هه‌رێما كوردستانێ پشتى چه‌ندین قه‌یرانێن سیاسى و ئابۆرى و له‌شكه‌رى نوكه‌ ره‌وشا وێ یا به‌ره‌ڤ ئارامبوونێ دچیت و دبیت ئه‌ڤ ئارامبوونه‌ ب تنێ یا گرێدایى ده‌مى بیت ئانكو دگه‌ل بۆرینا ده‌مى دێ پتر بۆ وه‌لاتیان دیار بیت كو هه‌رێم یا به‌ره‌ڤ كه‌نارێن ئارامبوونه‌كا ته‌مام پێنگاڤێن خوه‌ د هاڤێژیت.
بێگومان ئه‌ڤ ئارامبوونه‌ به‌رهه‌مێ خوینا شه‌هیدێن قه‌هره‌مانه‌ و فرمێسكێن چاڤێن دایكێن شه‌هیدانه‌ ئه‌وێن ب خوینا خوه‌ به‌رگرى ژ هه‌رێما كوردستانێ كرى و خوراگرییا وه‌لاتیێن هه‌رێما كوردستانێ یه‌، كو هه‌رده‌م سه‌رۆكێ حكومه‌تا هه‌رێما كوردستانێ نێچیرڤان بارزانى ته‌كه‌زێ ل هندێ دكه‌ت كو خوراگرییا وه‌لاتیان ئه‌م ژ گه‌له‌ك قه‌یرانان رزگار كرین و ب ڤێ خوراگریێ كوردستانێ یا به‌ره‌ڤ پاشه‌رۆژه‌كا گه‌ش و گه‌شتر ڤه‌ چیت.
نوكه‌ وه‌لاتێن جیرانێن هه‌رێما كوردستانێ د ره‌شه‌كا خراب یا ئابۆرى دانه‌ و مه‌ترسیا هه‌لوه‌رینا ئابۆرێ ئیرانێ و تۆركیا د رۆژه‌ڤێ دایه‌ و گه‌فێن مه‌زن ل سه‌ر ئیراقێ ژى هه‌نه‌ ئه‌گه‌ر گوهداره‌كا باش نه‌بیت بۆ ئه‌مریكا و ب تایبه‌تى بۆ ترامپى د ڤان هاوكێشێن ئالۆز دا نوكه‌ پێگه‌هێ هه‌رێما كوردستانێ یێ به‌ره‌ڤ بهێزبوونێ دچیت و ئاینده‌كێ گه‌ش چاڤه‌ریی هه‌رێمێ دكه‌ت.
یا گرنگه‌ هه‌موو لایه‌نێن سیاسى پشته‌ڤانیا حكومه‌تا هه‌رێما كوردستانێ بكه‌ن و ب تایبه‌تى سه‌رۆكێ حكومه‌تێ نێچیرڤان بارزانى، ژبه‌ركو بارزانى تاكه‌ كه‌س بۆ ب سیاسه‌تا خوه‌ یا نه‌رم شیایى هه‌رێما كوردستانێ به‌ره‌ڤ جهه‌كێ ئارام ببه‌ت و ژ هه‌موو مه‌ترسیان ب پارێزیت بارزانى شیایه‌ د ماوه‌یه‌كێ كورت دا ئابۆرێ هه‌رێما كوردستانێ به‌ره‌ڤ باشبوونێ ببه‌ت وه‌كو درستكرنا چه‌ندین پرۆژان نموونه‌ ڤه‌كرنا چه‌ندین وێستگه‌هێن به‌رهه‌م ئینانا كاره‌بێ ل سلێمانیێ و باشتركرنا مووچه‌یێن فه‌رمانبه‌ران و بهێزكرنا پێگه‌هێ هه‌رێما كوردستانێ وه‌كو لایه‌نێ دبلۆماسى هه‌م ل سه‌ر ئاستێ نافخوه‌ و جیهانێ.
چاوا به‌ره‌ڤ به‌غدا بچین یا گرنگه‌ هه‌موو پارتێن سیاسى ب ئێگ ده‌نگى به‌ره‌ڤ به‌غدا بچن ئانكو ب به‌رنامه‌یه‌كێ هه‌ڤپشك به‌ره‌ڤ به‌غدا بچن بۆ هندێ كوردان سه‌نگا خوه‌ هه‌بیت ئانكو ل به‌غدا كوردایه‌تى بلا پێشه‌نگ بیت نه‌ك حزبایه‌تى و هه‌رده‌م سه‌رۆكێ حكومه‌تێ ئاماژه‌ بهندێ كرییه‌ ئه‌گه‌ر كورد ل به‌غدا ئێك نه‌بن چ ده‌ستكه‌فتان ب ده‌ستخوه‌ڤه‌ نائینن.
ل دوماهیكێ یا گرنگه‌ ئه‌م وه‌كو هه‌موو ملله‌تێن دنیایێ كار بكه‌ین بۆ ئاڤاكرنا وه‌لاتێ خوه‌ و ئه‌گه‌ر كێماسیه‌ك ل جهه‌كى هه‌بیت ئه‌م بزاڤێ بكه‌ین وێ كێماسیێ نه‌هێلین بۆ هندێ ل داهاتى ئه‌م سه‌رفراز و به‌خته‌وه‌ر بین، ژبه‌ركو سه‌رفرازى به‌خته‌وه‌رى یا د خزمه‌تكرنا وه‌لاتى دا.