باژێرێ زاخۆ ئێکە ژ وان باژێران کو مرۆڤ تێدا هەست ب سەربلندیێ و سەرفرازیێ و ڕووگەشیێ دکەت، چونکی زۆربەیا هەرە زۆرا رۆژێن ساڵێن بووری و د دیرۆکێ دا زاخۆ پیشەنگ بوویە د خزمەت و قوربانیدانێ دا و سەربلند بووینە .. ئەم زاخۆیی سەربلندین ب رابردوویێ خۆ، سەرفرازین ب شەهیدێن خۆ، بەردەوامین لسەر دلسۆزی و دلسۆژی و وەفاداری و خەبات و تێکۆشینێ گەهشتن ب سەربەخۆیێ ..

ب بریارا و چاڤدێریا سەرۆک بارزانی لەقا هەشتا پارتی دیمۆکراتی کوردستان و نڤێسینگەها ڕووشنبیری و راگەهاندنا لەقێ ڕابوون ب ساخکرن و بیرئانینا سێزدە شەهیدێن ئەندامێن رێکخستیێن نهێنیێن پارتی دیمۆکراتی کوردستان و رێزەکا مەزن و تایبەت لێ هاتە گرتن ...

هەژییە بێژین ئەڤ بیرەوەری و بیرئانین د دوو رۆژان دا هاتە ساخکرن و بیرئانین، ڕۆژا ئێکێ ل رێکەڤتی ۲۰۱۸/۱۲/۹ ب هه‌لكه‌ڤتا بوورینا سیـهـ و ئێك سالان ل سه‌ر شه‌هیدبوونا هونه‌رمه‌ندێ شێوه‌كار (سه‌لمان ئیسماعیل) و دووانزده‌ هه‌ڤالێن وی رێڤه‌به‌ریا رووشه‌نبیرى و هونه‌رى ل زاخۆ ل ژێر چاڤدێریا بەدێز (د.عه‌لى ته‌ته‌ر) ئه‌ندامێ سه‌ركردایه‌تى و به‌رپرسێ لقا هه‌شت یا پارتى دیمۆكراتى كوردستان، ب به‌رهه‌ڤبوون ئامادەبوونا هژماره‌ك ژ به‌رپرسێن حزبى و حكومى و خەلک و جەماوەرێ دەڤەرداریا زاخۆ، پێشانگه‌هه‌كا شێوه‌كارى بۆ هونه‌رمه‌ند (م.كه‌لحى نه‌عمه‌ت) ل هۆلا گه‌له‌ریا زاخو هاته‌ ڤه‌كرن، نمایشکرنا چەندین وێنە و تابلویێن سەرەنجراکێش ..
هەژی ئاماژەکرنێیە ئەڤ ۱۳ کەسێن شەهید پێکهاتبوون ژ شێرەژنەکێ و دووزادە زەلامان ب تەمەنێن جودا جودا، هەر ۱۳ شەهید ئەندامێن نهێیێن رێکخروا (باوەر) بوون یا پارتی دیمۆکراتی کوردستان و سەر ب لیژنا ناڤچا زاخۆ ڤە بوون، کارێ وان گەهاندنا دەنگوباسێن ناڤ شورەشێ بوون بۆ ناڤ باژێری و دەرڤەی باژێری ب رێکا بەلاڤوکان و رێکێن دن ، هەروەسا کووم دبوون و جهێن نهێنی ڤەشارتی هەبوون بۆ ڤەشارتنا چەکێن خۆ پێدڤیێن وی دەمی و چالاکیێن خۆ دکرن .. پشتی ئاشکەرا بوونا ڤان ئەندامێن نهێنیێن پارتی هاتنە دەستەسەرکرن، هەر سێزدە هاتنە زیندانکرن و ب درەندەترین شێوە هاتنە تەعزیبدان و ئەشکەنجەدان ژ لایێ ئەمنا ڕژێما بەعس و پاش بریارا سێدرەدانێ و گول لە بارانکرنێ بۆ دەرچوو.

رۆژا دوویێ ل رێکەڤتی ۲۰۱۸/۱۲/۱۰ ل سه‌ر بریار و راسپاردا به‌رێز (سەرۆک مه‌سعود بارزانى)، لقێ هه‌شت یا پارتى دیمۆكراتى كوردستان د رێوره‌سمه‌كێ ژ هەژی دا ل دەمژمێر (۱۰:۰۰) سپێدێ، ب به‌رهه‌ڤبوونا هژماره‌كا به‌رپرسێن حزبى و حكومى و کەس و کارێن شەهیدان و خەلکێ دەڤەرێ رێز ل سێزده‌ شه‌هیدێن ده‌ستێ رژێما به‌عسا دیکتاتۆر گرتن، په‌یكه‌ره‌ك ژى بۆ شه‌هیدا شێرە ژنا قەهره‌مان شەهید (قومرى ئیسماعیل حاجى) هاتبوو دروستکرن و ل جادەیا گشتی ل زاخۆ و سێریانا سێمالکا بەرامبەر ئاڤاهیێ دەڤەرداریا زاخۆ هاتە دانان په‌رده‌ ل سه‌ر هاته‌ لادان ..
هه‌روه‌سا ل هۆلا رێڤه‌به‌ریا ڕووشه‌نبیرى ل زاخۆ ل دەمژمێر (۱:۰۰)سپێدێ ئەڤ سالرۆژ و بیرئانینا ڤان قەهرەمانا ب چەندین پەیڤ و برگەیان هاتە ساخکرن، ل دەسپێکێ خێرهاتن و دەقەیەکا ڕێزگرتنێ دگەل خواندنا مارشا نەتەوی، پاشان (د.عه‌لى ته‌ته‌ر) به‌رپرسێ لقا هه‌شت یا پارتى په‌یڤه‌ك پێشكێشكر، تێدا ئاماژه‌ ب رولێ كاریگه‌رێ خزمه‌تا سێزده‌ شه‌هیدێن باژێرێ زاخو كر، كو ژناڤ وان شه‌هیدا قومرى ئیسماعیل ب مینا له‌یلا قاسما دووێ و خانزادا بەهدینا ناڤکر، هەر دووازدە شەهیدێن زەلام ب دووازدە سوارێن بەهدینان ناڤکر، ب درێژى ژى به‌حس ل چالاكیێن وان یێن نهێنى و پارتایه‌تى و نه‌ته‌وایه‌تى كر، پاشان چەند هۆزانەک ژی هاتنە خواندن، پاشان فیلمه‌كێ دیكیومێنتارى ل سه‌ر ژیانا وان شه‌هیدان هاته‌ نمایشكرن، ل دووماهیێ خەلات لسەر هەر ۱۳ بنەمال و کەس و کارێن شەهیدان هاتنە دابەشکرن ..

ناڤێن شەهیدێن ئەندامێن رێکخستیێن پارتی دیمۆکراتی کوردستان ل سالا ۱۹۸۷/۱۲/۱۰ێ یێن هاتینە سێدارەدان و گول لە بارانکرن(( قۆمری ئیسماعیل حاجی، شەعبان عەبدولعەزیز ئەحمەد، حێول مشو محو، تەها خەلیل رەشید، محمەد ئەمین شەفیق، سەگڤان خالد عەلد عەلی، عەلو حاجی ئەحمەد، ئەردەوان عەبدوللا عەلی، سمو سمو عەمەر، رەمەزان محمەد محو، تەحسین سالح فارس، حاجی عەلی حاجی، سەلمان ئیسماعیل شەرەف)) سەرێ رێز و نەوازشێ بۆ سەرجەم شەهیدان دچەمینین، ب هزران سلاڤ لسەر گیانێ پاکژێ وان و تەڤا شەهیدێن رێیا ڕزگارکرن و پاراستنا گەل و وەلاتی بن، سەر کاروانێ وان بارزانیێ نەمر و کاک ئدریسێ هەر دەم زیندی.