ھەرچەندە ھێشتا پەرلەمانێ نوو یێ کوردستانێ کەسێ مەزنترین لیستا پەرلەمانی بۆ پێک ئینانا کابینا نوو یا حکومەتا ھەرێما کوردستانێ نە راسپاردی یە ، لێ پارتی دیموکراتی کوردستان وەک مەزنترین لیست دووبارە نێچیرڤان بارزانی دەست نیشان کریە بۆ پێکئینانا کابینا داھاتی ، کەسێ راسپارتی بۆ ئێکئینانا حکومەتێ ژی ھێشتا دەست ب سەرەدانا لیست و قەوارەیێن سەرکەفتی نەکریە ، لێ شاندا پارتی دیموکراتی کوردستان وەک رێکخۆشکرن بۆ سەرەدانێن نێچیرڤان بارزانی بۆ وان لایەنا دەست ب سەرەدان و کۆمبوونا کریە و ھێشتا زەلال نەبوویە کی حزب دێ پشکداری حکومەتێ کەت و کی دێ بیتە ئۆپۆزسیۆن .
لێ گاڤێن نێچیرڤان بارزانی یێن دووماھیا ژیێ کابینا نھو دیار دکەن کۆ کابینا داھاتی لسەرۆکایەتیا وی دی کابینا بھێزکرنا کوردستانێ بیت کۆ درۆشمێ پارتی دیموکراتی کوردستانە ، بتایبەت لسەر ئاستێ پەیوەندیێن دگەل عیراقێ و بنبڕکرنا ئاریشە و ناکۆکیێن دناڤبەرا ھەردوو ئالیان ، نەخاسمە ژلایێ ئابووری و پرسێن نەفت و گازێ ، دووبارە فرۆتنا نەفتا کەرکووکێ د رێکا بۆریێن ھەرێما کوردستانێ و تورکیا و بەردەوامیا دابەشکرنا مۆچێ فەرمانبەرا و دەسپێکرنەکا پرۆژێن خزمەتگۆزاری . ئەڤە ئاماژەنە کۆ بریارا پارتی بۆ دووبارە دەست نیشانکرنەڤای نێچیرڤان بارزانی بۆ پێکئینانا کابینا داھاتی بریارەکا دجھێ خودایە و پارتی بسەرۆکایەتیکرنا حکومەتا نوو دێ دیرۆکەکا نوو یا پڕ سەروەری تۆمارکەت لسەر ئاستێن جودا جودا تۆمارکەت ، کابینا نوو دێ بیتە کابینا بەختەوەریا خەلکێ کوردستانێ و گەشەبوونا ئابووری و دارایی و پاراستن و بھێزکرنا دەسکەقتێن نەتەوی و نشتیمانی و ب سازیترکرنا حکومەتا ھەرێمێ و سەروەریا یاسایێ و پاراستنا پرنسیپێن دیموکراسی و مافێ مرۆڤ .
ژبەرکۆ حکومەتا داھاتی یا بڤی رەنگی دێ بیتە جھێ رەزامەندی و پشتەڤانیا پرانیا خەلکێ کوردستانێ ، رۆلێ ئۆپۆزسیۆنێ دێ لاواز بیت ، ئەو حزبێن بەرەیێ ئۆپۆزسیۆنێ ھەلدبژێن نەشێن جادێ دژی حکومەتێ بکاربینن .
ھەرچەندە رۆلێ ئۆپۆزسیۆنێ زۆر ل رۆلێ دەسھەلاتێ کێمتر نیە بۆ بەرژەوەندێن گشتی ، لێ لدەمێن بووری حزبێن ئۆپۆزسیۆن ، ئۆپۆزسیۆن بوونا خۆ بۆ بەرژەوەندێن سیاسی بکاردئینا و لجێ رەنکێن ئاڤاکەر بگرن و بەرامبەر داخازیێن خەلکێ رێکێن یاسایی بگرنە بەر ، درۆشمێن ھەرفاندنا حکومەتێ بلند دکرن ، ئەڤەژی بۆ دژایەتیا پارتی بوو ، ھەر وەکی بچەک و رەفتارێن دوور ل رەوشتێ ئۆپۆزسۆن بوونێ و جڤاکێ کوردستانێ ھێرش دبرنە سەر بارەگایێن پارتی .
ب دیتنا من نێچیرڤان بارزانی وەکی سەرۆکێ داھاتی ێن حکومەتا ھەرێما کوردستانێ ، ب پرۆژە گاڤێن پڕ خزمەت و کردارکرنا درۆشمێ پارتی بەرەڤ کوردستانەکا بھێز دێ مەزنترین ئاستەنگ و رێگری بەرامبەر ئۆپرسیۆنا کوردستانێ درۆست کەت .
ئەز باوەرم پشکەکا ئالیێن سیاسی یێن ئۆپۆزسیۆن ، مینا بەرێ دێ دژبەریا ڤان گاڤێن حکومەتێ کەن و ھەول دەن روویێ گەشێ حکومەتا داھاتی بەرۆڤاژای بکەن ، چونکی لسەر بنەمایێ دژبەریا پارتی دیموکراتی کوردستان پەروەردە بوونە و پێگەھشتی نە ، ئەگەر پارتی کوردستانێ بکەتە پێشکەقتیترین وەلاتێ جیھانێ ڤان رەفتارێن خۆ بەرنادەن ..! چونکی بریار و راسپاردان لدەرڤەی ھەرێما کوردستانێ وەردگرن ، بۆ تێکدانا رەوشا کوردستانێ .
لێ ئەڤ پیلانێن وان سەرناگرن و جادا کوردستانێ دێ خزمەتێن حکومەتا ھەرێما کوردستانێ بەرچاڤ وەرگریت ، دێ شێین بێژین پلان و بەرنامێن ھەمە لایەنە یێن حکومەتا ھەرێما کوردستانێ بسەرۆکاتیا نێچیرڤان بارزانی بۆ خزمەتا کورد و کوردستانێ و بەرژەوەندێن گشتی ، دێ روولێ ئۆپۆزسیۆنێ لاواز کەت و بۆ خەلکی ژی دیار بیت کۆ رەفتارێن وان یێن بەرێ دژی حکومەتا ھەرێما کوردستانێ ، نە بۆ خاترا چاڤێن خەلکێ کوردستانێ بو ، بەلکی بۆ بەرژەوەندێن تایبەت و حزبی و بەردەوامیا کەرب و کینێ بوو دژی پارتی ، بن سیبەرا ئۆپۆزسۆنێ و سەردابرنا خەلکەکێ ھەرزەکار ژلایێ تەمەنی و ئاستێ ھشیاریا سیاسی و نەتەوی .