دەمێ پارتی دیموکراتی کوردستان بەری حەفتێ و دوو سالا لسەر دەستێ رێبەرێ نەتەوا کورد مستەفا بارزانی ھاتیە دامەزراندن ، سیستەمێ دیموکراسی وەک پرنسیپ و ستراتیژیەت بوویە . رەنگە بۆ وی سەردەمی جھێ حیبەتیێ بیت ، پارتیەک دناڤ جڤاکەکێ سادە ژلایێ رەوشەنبیری و جڤاکی و سیاسی و ئابووری و ھزرا نەتەوی و زاڵبوونا ھزر و ئایدیۆلۆژیێن دیتر ، سیستەمێ دیموکراسی بکەتە پرنسیپ و رێگا بدەست ڤەئینانا ماف و ئارمانجا .
دڤان حەفتێ دوو سالان دا خەباتەکا زۆر بۆ کریە و قوربانی ژی پێخەمەت داینە .
ئەڤە ئێکە ل ئیلھام و دووربینیێن بارزانی نەمر ، کۆ لوی دەمی زانی یە سیستەمێ دیموکراسی دێ بیتە سیتەمەکێ جیھانی و پێتڤی پێ بووما مرۆڤایەتیێ ، بۆ ئازادیێ و بەختەوەریێ رێڤەبرنا سیستەمێ سیاسی و کارێن رۆژانە .
ئەگەر دیرۆکا خاباتا پارتی لبەرچاڤ بگرین ، دێ خۆیابیت ، پارتی د ھەمی سەردەمان دا سیستەمێ دیموکراسی بجە ئینایە ، چ ل سەرەدەری دگەل دوژمنی لدەمێن شۆرەشێن چەکداری ، یان ل رێڤەبرنا دەسھەلاتی ل دەڤەرێن بن دەسھەلاتاوی وێ . لسەر ڤێ چەندێ نمۆنە ژی دزۆرن ، وەک رەتنەکرنەڤا دیالۆگ و دانۆستاندنا و سەرەدەریا مرۆڤانە دگەل دیل و سەربازێن دوژمنا و شێوازێن دامەزراندنا سازیێن وەلاتی و رێڤەبرنێ .
ئەڤرۆ ژی پشتی بوورینا چەندین سالا بۆ پرانیا جیھانێ خۆیا بوویە ، بۆ پێشڤەبرنا جڤاکا و بەختەوەریێ و دادوەریێ پێتڤی ب ڤی سیستەمی ھەیە . پشتی ئاڤابوونا پەرلەمان و حکومەتا ھەرێما کوردستانێ ب دەسپێشخەریا سەرۆک مەسعود بارزانی تەکەزی لسەر ھەلبژارتن و دیموکراسیێ ھاتیە کرن و د داکۆکیێن پارتی دیموکراتی کوردستان ، دڤان سالان دا پەرە ب ڤی سیستەمی دایە و جڤاک و ئیدارا ھەرێما کوردستانێ بوونە نمۆنێ دیموکراسیەتێ لدەڤەرێ .
راستە پشتی پارتی ھژمارەکا پارتێن کوردستانی ئەڤ درۆشمە بلند کریە ، نەخاسمە پشتی ١٩٩١ . لێ دڤان رۆژان دا کۆ ھەرێما کوردستانێ بەرەڤ ھەلبژارتنێن گشتی دچیت ، پرانیا وان حزبێن کوردستانی ئەوێن ھەتا دوینی پارتی دیموکراتی کوردستان ب پارتیەکا پاشکەفتی و خۆ سەپێن و خێلەکی و نە دیموکراسی نیشا خەلکی ددا و خۆ ب داکۆکیکار و نوونەرێن داستەقینەیێن دیموکراسیێ ل ھەرێما کوردستانێ دیار دادنا و ھەردەم ڕەخنێن وێرانکەر و دۆژمنکارانە ئاراستە پارتی و وێ حکومەتا ھەرێما کوردستانێ دکرن ئەوا ژلایێ پارتی دھاتنە پێک ئینان . دژی داخازا رەوایا پارتی بۆ ئەنجامدانا ھەلبژارتنان رادوەستن و داخاز دکەن ئەڤ ھەلبژارتنە بھێنە پاشخستن ،
ئەڤ ھەلویستێ وان حزبا نەخاسمە بزاڤا گۆڕان جھێ پسیار و حیبەتیێ یە ..؟! ئەرێ بۆ ھەتا دوینێ وە پارتی تاوانبار دکر و ب حزبەکا بنەمالەیی و نە دیموکراسی ھژمار دکر و پەرلەمان و حکومەتا ھەرێمێ ب دەم بسەردا چوویی لقەلەم ددا و داخازا ھەلبژارتنێن بەروەخت دکر ، ئەڤرۆ ھەلویستێن وە بەرۆڤاژی بووینە ..!
ئەگەر راستبیت ھوون حزب و سازیێن دیموکراسی و مەدەنی بن ، چەوا دێ دژی مەدەنیەتێ و بریارا خەلکی ترسن ..! بۆچی دەمێ ھەرێما کوردستانێ د رەوشەکا ھەرە دژوار دا ، لدەمێ شەرێ ھەەر مەزنێ تیرۆرستێن داعش و وێ قەیرانا ئابووریا لسەر ھەرێمێ پشتی بڕینا بۆدجە و مۆچێ ھەرێما کوردستانێ ژلایێ حکومەتا عیراقێ و پاشان ھێرشێن حەشدا شەعبی بۆ سەر ھەرێمێ . وە داخازا حکومەتا کار برێکەر و ھەلبژارتنێن پێشوەخت دکر . ئەڤرۆ پشتی پارتی و سەرۆک مەسعود بارزانی و سەرۆکێ حکومەتا ھەرێما کوردستانێ نێچیرڤان بارزانی .
شیان ھەرێما کوردستان لڤان مەترسیا و قەیرانان دەرباز بکەن و ئاسایشا ھەرێما کوردستانێ ب پارێزن ، ھوون داخاز دکەن ژیێ پەرلەمان و حکومەتا ھەرێما کوردستانێ بھێنە درێژکرن و ھەلبژارتن نەھێنە کرن...! . ئەگەر راستە ھوون پارتیێن نەتەوی و نشتیمانی و دیموکراتخواز بن ، پێتڤی بۆ دوان کاودانێن دژوار دا وە پشتەڤانیا حکومەتا ھەرێما کوردستانێ و رێزدا نێچیرڤان بارزانی کربا ، بۆ مانەڤە قەوارێ سیاسی یێ ھەرێما کوردستانێ و دەربازبوون لوان قەیران و ئاستەنگێن سیاسی و ئابووری و لەشکری ، نەک درۆشمێن ( برووخێ ) وە بلند کربان ..!
لێ دیرۆک و سەربوور بۆ خەلکێ کوردستانێ و جیھانێ خۆیا دکەن کۆ دیموکراسیەت لای پارتی پرنسیپ و باوەری و پلان و بەرنامەیە و لای وەژی تنێ درۆشمێن بریقەدارن بۆ سەردابرنا خەلکی و گەھشتن ب دەسھەلاتێ و وە چ باوەری پێ نیە . ئەگەر نە ل بریار و دەنگێ خەلکی ناترسن .
لێ دیارە پشتی سەرکەفتنا مەزنا پارتی ل ھەلبژارتنێن ١٢/٥/٢٠١٨ یێن جڤاتا نوونەرێن عیراقێ و شکەستنا مەزنا وە ل وان ھەلبژارتنان ، باوەری بۆ وە چێبوویە کۆ خەلکێ کوردستانێ باوەری ب درۆشم و درەوێن وە نەمایە و دھەلبژارتنێن داھاتی دا دێ تووشی شکەستنێن مەزنتر بن .