کار و رەفتار و بەرھەمێن مرۆڤێن کاریزما و داکۆکیکار و پارێزەرێن ماف و بەرژەوەندێن ملەتی ، ب پیتێن زێڕین دناڤ دیرۆکا نەتەوەی دا دھێنە تۆمارکرن و ناڤ و بانگیا وان ھەردەم د بیردانکا تاکێن جڤاکی و مرۆڤ دۆستان دا یا زیندی یە . مینا گاندی یێ ھندی و ماندیللایێ ئەفریقا باشوور و عومەر موختارێ لیبی و گیڤارا یێ ئەرژەنتینی و ..ھتد
ئەڤ جۆرە مرۆڤە ژی بەراوورد دگەل ژمارا خەلکی لسەر ئاستێ جیھانێ دکێمن ، ڕەنگە ھەر نەتەوەیەکی ئێک دوویەک لێ سەرھەلبدەن و د بیت ھندەکان ئێک ژی نەبیت . ئەگەر ئەڤان کەسایەتیان ناڤ و بانگیەکا دیروکیا ھەتا ھەتا درۆست کربیت ،
لێ کاریزما و رێبەرێ نەتەوا کورد کورد مستەڤا بارزانی ، ژبلی کو لسەر ئاستێ جیھانێ ناڤ و بانگیەکا مەزن گەھاندی یە و بوویە ناسناما نەتەوا کورد ، ژبلێ ڤێ چەندێ دناڤ ماڵباتێ دا قوتابخانەیەکا مەزن و بەردەواما پێگەھاندنا ڤان کەسایەتیێن کاریزما و کارگەر و شۆرەشگێر و داکوکیکارێن بدەستڤەئینانا ماف و ئارمانجێن نەتەوی ئاڤاکرینە و شیاینە نەتەوا کورد ل پیلانێن دوژمنا یێن قڕکرنا نەتەوی رزگار بکەن و دەسکەفتێن مەزن ژی بدەستڤە بینن .

ھەر لسەردەمێ شەھید شێخ عبد السلام بارزانی و پاشان شێخ ئەحمەدی بارزانی بلیمەتی و کاریزمایی دناڤ ڤێ ماڵباتێ بەرچاڤ بوینە . ئەگەر بارزانی نەمر ب پشتەڤانیا شێخێن ماڵباتێ ل شۆرەشێن بارزان یێن ئێکێ و دوویێ دا ، دەست ب ھەوێن رەوشەنبیریا نەتەوی و چاکسازیێن جڤاکی و مللەت فێری داخازیێن ماف و ئارمانجا کربیت ، ل دامەزراندنا پارتی دیموکراتی کوردستان ،
قوتابخانا پەروەردەیا نەتەوی و نشتیمانی و شۆرەشگێری دامەزراندیە و ل شۆرەشێن دیفرا وەک ئیلۆن و گۆلانێ دەسکەفتێن نەتەوی بدەستڤە ئینان و مەزنتر سەرکەفتن ب ئیرادا خەلکێ کوردستانێ بسەر مەزنترین دوژمن تۆمار کرن ، لسەر ڤێ چەندێ را سیستەمێ دیموکراسی ژی کۆ بۆ وی دەمی سیستەمەکێ نامۆ بوو بەرپارکر و رێبازەکا تایبەت ژی بۆ بزاڤا رزگاریخوازیا کوردستانی دانا بناڤێ رێبازا بارزانی .

پشتی وی ژی جەنابێ سەرۆک بارزانی لسەر بنەمایێ وێ رێبازا پیرۆزا ئازادی و رزگاریێ بەردەوامی دایێ سەرکەفتنێن مەزنتر تۆمار کرن ، مینا سەرپەرشتی و پشکداریا راستەوخۆ لشۆرەشا گولانا پێشکەفتنخواز و بەرەیێ کوردستانی و سەرھەلدانا پیرۆزا سالا ١٩٩١ و ئاڤاکرنا پەرلەمان و حکومەتا ھەرێما کوردستانێ و پاراستنا ڤێ ئەزمۆکا حوکمرانیا سیاسی و ئیداری برەنگەکێ سەردەم د کاودانێن بەرتەسک دا .
ھەتا دگەھیتە سەرۆکاتیا ھەرێما کوردستانێ و شکاندنا مەزنترین ھێزا تیرۆرستیا جیھانی یا داعش و سەرئێخستن و سەرپەرشتیا ئێکەم راپرسیا سەرخۆبوونا ھەرێما کوردستانێ د دیروکێ دا ل ٢٥ ێ ئیلۆنا سالا ٢٠١٧ . وەک کەسایەتیەکێ کاریزما لسەر ئاستێ جیھانێ دیار بوو .

سەرەرای ھەولێن دوژمن و داگیرکارا بۆ تێکدانا رەوشا ئێمناھیا کوردستانێ ب ھیمەت و پلانێن ئەندازیارێ ئێمناھیێ ھێژا مەسرور بارزانی ھەرێما کوردستانێ ب ئێک ل دەڤەرێن ئێمن مایەڤە و ئەڤەژی نیشانێ کەسایەتیێ کاریزمایا جەنابێ وی یە .
پشتی پیلانا خیانەتکاریا ( ١٦ ) ئیکتۆبەرا سالا ٢٠١٧ ژلایێ باندەکێ نافخۆیێ ھەرێمێ دژی بەرژەوەند و دەسکەفتێن خەلکێ کوردستانێ و پاراستنا بەرژەوەندێن داگیرکارا و لاوازکرنا پێگەھێ ھەرێما کوردستانێ لسەر ئاستێ عیراقێ و جیھانێ و گەمارۆدانا ھەرێمێ ژلایێ ئابووری و سیاسی و ھەولێن داگیرکرنا کوردستانێ ژلایێ دەولەتا عیراقێ و میلیشیایێن شیعی ب چاڤدێریا پاسدارێن ئیرانێ .
ب سیاسەتا کاریزمایا جەنابێ رێزدار نێچیرڤان بارزانی سەرۆکێ حکومەتا ھەرێما کوردستانێ ، ھەمی ئەو پیلان ھاتنە ژناڤبرن و پێگەھێ ھەرێما کوردستانێ ژلایێ سیاسی و دبلۆماسی و ئیداریێ ھاتنە پاراستن و پێشڤەبرن .
ئەڤەژی مەزنترین سەرکەفتن و خۆراگریا کوردستانێ بوو بەرامبەر پیلانێن نافخۆیی و ھەرێمی ب حیکەمەتا جەنابێ سەرۆکێ حکومەتا ھەرێمێ و ئەڤ سیاسەتا وی یا سەرکەفتی ھەمی جیھان حیبەتی کر و پێگەھێ وی ژی لسەر ئاستێ جیھانێ بھێزتر و خورتر بوویە و بوویە کەسایەتیەکێ کاریزمایێ جیھانێ و چاڤدێرەکێ سیاسیێ عەرەب ب ماکروونێ رۆژھەلاتا ناڤین ھژمار دکەت ، ئەڤ ھێمایە ژی دەسکەفتەکێ مەزنە بۆ پارتی و خەلکێ کوردستانێ ب گشتی .
برەنگەکێ گشتی دشێین بێژین پارتی و بنەمالا بارزان فێرگەھا پێگەھاندن و کەسایەتیێن کاریزمایە . چونکی لدەمێ سەد سالایە ئێک لدیف ئێک کەسایەتیێن کاریزما دناڤ ڤێ ماڵباتێ سەرھەل ددەن و فاکتەرێن بدەستڤەئینانا ماف و ئارمانج و ئازادی و گەشەبوونا کوردستانێ بوونە و بۆ نفشێن داھاتی ژی کەسایەتیێن کاریزما بەرھەڤ دکەت . و ئەز باوەرم لسەر دەستێ وان ئارمانجا دووماھیێ یا گەلێ کورد کۆ سەرخۆبوونە دێ گەھیت .