر دوھی (ئەحمەدێ خانی و حاجی قادرێ کویی و بەدرخان بەگ و شێخ مەحمودێ حەفید و عەبدولسلامێ بارزانی و بارزانیێ نەمر..... ھتد.) باس ل ئێکرێزی و یەک دەنگیا کوردان ل ھەمی کوردستانێ کربیت. د ئەڤرۆکەدا نڤشێن ژیرمەندێن وان دگورەپانێدا د لەیزن مینا: (رێزدار نێچیرڤان بارزانی) کو بدرێژاھیا تەمەنێ خۆ ھەردەم خودان ھەلویستێن نشتیمان پەروەر وێرەک و بێ میناک بوویە. دوماھیک ھەلویستێ جەنابێ وی ئەو بوو، کو بەریا دوو رۆژان ب دەنگەکێ بلند و دیادەکا پیرۆزدا ب ئاشکرایی بانگی ھەموو ئالیێن سیاسیێن ھەرێمی کر بۆ ھەستکرن ب بەرپرسیاریەتییا نشتیمانی، ژپێخەمەت پاراستنا ئەڤان دەستکەڤتێن دیرۆکیێن مللەتێ کورد بدەست خستین. کو ئەم ھەمی پێکڤە ببینە چەپەرێن بھێز بۆ یەک دەنگی و یەک رەنگی و یەک رێزیا مللەتێ کورد. داکو ئێدی کاروانێ مللەتێ کورد سەرەداڤکێن ھەبوونا کییانەکێ کوردیێ بھێز د رۆژھەلاتا ناڤیندا و ل سەر ئاستێ جیھانێ ھندا نەکەت. پێگیربوونا ھەمی ئالیێن سیاسیێن ھەرێمێ ل ھەمبەر دیڤچونا بانگەوازیا (رێزدار نێچیرڤان بارزانی) وەکو سەرۆکێ حکومەتا ھەرێما کوردستانێ بو پێکھینا حکومەتا داھاتیا ھەرێما کوردستانێ. دێ ھێز و شیانەکا دی دەتە کاروانێ خەباتا سیاسی و کوردایەتی و نشتیمانپەروەریا مللەتێ کورد. دەلیڤە بۆ دوبارەبوونا رویدانێن مینا ١ شواتێ دروست نابن؛ دیسان د ئەڤرۆکە دا ھەرێما کوردستانێ پێتڤی ب ھەبوونا ھێزا نشتیمانیا ئێکگرتییە. ھەروەکی مەدیت بەریا نھا ل بەغدا چەوا یەک رێزی و یەک دەنگیا حزب و ئالیێن سیاسیێن کوردان مەزنترین دەستکەفت بۆ گەلێ کورد ل بەغدا بدەستڤە ئینا. ئەگەر ئەو یەک رێز و یەک دەنگی دناڤ کوردستانێدا بھێتە ھەبوونێ، گومان تێدا نینە کو ئێدی دێ ھەمی ئەو کەس و ھێز و ئایدولوژیایێن کاردکەن، بۆ دروستکرنا دووبەرەکی و نەئێکگرتنا گەلێ کورد بتایبەت ل باشورێ کوردستانێ و بتایبەترژی دناڤ حزب و ئالیێن سیاسی دا دێ خەونێن وان لگورنێن. ھەستکرن ب ئەڤێ یەک رێزیێ ئەوپەری ھەڤسوزی و ھەڤخەمیا جەنابێ (رێزدار نێچیرڤان بارزانی)یە خویا دکەت، بۆ بەرژەوەندا گشتیا مللەتێ کورد. ئەڤجا گرنگ نییە ئەڤ ھەلویستە ل سەر کیژان ژ ئاستێ تاکی و حزبی و میری بیت. دیسان ژ ئالیەکێ دیترڤە، ل ھەڤ نەھاتنا ئالیێن سیاسیێن کوردستانێ ل سەر پێکھینانا حکومەتا داھاتیا ھەرێما کوردستانێ یان دروستکرنا ئاستەنگیان د بەرژەوەندا گشتیا گەلێ کوردستانێدا نینە. لەورا ھەر ئالی و لایەنەکێ حزبی ئەڤرۆکە ئەگەر خوە ڤدزیت ژ ئەڤی ھەلویستێ کوردایەتی، گومان تێدا نینە ئەو دێ کەڤنە بەر رەخنەیێن نڤشێن داھاتی و دیرۆک دێ لێپرسینێ ژ وان کەت. چونکە ئەو یێ دبەرژەوندا دۆژمن و نەیارێن مللەتێ کوردا کاردکەن.