فەتوا بۆ ھەوە !؟ پێکڤە ژیان بۆ مە. !؟
​عێراق ئەو وەلاتێ ب درێژاھیا دیرۆکێ خوەدی پێگەھەک مەزنێ فرە نەتەوەیی و ئولی و مەزھەبی، بەردەوام ئەڤ پێگەھێ ھەنێ دکەڤیتە ژێر فشارا ترس و گەڤێن مەترسیدار ب تایبەت ل باشورێ عێراقێ نە ئارامیا ئولی مەزھەبی سەروسیمایێ ئەڤان دەڤەران بەرنەداینە، بەلکو بەردەوام ئەڤ گەڤ و ترسە رۆژ بۆ رۆژێ ب ئاشکرایی دیاردبن بگرە لسەر جادا و کولانێن وەلاتی تا دگەھیتە مینبەرا ئاینی. نەمازە د بوونە و ھەلکەفتێن ئولی و جڤاکیدا. فەتوایا موفتیێ عێراقێ ژی ل رۆژێن بوری باشترین گروڤەیە بۆ سەلماندنا ئەڤی کەتوارێ تژی ژ قرێژا تایڤەگەری ئولداری. بەرۆڤاژی ئەڤی کەتواری، ئەگەر ئەم بەرێ خۆ بدەینە ھەرێما کوردستانێ د چارچوڤێ ھەمان عێراقدا، دێ ھەست ب جوداھیەکا مەزنا کەلتورێ پێکڤە ژیانا ھەمەرەنگ ل ھەرێما کوردستانێ کەین. دبیت ھەبوون و بەرجەستەبوونا ئەڤی کەشێ ئارامێ ئازادیا ئایدولوژی و ئولی و نەتەوەیی ب ھەروە نەھاتبیتە ھەبوونێ. بەلکو ئەگەر ب ئەوێ ھوشیاریا کەلتورێ پێکڤە ژیانێ نەبا ئەوا د ماوێ بوری دا حکومەتا ھەرێمێ ب ھەمی سێکتەرێن خوڤە کار بۆ کری، نەمازە ژی ل سەردەستێ رێزدار نێچیرڤان بارزانی کو ھەمی ھەول و گاڤێن جەنابی وی بۆ نەھێلانا کەلتورێ توندوتیاژیا ئولی و مەزھەبی و نەتەوەیی بوون. بڤێ گاڤا گرنگ جەنابێ وی شیا ئاشتەوایا نشتیمانی بەرھەم بینیت، کو ئەڤ وەلاتە ب بیتە وەلاتێ ھەمی تاکێن تێدا دژین و ھەست بکەن وەلات وەلاتێ وانە. وە ئەڤێ چەندێ حەتا دبوراێ ئیداریژدا رەنگڤەدا ل سەر ئاستێ پوستێن بلندێن حکومەتێ ھەتا دگەھیتە نزمتریت پوستێ ئیداریێ حکومی، بۆ نموونە ئەڤرۆکە ل ھەرێما کوردستانێ سەدان برایێن ئێزدی و مەسیحی و کلدان و ئاشوری پوست و پلە و پایێن جودا جودا وەرگرتینە ب ئازادانە کارێ خو برێڤە دبەن دور ژ ھیچ ئاستەنگی و گرفتاریەکێ. ھەروەسا دبوونە و ھەلکەفتێن ئولی و جڤاکیدا، ھەمی پێکھاتێن کوردستانێ بێ جوداھی پشکداریێ دئەڤان بوونە و ھەلکەفتاندا دکەن. ب واتایەکا دیتر ل کوردستانێ دەنگێ ئاوازێَن سەبەقە و ئەقوال ئێزیان و دەنگێ ئاوازێن ناقورا کلێشتە و دێران و بھەڤرا دگەل دەنگێ بلندگویێن مزگەفتان و تێکھەل دبن. دویر ژ فەتوایێن ئاینی و کەسوکیێن بەرتەسک. بێگومان ھەبوونا ئەڤێ ئەزموونا بێ میناک ل ھەرێما کوردستانێ، ڤەرێژا ھزرو خامەیێ کەسایەتێەکێ لێزانێ سیاسیێ بەرھەمدارە، کو دەرچوویێ قوتابخانەیەکا مەزنا رێبازگەریا پێکڤە ژیانێ یە، ئەوژی قوتابخانا بارزانی و پارتیە. ژبەر ئەڤێ مەنھەجیەتا پیرۆز ئەم دبیژینە موفتیێ عێراقێ مە ئاگەە ژ فەتوایا ھەوە نەبوو. چونکی ئەم ل کوردستانێ دژین ئەرکێ مە چاندنا توڤێ کەلتورێ پێکڤە ژیانێ یە و و ھین ل عێراقێ دژین کو ئەرکێ ھەوە چاندن و بەلاڤکرنا کەلتورێ توندوتیژیێ و دوبەرەکیێ یە. ب رامانەکا دی ھین ل وێ عێراقێ دژین ئەوا ماسکێ توندوتیژیا ئولی و نەتەوەیی و مەزھبی کریە بەرخۆ، نەمازە دئەڤان چەند سالێن بوریدا کو ل دویڤ ئامارێن بەردەستێن رێککخراوێن NGO، ئێک ژ خراپترین وەلاتێن جیھانێ یە، کو توندوتیژیا ئولی و نەتەوەیی تێدا ب رێژێن ھەری بلند دیاردبن. بەرامبەر ئەڤێ چەندێ ل دویڤ ئامارێن ھەمان رێککخرا و ل ھەرێما کوردستانێ کێمترین رێژا توندوتیژیا ئولی و نەتەوەیی کو جھێ ئاماژەپێکرنێ نینە دھێنە دیارکرن. ئەڤەژی ھەمی بەرھەمێ رەنج و ماندیبوونەکا سەرسەختا خودێ رێزدار نێچیرڤان بارزانی و ھەمی لایەنیێن دیترێن ھەڤپشکێن حکومەتێنە ئەوێن ھەڤ ھزر و ئایدولوژیا. لەورا ئەم دبین کو رۆژانە شاندێن بلندێن دبلوماسی ل سەرانسەری وەلاتێن جیھانێ سەرا ھەرێما کوردستانێ ددەن و ھەست ب ئەڤی کەشێ ئارام و کولتورێ پێکڤە ژیانێ ل ھەرێما کوردستانێ دکەن و پەسنا وێ ژی دکەن. وەکو میناکێ جڤاکێن پێشکەفتی و دیموکراس و ئەزموندار دوارێ دەولەتداریێ دا.