چەند تەماشە دکەم، ھیچ جارەکێ و ھیچ ھەلبژارتنەکێ من رکابەریا پارتێن سیاسی ب ڤی رەنگی نەدیتیە، ڤێ گەرێ ھەر ئالییەک دخوازیت ب ھەموو شیانێن خوە سەرنجا دەنگدەران بۆ لیستا خوە رابکێشیت، لێ ئەگەر ب ھووری تەماشەی ماتریالێ بانگەشەیا پارتێن سیاسی یێن پشکداری ھەلبژارتنان بکەین دێ ب باشی بینین کیژان پارت ب کردار بانگەشە دەستپێکریە و کیژان ژی ھێشتا پرۆژەیێن نڤێسکینە وەکو ھەموو ھەلبژراتنێن بۆری ب تنێ ل دەمێ بانگەشەیا ھەلبژارتنان دھێتە گۆتن و ددووڤدا ژی نە ئەو پرۆژە و نە خوەدانێن وان ب ھیچ رەنگەکی ناھێنە دیتن، بەروڤاژی ڤێ یەکێ ژی حزبا دەستھەلاتدار کو پارتییە ب پێچەوانەی ھەموو ھەلبژارتنێن بۆری بانگەشا خوە کر، ڤێ گەرێ گەلەک ب ھێز و ب ڤەکرنا گەلەک پرۆژەیان ھاتە ناڤا رکابەریا ب دەستخستنا زۆرترین کورسیێن پەرلەمانێ کوردستانێ، تا نھا نەگۆتیە د چارسالێن بھێت دێ وەسا کەم، بەلکو ب کردار پارتی دبێژیت ئەڤە من کر، واتە ئەو پرۆژەیێن کو پارتی د ڤان رۆژان بەرێ بناغێ بۆ دانای و ئەو پرۆژەیێن خستینە د خزمەتا وەلاتیان دا و ب فەرمی ھاتینە ڤەکرن ئاماژەنە کو پارتی سەرەرای کو دیرۆک ب خوە ب شانازی ددانیت و پلان بۆ پاشەرۆژا خوە ھەیە، بەلکو بەردەوام خوە نیشان ددەت کو د (نھا)
دا ژی دژیت، ئەو پرۆژەیێن کو پارتی سالانە ل سنورێ دەستھەلاتداریا خوە ل ھەولێرێ و دھۆکێ دروست دکەت، ھەڤدەمە ل گەل دروستبوونا حزبێن نوو یێن سلێمانی کو سالانە دھێنە دروستکرن و ژ بلی دروشێمن ژناڤبرنا پارتی، تا نھا ھیچ پرۆژەیەکێ دی ژ بۆ دەنگدەرێن سنورێ خوە باس نەکریە، ئەوا کو ل ڤان رۆژان نیچیرڤان بارزانی ل دھۆکێ و ھەولێری کری، ب ٢٧ سالێن دەستھەلاتداریا پارتێن زۆنا رەنگاورەنگ ل سنورێ سلێمانی و ھەلەبجە نەھاتیە کرن کو پتر ژ پارێزگەھا ھەولێرێ و دھۆکێ بودجە ل بەر دەستێ وان ژی بوویە، گرنگە بزانین سەرۆکێ حکومەتێ ل ھەولێرێ و دھۆکێ چ پرۆژە ھەبوو، ل دەمێ دانانا بەرێ بنیاتا رێکا رۆڤیا-گۆپال کو رێکەکا ستراتیژیا ناڤبەرا ھەولێرێ و دھۆکێ یە، د ھەمان دەمدا تۆنێلا گەلێ زاخۆ ب فەرمی ل پێش وەلاتیان ڤەکر، رۆژەک ب سەر ڤێ یەکێ دەرباز نەبوو، نێچیرڤان بارزانی سەرۆکێ حکومەتا ھەرێما کوردستانێ بەرێ بنیاتا مەزنترین جادە ل سەر ئاستێ کوردستانێ و ئیراقێ ل ھەولێرێ دانا ئەو ژی جادەیا ١٥٠ مەتری یە، کو بەری چەند مەھەکان جادەیا ١٢٠ مەتری ل وی باژاری ب داوی ھات و ب فەرمی ھاتە ڤەکرن. لەورا بۆ من گومان چێدبیت دەما کو پارتی ب حکومەتا خوە ڤان پرۆژەیان بکەت د ھەمان دەمدا پرۆژەیێن حزبێن سلێمانیێ ژ ناڤبرنا پارتی بیت، ئەڤە بخوە و ب ئاشکەرا وێ رامانێ ددەت کو ب ژناڤبەرنا پارتی وان دڤێت ئەو برسیبوون و نەرازیبوون و نەبوونا خزمەتگۆزاریان کو ل سلێمانیێ ھەیە بۆ دەڤەرێن دی یێن ھەرێما کوردستانێ ڤەگوھێزن، چونکە ئەگەر ئەڤ گۆتنا من راست نەبیت چما پتر ئەو تلا خوە ژبۆ پارتی درێژ دکەن و نکارن ب باشی ژی ناڤێ ئێکەتیێ و ڤەشارتنا بۆدجەیا سلێمانیێ باس بینن.