پشتی خەلکێ کوردستانێ ل رۆژا ٣٠ ێ ئیلۆنا ٢٠١٨ د پرۆسەیەکا دیموکراسی دا پارتیا بھێز و ھەلگرا درۆشمێ کوردستانەکا بھێز ب دەنگێن خۆ بھێزتر کری و ھەرچەندە ھێشتا ئەنجامێن فەرمی نەھاتینە راگەھاندن لێ لدیف ئەنجامێن نە فەرمی پارتی دیموکراتی کوردستان رێژەیەکا زۆرا دەنگان بدەستڤەئینایە بۆ پەرلەمانێ کوردستانێ .
پشتی ڤێ سەرکەفتنا پارتی و باوەریا ڤێ رێژا زۆرا خەلکێ کوردستانێ بڤێ پارتیا خودان ھێز و پێشەنکا دەسکەفت و سەرکەفننێن کوردستانێ ، گەشبوونیەکا بەرچاڤ بسەر و سیمایێ خەلکێ کوردستانێ ڤە دیارە و باوەری ھەیە لسەر دەستێ پارتی حکومەتا داھاتی یا ھەرێما کوردستانێ بسەرۆکاتیا رێزدار نێچیرڤان بارزانی دێ پێگەھی َ ھەرێما کوردستانێ بھێزتر کەڤیت و بەرنامێ پارتی یێ نەتەوی و نشتیمانی و ئاڤەدانی و کارگێری و دارایی دێ ھێنە بجە ئینان .
ئەگەر پارتی بتنێ ژی حکومەتێ پێک نەئینیت دێ پێتڤی ب ژمارەکا کێما دەنگان ھەبیت بۆ ھەڤپەیمانیەکێ ، ئەڤەژی دەلیڤە یە کۆ پێگەھێ پارتی ل حکومەتا داھاتی یا ھەرێمێ بەرفرەھتر و بھێزتر بیت ، ئەگەر رێزدار نێچیرڤان بارزانی دووبارە وەکی سەرۆکێ حکومەتێ بھێتەڤ دەست نیشان کر ئارمانجێن پارتی کۆ ئارمانجێن پرانیا خەلکێ کوردستانێ نە لدەمەکێ زوو دێ ھێنە بجە ئینان ، ژوانا پرۆژێ چاکسازیێ و چارەسەرکرنا قەیرانا دارایی و ئێکگرتنا ھێزێن لەشکری و ئێمناھی و خوشترکرنا پەیوەندێن ھەرێما کوردستانێ دگەل وەلاتێن دەوروبەر و جیھانێ .
ئەڤ چەندە ڤاکتەرن کۆ لسەر ئاستێ عیراقێ ژی پەیوەندی و ھەماھەنگی خورتر و بھێزتر ببن پشتی پێکئینانا حکومەتا نوی یا عیراقێ ، ئەگەر پێک ئینانا حکومەتا عیراقێ ژی ژبەر ناکۆکیێن ناڤ مالا شیعی و عەرەبێن عیراقێ ب گشتی و مایتێکرنێن دەرەکی ، دیسان دەلیڤا بھێزتر بوونا پێگەھێ ھەرێما کوردستانێ لسەر ئاستێ جیھانێ دێ خوشتر بن و ھەرێم دێ بیتە بنگەھەکێ مەزن یێ سیاسی و ئابووری ، ب دیتنا من ئەڤ پێشبینیە نێزیکترە .
لسەر ئاستێ جادا کوردستانی ژی ، دیارە خەلکێ کوردستانێ د وێ باوەریێ دا حکومەتێن بنگەە بەرفرەە ب پشکداریا پرانیا پارتیێن کوردستانی ، ژبەر بەرژەوەندێن حزبی و ناکۆکیێن دناڤبەرا پارتیان دا نەشێن ببنە خودان ستراتیژیەکا دارشتی لسەر بنەمایێ بەرژەوەندێن گشتی و خزمەتکرنێ و گەشەبوونێ ، ھەر وەکی لدەمێن بووری ململانێ یا دناڤبەرا حزبێن کوردستانێ نەشیای وەکی پێتڤی پێگەھێ ھەرێمێ بھێز بکەن و خزمەتێن پێتڤی دابین بکەن ، تا گەھشتیە وی ئاستی ھندەک حزبێن کوردستانێ پەنایێ ببەنە بەر خیانەتا نشتیمانی مینا ١٦ ێ ئکتۆبەرێ و داخازکرنا برینا مۆچە و بۆدجێ ھەرێمێ ل حکومەتا عیراقێ ، یان دژبەریا پیرۆژێ چاکسازیێ سەرۆکێ حکومەتا ھەرێما کوردستانێ و چەندین موزایدێن سیاسی .
ئەڤ پشتەڤانیا خەلکێ کوردستانێ ل پارتی دیموکراتی فاکتەرێ باڵادەستر بوونا پارتی یە لحکومەتا داھاتی یا ھەرێمێ و ئەڤ بالادەستیە پشتەڤانیەکا بھێزە بۆ پارتی بۆ چەسپاندنا بەرنامە و پلانا خۆ یا ستراتیژی لسەر موکۆمکرنا پەیوەندیان دگەل وەلاتێن جیھانێ لسەر بنەمایێ پاراستنا بەرژەوەندیێن ھەڤپشک دناڤبەرا ھەردو ئالیان دا ، ھەر وەکی لدەمێن بووری ب سیاسەتا جەنابێ سەرۆک بارزانی ئەڤ پەیوەندیە ھاتیە گرێدان و لدەمێن داھاتی دا حکومەتا ھەرێمێ دێ گرنگیەکا پتر پێ دەت ،
چونکی پشتی خیانەتا ١٦ ئکتۆبەرێ و روودانێن پشتی وێ دیار بۆ کۆ رێزدار نێچیرڤان بارزانی ھەلگرێ کلیلێن ڤەرکرنا دەرگەھێن چارەسەرکرنا قەیرانا و بەختەوەریا کوردستانێ یە و ئاڤا ڤەمراندنا ئاگرێ ناکۆکی و ئاریشانە .
نە تنێ گرنگە پارتیێن کوردستانی رێزێ ل ئیرادا خەلکێ کوردستانێ بگرن ، بەلکی پێتڤی یە پشتەڤان بن بۆ وێ حکومەتا خەلکی ھەلبژارتی و ئەگەر ئۆپۆزسیۆن ژی بن پێتڤی یە ئاوێنا قوردیکا رووناھیا خەلکی بن و پرۆژە و پێشنیارێن د خزمەتا گشتی دا ئاراستەی حکومەتێ بکەن . نەک دژبەری حکومەتێ بن و ھەولا تێکدانا ئاسایشا ھەرێمێ بدەن و دەستێن ھەرێمی بینە دناڤ کوردستانێ بۆ بەرژەوەندێن پارتیێن خۆ .
ئەز باوەرم لسەر دەستێ پارتی حکومەتا داھاتی یا ھەرێما کوردستانێ دێ لدیف ھیڤی و ئارمانجێن خەلکێ کوردستانێ بیت ، بلا خەلک گەشبین ببیت و چاڤەرێ کوردستانەکا بھێز بیت ھەر وەکی پارتی ل ھەلبژارتنان ئەڤ درۆشمە ھەلگرتی و درۆشمێن پارتی ژی لدیف شیان و ھێزا پارتی یە .