كەركووك شاری پێكەوەژیان و كلیلی ئاشتییە، هەر لە دێرزەمانەوە كەركووكییەكان پێكەوە دەژین و پەیوەندیی بەهێزی كۆمەڵایەتییان بە یەكەوە هەیە، سەرەڕای جیاوازیی ئیتنی و نەتەوەییان، بەڵام ئەمە هەمووی سەرئەنجامی رەسەنێتی و پەیوەندیی بەهێزیانە بە شارەكەیانەوە، هەر چی حكومەتە یەك لە دوا یەكەكانی عێراقیشە هەوڵیان داوە ئەو پەیوەندی و رایەڵی كۆمەڵایەتییە لاواز بكەن، بۆیە لەم رووەوە مەرامی خۆیان خستۆتەگەڕ و تۆوی فیتنەو پەرتەوازەیی و جوداخوازییان لەنێوان تاكەكانی كۆمەڵگەی ئەو شارە رەسەنە چاندووە، دیارە بە زۆر رێگە هەوڵی جێبەجێكردنی ئەم پیلانانەیان داوە، لەوانە: هێنانی خەڵكی لادەو بیانی لە ناوچەكانی دیكەی عێراق لە ژێر زۆر ناودا، مەبەستیشیان لەمەدا سڕینەوەی ناسنامەی راستەقینەی كەركووك بووە، بەڵام هەر چەند هەوڵیاندابێت بۆ شێواندنی ناسنامەی ئەم شارەو شاردنەوەی فاكتە مێژووییەكان، ئەوا ویستی خەڵكی كەركووك لە مەرام و پیلانی ئەوانە بەهێزتر بووە، بۆیە بە ئاشكرا دەتوانین بڵێین: ئەوەی دەیەوێت یاری بە تواناو پیرۆزیی ئەم شارە بكات، چارەنووسی بەزین و شكست دەبێت، بەو كەسانەش كە لە سەنگەرێكی دیكەدان دەڵێین: ئێوە خۆتان و پیلانەكانتان دەچنە زبڵدانی مێژووەوە. پشت بە خوا و ئیرادەی كەركووكییەكان، ئەو هەوڵە نەگریسانەتان سەرناگرن و تێكدەشكێن..
بۆیە شاری كەركووك هەڵوەستەیەكی گرنگی لە ئێمە دەوێت، تاكو لەو چەتە و تاقمانەی غەدر و ستەمكارانە رزگاری بكەین، ئەو شارە پێویستی بە ئاوەدانكردنەوە هەیە، بەتایبەتیش ئەو ناوچانەی كە لە ئاكامی شەڕی تیرۆریستانی داعشدا زەرەرمەند بوون و هەموو خانووبەرەو قوتابخانەو فەرمانگەو زەوی و بێستانی جووتیاران زیانی زۆریان پێگەیشتووەو خەڵكەكەشی ئاوارە بوون. ئەو تیرۆریستانەی داعش ئەو ناوچانەیان بۆ سەردەمی پێش پیشەسازی گەڕاندبۆوە، خەڵكەكە بێكار بوون و بە هەزارانیان لەئێستادا بێ ئیشن و باری گوزەرانیان زۆر خراپە، پێویستە بە جددی كاربكەین و بە یەكەوە هەوڵبدەین شایستەی كەركووك لە پارەی پترۆدۆلار بگێڕینەوەو ئەو گەنجانەی بێكارن و لەئێستادا هیچ ئیشێكیان دەست ناكەوێت، هەتا بە شێوەی گرێبەستیش بێت دابمەزرێنین. ئەوەی كە پەیوەستیشە بە بارودۆخی ئەمنییەوە، (مەبەستم ئەمنییەتی شارەكەیە) ئەوا تەنیا بە رێگەی بوونی هێزی ئاسایش و پۆلیسی خۆجێیی كۆنتڕۆڵ دەكرێت، بەڵام لە باشووری كەركووك ئەم دۆخە شلۆقەی ئەمنی تەنیا بە یەك رێگە چارەسەر دەكرێت، ئەویش پێكهێنانی فەوجی برایەتییە لە هەموو پێكهاتەكانی پارێزگاكە تاكو بتوانین سنووری ئیداریی نێوان هەر سێ پارێزگای (نەینەواو سەڵاحەدین و دیالە) كۆنتڕۆڵ بكەین. من لەوەتەی ساڵی 2012وە ئەو پێشنیارەم پێشكەش بە سەركردایەتی كردووە، بۆیە بەم چارەسەركردنە دەتوانین ماددەی (140)ی دەستووری عێراقی بەبێ هیچ كێشەیەكی سیاسی جێبەجێ بكەین. لە كۆتاییدا دەڵێین: ئەگەر ئەم هەنگاوانەمان هەڵهێنا، واتا توانیمان ئیرادەی هاووڵاتیان لەو ناوچانە لەبەرچاو بگرین، چونكە حكومەت شەرعییەت و هێزی خۆی لە شەقام واتا لە گەلەوە وەردەگرێت.