ب تنێ چار مه‌هـ ب سه‌ر هه‌لبژارتنێن په‌رله‌مانێ ئیراقێ ده‌ربازبووینه و جاره‌كاده ملله‌ت دێ چیته هه‌مبه‌رى سندۆقێن ده‌نگدانێ، لێ ڤێ گه‌ر‌ێ دانگدان ژ بۆ په‌رله‌مانێ كوردستانێ یه، پاداشت كرنا ئالییه‌كێ سیاسى و سزادانا ئالییه‌كێ دى پتر د ڤێ هه‌لبژارتنێ دا رۆلێ خوه دبینیت، چونكى خه‌لك دكاریت د ڤێ هه‌لبژتتنێ دا هه‌م جهێ ڤێ ده‌ستهه‌لاتا هه‌یی بهێزتر بكه‌ت و پێچه‌وانه ژى دكاریت گهورینێ د به‌لانسا هێزێ دا بكه‌ت، له‌ورا ل پێشیا هه‌ر تشته‌كى گرنگ ئه‌وه ده‌نگده‌ر وێ پرسیارێ ژ خوه بكه‌ت، كیژان ئالیێ سیاسى هه‌لبژێرم و ژبه‌ر چ باوه‌ریێ بده‌مێ؟ ئه‌ڤان دوو پرسیاران دێ شێوازێ هزركرنا ده‌نگده‌رى و بریارا وى یا هه‌لبژارتنێ به‌ر ب ئاراسته‌یه‌كێ دروست به‌ت. ژ بۆ هه‌لبژارتنا ئالییه‌كێ سیاسى گه‌له‌ك پیڤه‌ر هه‌نه، ده‌نگده‌ر هه‌یه ل سه‌ر بنه‌مایێ ئایدۆلۆژى دێ ده‌نگێ خوه دده‌ت، هه‌یه ژى هه‌لوێست و پرسێن نه‌ته‌وى ب خالا هه‌رى گرنگ ژ بۆ ده‌نگدانێ ددانییت، ژ ڤان مه‌زنتر ژى دیرۆكا پارته‌كا سیاسى و خزمه‌تا وى یا نها دحكومه‌تێ دا و هه‌روه‌سا به‌رنامێ وى پارتى بۆ چارسالێن بهێت ژ بنه‌مایێن گرنگێن ده‌نگدانا گه‌له‌ك ژ ده‌نگده‌رانه، لێ ژ بۆ من چ گرنگه؟ بێگومان مه ل هه‌رێما كوردستانێ چار سالێن پر ژ نه‌خوه‌شی و ل هه‌مبه‌ر ژى پر ژ به‌رخوه‌دان و سه‌روه‌رى ده‌ربازركرن، به‌رسینگرتنا وان نه‌خوه‌شییان ژ ئالیێ كیژان پارتا سیاسى هاته كرن و كیژان پارت خوه ب خوه‌دانێ سه‌روه‌ریان ددانیت؟، بێگومان پرسێن گریێداى نه‌ته‌وى و سه‌رخوه‌بوونێ ژى ژ پرسێن گرنگێن ڤێ هه‌لبژارتنێن نه كو پارتى دیموكراتى كوردستانێ خوه ب خوه‌دانێ وى پرۆژه‌ى ددانیت و ب ده‌ستكه‌فته‌كێ مه‌زنێ خوه دزانیت، ل هه‌مبه‌ر دا ژى هه‌موو حزبێن دى كرنا ریفراندۆمێ بۆ پارتى ب كێماسى دزانن، لێ پشتى كرنا ریفراندۆمێ چ چێبوو؟ پارتێن سیاسى یێن كوردستانێ چه‌ند ل دووڤ به‌رپرسیاریا خوه ره‌فتاركرن؟ كیژان ئالیێ سیاسى ملێ خوه دا به‌ر قه‌یرانا و گه‌ل و خه‌لكێ خوه ب تنێ دناڤا قه‌یرانان دا نه‌هێلا؟ هه‌روه‌سا و كیژان حزب بوون ل دووماهیا ته‌مه‌نێ حكومه‌تێ دناڤا كابینا حكومه‌تێ ره‌ڤین، ئانكو كیژان ئالیێن سیاسى بوون نوونه‌رێن خوه د حكومه‌تێ دا ڤه‌كێشان خوه بێ به‌رى كر ژ هه‌موو كێماسیێن ناڤا حكومه‌تێ؟ د هه‌مان ده‌م دا بۆ ده‌ما پتر ژ سێ سالان بوو ب هه‌ردوو ملا ژ وێ حكومه‌تێ دخوار!! دیسان كیژان پارتا سیاسى خوه ب خوه‌دانێ حكومه‌تێ دزانى و ئه‌و ره‌وشا دارایی یا سالا 2014 دروست بووى گهورین تێدا كر و تاراده‌یه‌كێ پاشكه‌فتا موچه‌یێ فه‌رمانبه‌ران كێمكر؟ ئه‌و كیژ پارتێن سیاسى بوون سرایا رێكا به‌غدایێ گرتبوون و ئامۆژگاریا ده‌ستهه‌لاتدارێن به‌غدایێ دكرن ژبۆى كو هیچ بره پاره‌یه‌كێ بۆ هه‌رێمێ نه‌هنێریت ل هه‌مبه‌ر دا ژى ئه‌و كی بوو به‌رده‌وام ل وه‌لاتێن جیهانێ دگه‌ریا ژ بۆى كو به‌غدایێ نه‌چارى دانوستاندنێ و هنارتنا مافێ خه‌لكێ كوردستانێ بكه‌ت، خۆ ئاشكرایه ژى ل داویێ بزاڤێن كیژان ئالیێ سیاسى ب سه‌ر كه‌فت.. له‌ورا گرنگه وێ پرسیارێ بكه‌ین، د چارسالێن بۆرى كى ژ بۆ چاره‌كرنا قه‌یرانان به‌رخوه‌دان كریه و كیژان ئالیێ ژبۆ مه‌زنكرنا قه‌یران و دروستكرنا ده‌نگێ نه‌رازى كار كریه؟ 30ى ئیلۆنێ دێ ڤان هه‌ردوو به‌ره‌یان ل هه‌ڤدوو جودا كه‌ت، وه‌كو هه‌لبژارتنێن 12ى گولانێ خه‌لك دێ حزبێن كوردستانێ سزا و پاداشت كه‌ت..
کارزان فەقێ
