نووسەری بەناوبانگی ئەمریکی دیل کارینگی دەلێ" زۆربەی شتەگرنگەکانی ئەو جیھانە جێ بەجێ دەبن بۆ ئەوانەی سوورن لە سەر ھەوڵەکانیان ھەر چەندە ھیواشیان نەبێت".
لەگەڵ دەستپێکردنی ساڵی نوێی خوێندنی (٢٠١٨/٢٠١٩) کۆڕبەندی ئابوری جیھانی پۆلین کردنی نوێی کوالێتی خوێندنی بۆ ساڵی (٢٠١٧/٢٠١٨) دەرکرد کە (١٣٧) ووڵات دەگرێتەوە کە چەند پێوەر و بنەمایەک بنچینە بۆ پۆلین کردنی ووڵاتان لە سەر کوالێتی خوێندنی بەرز وەکو (ژێرخانی خوێندن و قوتابخانەکان و فێرکردنی بنەڕەتی و زانکۆیی و تەندروستی و ژینگە و راھێنان و مەشق و کوالێتی تایبەت بە توانا و تەکنەلۆژیا و داھێنان و پرۆگرامەکان و چەندانی تر). کە سویسرا و سەنگاپورە یەکەم و دووەمی جیھان بوون و مۆریتانیاش دووا ووڵات بوو، وە ھەریەکە لە (قەتەر و ئیمارات و لوبنان) یەکەم و دووەم و سێ یەمی ووڵاتانی عەرەبی بوون لە کوالێتی خوێندن بە زنجیرەی (٢٥،١٠،٤) ووڵاتانی جیھانی ھاتن.
ئەوەی گرنگە عێراق لە دەرەوەی پۆلین کردنەکە بوو بە ھەرێمی کوردستانیشەوە ، ئەوە چەند سالێکە عێراق و ھەرێمی کوردستان پۆلین کردنی کوالێتی خوێندن نایانگرێتەوە کە سادەترین پێوەر و بنەماکانی کوالێتی خوێندن تیایاندا جێ بەجێ نەکراوە و بەرچاو و دیار نەکراوە ، جگە لە عێراق ھەریەکە لە سوریا و سۆمال و سودان و لیبیا و یەمەن لە دەرەوەی پۆلین کردنەکەن، بێگومان فێرکردن یەکێکە لە گرنگترین بنەماکان کە ھەر دەوڵەت و ووڵاتێک لە سەری بنیات دەنرێن و کێبرکێی ووڵاتانی تر دەکات لە بوارە جیاواز و جۆراوجۆرەکان، بۆیە زۆر گرنگە ئەوپەری گرنگی بە فێرکردن و خوێندن بدەین لە ھەرێمی کوردستان و پلان و ستراتیژیەتی درێژخایەنمان ھەبێت بۆ بەرزکردنەوەی پەروەردە و فێرکردن و ناساندن و کێبڕکێ لەگەڵ ووڵاتانی تری جیھان ، ئەویش بە جێ بەجێ کردنی پێوەر و بنەماکانی مەرجدار بۆ بەشدار و پۆلین کردن لە کوالێتی خوێندنی جیھانی کە پێویستە چاکسازی لە کۆی پرۆسەی فێرکردن و پەروەردە بکرێ لە لایەن ئاستی باڵای ھەرێم و حکومەتی کوردستان سەرەتا بە چاککردنی ژیان و گوزەرانی مامۆستایان و گۆڕانکاری لە پرۆگرامەکانی خوێندن و چاککردنی باری خوێندن لە گوند و شارەکان و وەکو یەکیان لێ بێت و ھەلی یەکسانیان بۆ بڕەخسێت گرنگی زۆر بە خوێندنی قوتابخانە حکومییەکان بدرێت لە ھەموو روویەکەوە و قوتابخانەکان شیاو بکرێن و ژینگەی لە باری فێرکردن بۆیان درووست بکرێت و گرنگی بە راھێنان و مەشقی بەردەوام بدرێت و دەسەڵات بدرێت بە قوتابخانەکان و پاڵپشتی بکرێن و کەسانی دڵسۆزو پەروەردەیی و خاوەن ئەزموون لە کۆی جومگەکانی پەروەردە و فێرکردن بوونیان ھەبێت لە بنکە تا لوتکە، سوود لە توانان و ئەزموون و شارەزایی ووڵاتانی دەرەوە وەربگیرێت بە تایبەتی ئەو ووڵاتانەی لە پێشەوەن لە پۆلین کردنی کوالێتی خوێندن تا بە شێوەیەکی گشتی بتوانین ھەرێمی کوردستان نزیک بکەینەوە لە سەرکەوتن و ئەزموونی ئەو ووڵاتانە و ھەروەھا گرنگی زۆر بە نەھێشتنی نەخوێندەواری بدەین و لەگەڵ کارکردن بە ووردی لە سەر ئەو قوتابیانەی کە لە قۆناخی بنەڕەتی ساڵانە خوێندن بە جێ دەھێلن و ئاماری ووردمان ھەبێت لە سەر کۆی پرۆسەکە و ئامانجمان تەنھا بەدەستھێنانی ئەنجامێکی باش و بەرز بێت و جیاوازییەکەشی دیار بێت.
بەرێوەبەری گشتی چاڵاکی وەرزش و ھونەر
ماستەر لە کارگێرێ پەروەردەیی