سه‌ره‌دانا بارزانى بۆ به‌غدا كارڤه‌دانێن ناڤخوه و جیهانى په‌یداكرن
به‌ده‌ل گابێركى
ئه‌گه‌ر ئه‌م به‌رێ خوه بده‌ینه پارتى دیمۆكراتى كوردستان گه‌له‌ك جارا خوه ژ سیاسه‌تكرنێ دوور دكر و سیاسه‌تا خوه د گوهۆرى بۆ پاراستنا به‌رژه‌ندیێن هه‌رێما كوردستانێ هه‌ر ئه‌ڤ چه‌نده‌ژى دبوو ئه‌گه‌ر كو پارتى باجه‌كا مه‌زن بده‌ت و پۆستێن كو مافێن وێ بووینه نه‌وه‌رگریت و بده‌ته لایه‌نێن دیتر بۆ هندێ ناڤمالا كوردى تێك نه‌چیت و كورد ئێك ده‌نگ بن به‌رامبه‌رى هه‌ر مه‌ترسیه‌كێ یا كو ل سه‌ر هه‌رێما كوردستانێ هه‌بیت، به‌لێ مخابن ده‌مێ ڤان لایه‌نێن سیاستى ئه‌و پله و پۆست وه‌ردگرتن هه‌ر ئه‌و به‌رى هه‌موویان ل دژى پارتى رادوه‌ستیان و باشترین به‌لگه‌ژى هه‌بوونا سه‌رۆككومارێ عیراقێ و جێگرێ سه‌رۆك په‌رله‌مانێ عیراقێ هه‌ردووك پۆست مافێن پارتیبووینه و پارتى ده‌ستبه‌ردارى وان بوویه بۆ لایه‌نێن دیتر، به‌لێ وان ئه‌ڤ هه‌ردوو پۆسته بۆ به‌رژه‌وه‌ندیێن خوه بكارئیناینه و دژایه‌تیكرنا پارتى، هه‌ر ژ به‌رهندێ بۆ ڤێجارێ پارتى ده‌ستان ژ مافێن خوه به‌رناده‌ت و دێ ل دیڤ ژمارا ده‌نگده‌رێن خوه هه‌موو پۆستێن خوه وه‌رگریت و وان پۆستان بكارئینیت بۆ به‌رژه‌وندیێن هه‌رێما كوردستانێ.
هه‌روه‌سا چوونا نێچیرڤان بارزانى بۆ به‌غدا كارڤه‌دانێن نافخوه و جیهانى په‌یداكرن ژ وانژى چه‌ندین لایه‌نێن سیاسى ل ناڤا هه‌رێما كوردستانێ پارتى ب هندێ گونه‌هباركر كو ب تاكلایه‌نانه سه‌ره‌دانا به‌غداكرییه، به‌لێ وان ژبیركرییه ده‌مێ وان ل 16ى ئۆكتۆبه‌رێ دلێ ملیۆنان كوردان سۆتى و پشتا برایێن خوه به‌رداین و كه‌ركووك و خه‌لكێ كه‌ركووكێ ته‌سلیمى قه‌ده‌رێكرین و چه‌ندین لایه‌نێن عیراقى پێشوازیه‌كا مه‌زن ل نێچیرڤان بارزانى كر ژ وانژى حەیدەر عەبادی سەرۆکوەزیرێ ئیراقێ، و عه‌مار حه‌كیم و هادى عامرى و چه‌ندین سه‌ركردێن دیتر یێن دیار دناڤ گوره‌پانا سیاسى یا عیراقێ دا.
پشتى ڤێ سه‌ره‌دانا سه‌ركه‌فتى كارڤه‌دانێن جیهانى ل دیڤ خوه ئینان ئه‌وژى وه‌رزیرێ ده‌رڤه‌یێ ئه‌مریكا مایک پۆمپێیۆ ب رێیا تێلفۆنێ پەیوەندی ب نێچیرڤان بارزانی کر و ھەردو ئالییان داوی پێشھاتێن ئیراقێ و پاشەرۆژا پرۆسەیا سیاسی گۆتوبێژ کرن، بەحس ل پرسا ھەلبژارتنا دەستەیا سەرۆکاتییا پەرلەمانی و بزاڤێن ھەلبژارتنا سەرۆککۆماری ژی کر.
ل دوماهیكێ یا گرنگه بزانین كو هه‌ر پێنگاڤه‌كا بارزانى بهاڤێژیت دێ كارڤه‌دانێن خوه هه‌بن و دیسان دێ مفایه‌كێ مه‌زن بۆ هه‌رێما كوردستانێ هه‌بیت.
