ھێزا چەکی و زەڤلەکا ، تاکە رێک و فاکتەر نیە بۆ پاراستنا بەرژەوەندا ، چ یێن کەسی بن یان یێن گشتی و نەتەوەی و دابینکرنا بەختەوەریێ ، پێتڤی یە عەقل و پلان و ڕەوشەنبیری و دووربینی ژی دگەل ھەبیت ، ئەگەر نە ب ساناھی یە کەسەکێ لاواز و بیرمەند کەسەکێ خودان زەڤلەک و شیاندار ژلایێ ماددی و مەعنەوی بشکێنیت ، ھەروەسا بۆ سەرکردە و پارتیێن سیاسی ژی بوی رەنگی یە .
پێتڤی یە حزبێن سیاسی ژی بۆ گەھشتن ب دەسھەلاتێ و بھێزکرنا وەلاتێ خۆ و دابینکرنا جڤاکەکێ بەختەوەر ، ئەو حزب بن یێن خودان ھێز و سەربوور ژلایێ لەشکری و جەماوەری و عەقلەکێ بەرفرەە یێ رەوشەنبیر و دوور بین پارێزەرێن بەرژەوەندێن گشتی و ب لێزانی سەرەدەریێ دگەل بوویە و یەردەمی بکەن ، نەخاسمە بۆ جڤاکەکێ مینا جڤاکێ کوردستانێ کو ھێشتا د قوناغا خۆ رزگارکرنێ دایە و بەردەوام پیلانێن ناڤخۆیی و ھەرێمی دژی دەسکەفت و بەرژەوەندێن وان دھێنە گێران .
پارتی دیموکراتی کوردستان بۆ ھەلبژارتنێن پەرلەمانێ کوردستانێ ل ٣٠ / ٩/٢٠١٨ درۆشمێ ( کوردستانەکا بھێز ) بلند کریە .
ب دیتنا من پارتی دیموکراتی کوردستان ئەو پارتیە ئەوا ھەمی خەسلەتێن بھێزبوونێ تێدا یە ، ژلایێ لەشکری و ھزری و رەوشەنبیری و پلان دارشتنێ و خۆراگری بەرامبەر مەزنترین پیلانێن ناڤخۆیی و ھەرێمی و نیڤ دەولەتی ،
پارتی دژیێ خۆ یێ حەفتێ و دووسالی دا بۆ خەلکێ کوردستانێ خۆیاکریە کۆ فاکتەرێ بھێزکرنا کوردستانێ یە ژلایێ سیاسی و ئاڤەدانی و پاراستنا ماف و بەرژەوەندێن خەلکێ کوردستانێ .
ھەردەمێ مەترسیێن لەشکری لسەر کوردستانێ ھەبن ، پێشمەرگەھێن پارتی دیموکراتی کوردستانێ بسەرفیرازی و قوربانیدانێ ئەو مەترسی لادانە ، ھەر لسەردەمێ شۆرەشا مەزنا ئیلۆنێ ھەتا دگەھیتە شەرێ تیرۆرستێن داعش و حەشدا شیعی یا عیراقێ .
ژلایێ دبلۆماسی ژی پارتی و سەرۆک بارزانی چ وەک سەرۆکێ ھەرێما کوردستانێ یان سەرۆکێ پارتی دارێژەر و داینەمۆیا خورتکرنا پەیوەندیێن کوردستانێ بوویە دگەل جیھانێ نەخاسمە وەلاتێن زل ھێز ، دابینکرنا پشتەڤانیا ئەمریکا و وەلاتێن ھەڤپەیمان بۆ پاراستنا کوردستانێ ل شەرێ تیرۆرستێن داعش لسالا ٢٠١٤ ھەتا نھو ژ ئەنجامێ وێ ھێزا دبلۆماسیا پارتی و سەرۆک بارزانی بو .
ژلایێ پاراستنا ئێمناھیا کوردستانێ ژی دڤان کاودانێن دژوار و بەرۆڤاژی عیراقێ ، ھێزا پارتی یا ئێمناھی جیھان حیبەتی کریە .
ھەر وەسا ئاڤەدانی و گەشەبوونا کوردستانێ لسەر دەستێ رێزدار نێچیرڤان بارزانی سەرۆکێ حکومەتا ھەرێما کوردستانێ ب ھێز و ئیرادا پارتی بوویە بۆ خزمەتکرنا گەل و وەلاتی و پێشڤەچوونێن بەرچاڤ ،
راستە قەیران و گەماروویێن دەستکرد و سەپاندی لسەر ھەرێما کوردستانێ ژلایێ حکومەتا عیراقێ ھەتا رادەیەکی کاریگەری لسەر جڤاکێ کوردستانێ ھبوویە ، لێ ھێز و ئیرادار سەرۆکێ حکومەتا ھەرێما کوردستانێ ، یێن بەری قەیرانێ جڤاکێ کوردستانێ بەختەوەر کریە و خزمەتێن ھەرە مەزن پێشکێش کرینە و گاڤێن سەرکەفتیێن رێزدار نێچیرڤان بارزانی بۆ دەربازبوون و چارەسەرکرنا ڤان قەیرانان دیسان جھێ شانازیا خەلکێ کوردستانێ یە و نیشانێن بەرختەوەرترکرنا جڤاکێ کوردستانێ یە ل داھاتەکێ نێزیک دا .
ب باوەری ڤە دشێین بێژین پارتی دیموکراتی کوردستان ، ئەو ھێز و رێکخستنە ئەوا ھەلگرا ھێزێ ل ھەمی بووارێن ژیانێ و خودان ئیرادە و باوەریەکە بۆکۆمە بۆ بکارینانا ڤێ ھێزا خۆ بۆ خزمەتا گەل و وەلاتێ و ئازادی و بەختەوەریا کوردستانێ ، لەوما درۆشمێ ئاڤاکرنا کوردستانەکا بھێز بۆ ھەلبژاردنێن پەرلەمانێ کوردستانێ بلند کریە و بێ شکر ژی لداھاتەکێ نێز دێ ڤان درۆشما پراکتیزە کەت و کەتە واقع .
پرانیا خەلکێ باوەری بڤێ ھێز و راستیا پارتی ھەیە ، چەوا ل ھەلبژارتنێن چۆیی یێن جڤاتا نوونەرێن عیراقێ پارتی کرە ھێزا ئێکێ لسەر ئاستێ عیراقێ و کوردستانێ ، ب گەرم و گۆری و باوەریەکا خۆرتر لڤان ھەلبژاردنان دێ پالپشتیا پارتی دیموکراتی کوردستان کەن بۆ ئاڤاکرنا کوردستانەکا بھێزتر و جڤاکەکێ بەختەوەر تر . چونکی خەلکێ کوردستانێ دزانیت پارتی ھەردەم پێشگر و پێشەنگا ڤێ چەندێ یە و خودان بریار و بەرنامێ نەتەوی و نشتیمانیێ کوردستانی یێ سەربخۆیە ، نەوەکی ھندەک حزبان ھەردەم پاشگرێن رستێن نەتەوی و نشتیمانی و بەختەوەریێ نە و ب دەسھەلات بوونا وان کوردستان بێ ھێز و ئیرادە دبیت و جڤاک ژی بێ ئۆمێد دبیت .