دوێنێ شەو لە بابەتێکدا بەناوی (عێراق بەرەو کوێ) تیشکم خستە سەر ئەو شەڕەی ئەمڕۆی ناوماڵی شیعە، ئەوەتا شەڕەکەی ناوماڵی شیعە بەرەو گەرم بوون دەچێ، شەڕەکەش لەودیو پەردەوە ئێران و ئەمەریکا بە وەکالەت بە شیعەکانی دەکەن، هەردوو بەرەی ناوماڵی شیعە بانگەشەی ئەوە دەکەن کە کوتلەی زۆرینەی پەرلەمانیان درووست کردووە، ئەوە لە کاتێکدایە کورد تا ئێستاش بە هیچ لایەکدا نەشکاوەتەوە.
شەڕەکەی ناوماڵی شیعە گەیشتۆتە ئەو ئاستەی کە تۆمەت بۆ یەکتری هەڵبەستن و یەکتری تاوانبار بکەن، چەندی ئەو شەڕەش گەرم بێ لە بەرژەوەندی کوردە، بۆیە پێویستە کورد لەو ناوەدا یەکگرتوو بێ و بە هەڵوێستی کوردانە و ئامانجی نەتەوەییەوە بچێتە ناو رووداوەکانی ئەو شەڕەی ناو ماڵی شیعە.
خاڵێکی تر کە دەمەوێ ئاماژەی بۆ بکەم ئەوەیە کە هەرکامێک لەو دوو بەرەیە کوتلەی زۆرینە پێکبێنن و حکومەت درووست بکەن، شەڕەکە کۆتایی نایا، چونکە شەڕی بە وەکالەتە و ئەمەریکا و ئێران پێیان دەکەن، ئەو دوو وڵاتەش گرەویان لەسەر باڵادەستی و دەرپەڕاندنی یەکتری کردووە، جا هەرکامێکیان باڵادەست بێ و ئەویتریان دەرپەڕێنێ شەڕەکە گەرمتر دەکات، چونکە دەرپەڕاندنی ئێران لە عێراق کاریگەری لەسەر ناوخۆی ئێرانیش دەکا و بەرەو ئەو رۆژەی دەبات کە لێی دەترسێ، دەربەڕاندنی ئەمەریکاش لە عێراق کۆی بەرژەوەندیەکانی لە ناوچەکە و دۆستەکانیشی دەکەونە ژێر رەخمەتی سیاسەتی فراوانخوازی ئێران، بۆیە جارێکی تریش دەڵێم: ئەو شەڕەی ئەمەریکا و ئێران بە وەکالەت بە عێراقیەکانی دەکەن، شەڕی دابەشبوونی عێرقە و محاڵە بێ دابەشبوونی عێراق کۆتایی بێ، ئەوەش وەک لە بابەتەکەی (عێراق بەرەو کوێ) ئاماژەم بۆ کردووە، رۆژ رۆژی کوردایەتی و نەفرەت کردنە لە حزبایەتی، هەر حزبێکی کوردیش خۆی لەو راستییە بدزێتەوە خیانەت بە رابردوو و ئێستا و داهاتووش دەکات و دەکەوێتە بەر نەفرەتی مێژوو.
خوێنەریش دەتوانێ بگەڕێتەوە بۆ بابەتی (عێراق بەرەو کوێ)