پارت ئانکو گروپەکێ کەسان کو لدوور ئایدولوژیەت یان هزرەکا دەست نیشان کرى کوم دبن و بەردەوام پێکڤە کار بکەن ژ پێناڤ هندەک ئارمانجێن دەست نیشان کرى تاکو ب گەهنە دەستهەلاتا سیاسى، چەمکێ (پارتێن سیاسى) بو گشت جورێن پارتان دهێت ب هەمى دابەش بوونێ خوڤە یێن ئەکادیمى، دەربارەى علمانیەتێ وەکو پرەنسیپ لسەر جوداکرنا حکومەت و دەستهەلاتێ یە ژ دینى، ئانکو ئاین بابەتەکێ جودایە ژ پروسێسا کوحکمرانیێ و زێدەتر گرنگیێ ب بابەتێن ئەکادیمى و زانستى دهێتە دان، ئەڤ چەمکە بو سەردەمێ یونانیان د زڤریتە ڤە و پشتى چەرخێ رەوشەنگەریێ زور ب بەرفرەهى کار لسەر علمانیەتێ هاتیە کرن بو جودا کرنا دەستهەلاتا کەنیسێ و دەستهەلاتا سیاسى. یا دیارە جدلەک زور مەزن هەنە دنافبەرا شروڤەیا حزبێن ئیسلامى بو چەمکێ علمانیەتێ و ئەو وەسا پێناسنە دکن جودا کرنا دینى ژ ژیانێ لبنەما دا چ راستى بو ڤێ چەندێ نینە دبیت هندەک کەسانێن توندرەوێن علمانى هەبن وەسا بدنە دیارکرن بەلێ تێگەهێ علمانیەکێ ژلایێ سیاسى ڤە جوداکرنا دینى یە ژ دەست هەلاتێ نەک ژیانێ کا چەوا ئیسلاما سیاسى دابەشى گەلەک ئاستان دبیت یێ توندرەو و میانرەو ئەها بڤى رەنگى ژى علمانیەت دابەشى ئاستێن جودا جودا دبیت .

یا دیارە مەرەما مە (هەرێما کوردستانێ) یە کو پشتى سەرهلدانا پیروز هژمارەکا زور ژ حزبێن سیاسى دورست بوینە نەخاسمە پشتی دابینکرنا کەش و هەوایەکێ ئازادنە سایەی دەستهەلاتا کوردى تاکو بەرفرەهـ بوونا رێرەوێ حزبێن سیاسى و دورست بوونا دەهان رێکخراوێن چڤاکێ مەدەنى ل کوردستانێ، هەلبەت ئەگەر ئەم لگور تێگەهێن حزبێن ئیسلامى شروڤەیا ئەڤێ دەستهەلاتێ بکەین، پارتێن ئیسلامی وەسا ددەنە دیارکرن کو ئەڤە دەستهەلاتەکا علمانى یە و مەرەما وان ژ ناڤ ئینانا ئەڤێ دەستهەلاتێ ب علمانیەت بابەتەکێ رەخنەیی و کرت کرنا رویێ حکومەتێ یە بو رایا گشتى تاکو بشێن رێکخستنا خو یانژى جەماوەرێ خو زێدە بکەن بەلێ ئەو نزانن ب ئەڤێ چەندێ ئەو بخو خزمەتا ئەڤێ دەستهەلاتێ دکەن دبیت ل قوناغەکێ دا شیابن کارتێکرنێ ل بشەکێ خەلکى بکەن بەلێ نەشیاینە ئەڤێ شروڤەیێ لسەر زورینا خەلکى ب سەپینن چونکە ل زوربەیی کابینێن ویزارى ئەڤ حزبێن بناڤ ئیسلامى بەشدارى دەستهەلاتێ بوینە و پرسیارا جەوهەرى ئەوە (بوچی حزبێن ئیسلامى دکەڤنە ژێر چەترا دەستهەلاتەکا علمانى؟) مەرەم ژ ئەڤێ پرسیارێ ئەوە ئەم پێداچونەکا کورت یا هزرى دگەل خو بکەین و ب دیتنا من هەرئێک ژمە یێن ئەڤ گوتارە بکەڤیتە بەرچاڤ و خاندنا وی دێ گەهیتە ئەنجامەکی.چونکە دەمێ تێگەهەک دهێتە رەتکرن و پاشان لبن سیانهیا ئەوى تێگەهى حزب کارو چالاکیێن خو بکەت وى دەمى پەیاما حزبەکا سیاسى راست گو نابیت دگەل لایەنگەرێن خو .

وەکو دیار هیچ حزبەکا ئیسلامى نەشێت ل روژهەلاتا ناڤەراست گەشێ بکەت ئەگەر دەستهەلاتەکا علمانى لسەر بنەمایێ رێزگرتنا هزر و بیرێن سیاسى دەلیڤێ نەدتێ تاکو ب ئازادیانە کارێن خو ئەنجام بدەن، باشترین نمونە ل وەلاتەکێ ئیسلامى دەلیڤە نینە بو هیچ حزبەکا ئیسلامى کار و چالاکیێن سیاسى هەبن نمونە وەلاتێ (سعودیە) بەلام ل وەلاتەکێ علمانى مینا وەلاتێ (تورکیا) حزبەکا ئیسلامى دەستهەلات داریێ لێ دکەت لەورا دەستهەلاتەک کو گرنگیێ بدەته ئازادى و رادەبرینێ لگور یاسا و ریسایێن وى وەلاتی باشترە ژ دەستهەلاتەکا دینى کو نە مروف نەژى گروپ نەژى حزبێن سیاسى تێدا ئازاد نەبن، لەورا ئەگەر ئەم هەلسەنگاندنەکا کورت بکەین دێ بومە دیار بیت کو حکومەتێن ئێک لدیف ئێک ل هەرێما کوردستانێ و بتایبەت کابینا هەشتێ زورا سەرکەفتى بویە ژ ئەڤی ئالى ڤە کو ئەڤروکە کار و چالاکى و راگەهاندنێن حزبێن ئیسلامى زور ئازاتر و چالاک کارێ خو دکەن کو رەخنە گرتنا شاگردێن حزبێن ئیسلامى بخو ل دەستهەلاتا علمانى دبیتە پالپشتى ب شێوەیەکێ نەراستەخو بو ئەڤێ حکومەتێ وەکو کورد دبێژن (بەرا ل گوزەکێن خو ددەن).