سەرۆک بارزانی ئێک ژ وان کەسایەتی و سەرکردە و کاریزمایا نە، کو سەنگ و قەدر و قیمەتەکێ مەزن و رێزەکا تایبەت لێ دهێتە گرتن، چ ل نافخوەیا کوردستانێ و عێراقێ یان وەلاتێن جیران و وەلاتێن ئەورۆپی و کەنداڤی و ئەمریکا و جیهانێ؛ واتە سەرۆک بارزانی ئێک ژ وان سەرکردە و کارەئەکتەرێن سەرەکیە د ڕۆژهەلاتا ناڤەراست دا و ڕوولەکێ تایبەت د چارەرکرنا کێشەیان دا ، هەلبەت سەرۆک بارزانی ب کەسەکێ ژیرمەند و چالاک و ئاشتخواز دهێتە ناسین و دگەل دان و ستاندنێن ئاشتیانەیه .. رێزدار (مەسعود بارزانی) ب مەرجعێ کوردا و ب مەرجعێ سیاسیێ کوردان دهێتە نیاسین و پێناسەکرن.سەرۆک بارزانی بۆ باشوورێ عێراقێ ل بەغدا و نەجەف و ئەو کومبوونێن دگەل سەرۆک وەزیرێن عێراقێ و سەرۆک پەرلەمانێ عێراقێ و سەرۆک پارتێن عێراقێ و کەسایەتیێن عێراقێ کری، ئەڤ سەرەدان ب خۆ پەیامن بۆ نافخۆ و دەرڤە ... چونکی بارزانی بەری رێفراندۆمێ گۆتبوو:( ئەنجامدانا رێفراندۆمێ واتا هندێ نادەت، کو رۆژا دیڤدا سەربەخۆیێ ڕابگەهینن، بەلکو دێ چینە دان و ستاندنان دگەل حکومەتا عێراقێ ..) هەلبەت بۆ هەر دان و ستاندنەکێ دڤێت بارودخ و کاودان د ئاسایی بن دگەل عێراقێ، بەرە بەرە دان و ستاندنێن ژێکجودابوون ژ عێراقێ و سەربەخۆیێ دێ هێنە ئەنجام دان ل دیڤ دەمی، هەلبەت رێفراندۆم کارتەکا بهێزە ددەستێ کوردستانا باشوور و سەرۆک بارزانی دا، پێگیر نەبوونا عێراقێ ب دەستووری ژی کارتەکا دنە ددەستێ کوردان دا، هەر پێگیر نەبوونا عێراقێ ب دەستووری رێفراندۆم بوو دەرئەنجام و ب رێژا ۹۳ دەنگ ب بەلێ هاتە دان .. پرسا رێفراندۆمێ پرسەکا ڤەکری دمینت و مایە، مەحالە سەرۆک بارزانی دەست بەرداری رێفراندۆم و ئەنجامێن وێ ببیت، بارزانی دبێژیت: (پەشێمان بوون ژ سەرخوەبوونێ خەیالە) ، خەبات و تێکوشینا سەد ساڵا و ب سەد هزاران شەهید و بریندار داینە ل پێناڤ سەربەخۆ بن و ل ژێر ئالایێ دەولەت بوونێ ژین و ژیارا خوە دەربازبکین ..

بابەتێ سەرەدانێ و پرسا بابەتێ رێفراندۆمێ دوو بابەتێن ژێک جودا جێوازن، بابەتێ سەرەدانا سەرۆک بارزانی بۆ بەغدایێ ژبۆ دەستڤەئینان و دەسبەسەرکرنا مافێن دەستووریێن خەلکێ کوردستانێ یە، ئاسایکرنا ناڤچێن ڤەقەتیاییە و ڤەگەراندنا خەلکێن کوردێن ناڤچێن ڤەقەتیاییە بۆ جهێن وان، پشکا هەرێمێ یە د بودجەیی دا، ڤەکرنا هندەک گرێک و چارەکرنا وان کێشانە یێن دناڤبەرا حکومەتا هەرێمێ و بەغدایێ، پێگریکرنا دەستووریە ... لێ رێفراندۆم ژ ئەنجامێ نە پێگیریا عێراقێ ب دەستووری هاتە کرن و چەندین خالێن دەستووری بن پێکرن، سەرۆک بارزانی گۆتیە رێفراندۆم پەیام دەنگێ ئاشتیانەیێ گەلێ کوردستانێ یە بۆ عێراقێ و وەلاتێن جیهانێ، کرنا رێفراندۆمێ و ئەنجام و رێژەکا هەری زۆر دەنگان ب بەلێ دا، ئەڤ کارتەکا تاپو کرییە ل بەریکێ دانە، ل دەمێ پێدڤیاتیێ کارتەکا فشار و بەلگەیەکێ بەردەستە، ئەکید رێفراندۆم دێ سەرگریت چ ل دەمەک نزیک یان دوور ..

سەرەدانا سەرۆک بارزانی و شاندێ د گەل دا بۆ بەغدا و نەجەف و پێشوازیکرنەکا گەرم لێ هاتە کرن و ب رێز ڤە، هەلبەت ڤێ سەدەدانێ دەنگڤەدانەکا مەزن هەبوو ل نافخوە و دەرڤە .. ل دەمەک نزیک ژی دێ کریار و کارڤەدانێن ڤێ سەرەدانێ دیار و خویا بن، هەلوەشاندنا سەرجەم وان بریارێن ل دژی کوردسانێ هاتینە دان د کابینا بووری یا حکومەتا عێراقێ دا، بنەجهکرنا پشکا کوردستانێ د بوجەیی دا، رێکەڤتن لسەر نەفتێ، هێمنکرن و ئاسایکرنا ناڤچێن ڤەقەتیایی ژ کوردستانێ، هەروەسا ڤەگەراندنا کوردان ب شێوەیەکێ سەربڵند دانە بۆ ناڤچێن وان .. لسەر چەندین بابەت و تەوەرێن دی دان و ستاندن هاتنە کرن و ئەنجام دان، ئاماژە و کار دنها دا ژی ب هندەک ڤان خالان هاتیە کرن.

سەرەدانا بارزانی بۆ بەغدا و نەجەف جهێ دلخوەشیا زۆربەیا خەلکێن کوردستانێ و عێراقێ و خەلکێ جادەیێ بوون، هەروەسا ب سەرەدانەکا گرنک و دیرۆکی و بەرهەمدارە و دهێتە وەسف کرن و دهێتە چاڤەرێکرن پەیوەندیێن باش هەبن ناڤبەینا هەرێم و بەغدایێ .. هەر سەرکردە و سەرۆکەکێ ب گوتن و دروشمەکێ پەسن و ستایشا سەرۆک بارزانی کر و ب ( سەرۆکێ هەرێما کوردستانێ) دا ناسین، هندەک ژ وان گوتنان " مە پێشوازی ل سەرکردە و کەسایەتیەکێ مەزن کرییە، کو جهێ رێز و حورمەتا هەمی لایەکییە"، هەروەسا " سەرۆک بارزانی سەرکردێ ئازادکرنا عێراقێ، ئاڤاکەرێ دیموکرسیێ یە ل عێراقێ، ئەندازیارێ ئاڤاکرنا عێراقێ و پەیوەندیێن عێراقێ و ناڤچەیی و نێڤ دەولەتییە" و " ستایشا روولێ سەرۆک بارزانی کر د پرۆسا سیاسی ل عێراقێ و ناڤچەیێ دا .. هەر جهەکێ سەرۆک بارزانی بچیتێ، خێر و بەرەکەت ژی دچیتێ" و " سەرەدانا سەرۆک بۆ بەغدا ‌ب گرنگ و ڕاماندار ب هەمی لایان ڤە وەسف دکر" و " سەرەدانا سەرۆک بارزانی بۆ ب دەستپێکا خێرێ بۆ پروسا سیاسی ل قەلەم د دا " و " ب سەرەدانەکا دیرۆکی و گرنک وەسف دکر" ...هتد، سەرۆک بارزانی کلیلا چارەسەرکرنا کێشێن ناڤبەینا هەولێرێ و بەغدایێ یە، مینا د دەمێ بووری دا چەندین جارا سەرەدانا بەغدا کرییە ئەو کێشە و ئالوزی چارەکرینە ..

سەبارەت سەرەدانا سەرۆک بارزانی تشتەک ئاساییە، هندەک کەس و لایەن ل دژ راوەستن و ب سەرەدانەکا گرنگ نەزانن و نەبینن، چونکی هەر ئەو بوون خەنجەرا ژەهر کری ل برایێن خۆ داین، ئەو بوون بودجە بری و رێکەڤتنێن ژێر ب ژێر دژی هەرێمێ و خەلکێ کوردستانێ ئیمزا کرین ، ئەو بوون غیانەت و داخوازا بودجە برینێ کری، ئەو بوون دەنگ ب هندە پرۆژا داین ل دژی داخوازیێن کوردا،هەر ئەو بوون دگۆتن دڤێت بکەر و پیشەنگێن رێفراندۆمێ بهێنە دادگەهکرن، ئەو بوون خەلک و پێشمەرگە ب کۆشتن داین و شەهید کرین و بریندار کرین ب دەستێ حەشدێ و هێزێن عێراقی و بووینە رێک خوشکەرێن دۆژمنی ... هتد.