پشتی ھەر دوو روویدانێن (١٦) ئۆکتۆبەر و عەفرینێ، وەسا دیار بوو بۆ کوردان ئاساییە چاڤەڕێی ھەر پێشھاتەکا سیاسییا نەچاڤەڕێکری بن، ھەتاکۆ ئەو تشت نەمانا قەوارا سیاسییا ھەرێما کوردستانێ بیتن. پشتی ڤان روویدانان و بێگۆمان دێ حەز و ڤیانا دژمنان بۆ ڤێ چەندێ پتر و بھێزتر بیتن. ئەوێن پشتا خۆ بۆ رەتکرنا ڤێ ھزرێ و حەزا نەیاران ب تشتەکێ وەکی دەستووریبوونا وێ ھەرێمێڤە گرێددەن، ژبیرا خۆ دبەن چەند جاران و د چ بابەتاندا بەغدایێ ئەو دەستوور پاشگۆھێ خۆڤە ھاڤێتییە و کەسێ ژی نەگۆتییە وان " ئحم"، و بۆ وان و جیھانێ تنێ ھنگی دەستووری رامانا خۆ ھەبوویە دەمێ بەرژەوەنیێن وان تێدا بێنەپاراستن. چونکی د دیتنا وان دا ئەو بەرژەوەندی و سەروەرییا وەلاتان گرنگە و تێدا ئەو بەرژەوەندی د پاراستینە نەک چ تشتەک دیتر ھەتاکۆ ژیانا ھزاران مرۆڤێن کوردستانێ ژی بیت.
ڤان دوو کارەساتان زمانێ خەلکێ درێژ و گازندە زێدەکرن، بەلێ پا نیشاندان چەوا جیھان دناڤبەرا شەڤ و رۆژەکێ "ژ ڤی دەستی دچنە د یێ دیتر دا"، و چەوا ژ وەلاتەکێ پشتەڤانێ کوردان و ھەلگرێن ئالایێ دیمۆکراسیەتێ، بۆ وان بەرژەوەندییان، دبنە مەزنترین دژمنێن مە و دیکتاتۆرپەرێست، و چرایێ کەسک بۆ جینۆسایدا کوردان ھلدکەن، و نەخاسمە د ڤێ ململانێیا دژوارا دناڤبەرا ئەمریکا و رۆسی و ئەورۆپایێ، کۆ بێگۆمان ئەگەر عێراق وێ ھزرێ بکەت و دەستکەفتەک مەزن و درێژخایەن پشکشی ھندەک یان ھەمیان بکەت دێ گەلەک ئاسان و ئاسایی و پاشان ژی دەستووری و یاسایی لێھێتن، وەک گەلەک بابەت و جار و وەلاتێن دیتر د مێژوویێدا، و ھنگی رەشکرنا ڤێ قەوارێ وەکی ئاڤا ڤەخوارنێ بیتە دیفاکتۆیەک، و خەون و ئەفسانەک ل داھاتووی، و کەس ژبلی کوردان رۆھندەکا گریێ ژی بۆ ناکەن، و تنێ دێ بیتە مائاڤاییا تاکێ کوردی ژ دیرۆکێ و رەھەندێ جۆگرافیێ و دەمی د جیھانێدا، و وەک بسەرێ گەلەک نەتەوان ھاتی و دھێتن. ئەڤە چیڕۆکەکا تەحلە بەلێ گەلەک جاران یا چێبووی، و نەخاسمە کوردان چەند جاران یا تامکریێ، لێ بۆ ڤێ جارێ خاترخاستنەکە ژ ڤێ جیھانێ بۆ ئێکجاری. سیاسەتا جیھانێ بێ دەیک و بابە، و پێدڤی ب ھۆشیارییەک مەزنە، کورد دگەل دەرناکەڤن. مەزن دبێژن:"دوژمنی ب کێم وەرنەگرە"!
ھەر سێ نەتەوێن دۆرماندۆری مە، چ جاران ھندی ڤێ جارێ ھەست ب مەترسیێ و گەفێن کوردببونا مە نەکرییە، و چ جاران ژی ھندی نۆکە ئیکرگرتی نەبووینە، و وەلاتێن دیترێن دەڤەرێ و جیھانێ ژی تنێ دەروکەرێن دیپلۆماتیکن و ئەکتەرێن ژێھاتی و شەھرەزانە و رۆلێ خۆ باش دزانن و باش دلەیزن، و گەلەک باش دشێن دناڤ پیرۆزییا سنوورێن وەلاتێن داگیرکەرێن کوردان، ل ستەما کوردان بێدەنگ بن و جیھانێ بێدەنگ بکەن. د بەرامبەر وێ ژی چ جاران ھندی نۆکە کورد ب ھێڤی و ئۆمێد نەکەفتینە و رژد نەبووینە، لەما نەمانا ڤێ ھەرێمێ ئێکسانە دگەل نەمانا کوردان، چونکی ھێی سێ نەتەوێن بھێز دێ بنە نەتەوێن زلھێز ل دەڤەرێ و سنوورێن خۆ یێن نەتەوەیی گەھیننە ھەڤ، و کوردان دناڤ خۆدا و بشێوازێن جۆدا حەلینن. چونکی ھێدی ھەرێمەک کوردی نینە بۆ وان قەلایەک و شویرھەک بیت تێدا خۆ بپارێزن و منارەک دبلۆماسی و سیاسی بیتن گازی جیھانێ بکەن. ھنگی دێ چاخێن رەش دەستپێکەن. سایکۆلۆژیایا تاکێ کوردی ل ھەمی پارچێن کوردستانێ ژبەرئێک چیت و ھەڕفیتن و شکۆیا خۆ ژدەستدەتن، و ب سەدان رەشەک و جارەک دیتر و و بھێزتر و خۆرتتر ژ ھەر جاران، بناڤێن وەکی جاش و ( مۆستەشار) و ( رەفیق حزبی) و ( ئستخبارات) و ( ئەمن) و ( قوات خاسە) و ... ھتد، لڤێ پارچا کوردستانێ پۆل پۆل دەرگەھێن کوردان بقۆتن و بکەڤنە بەرسنگێ دوژمنان، و گەنج و کچ و خۆرتێن کوردان، وەک تاوانبارێن جەنگی و بەلکۆ خرابتر و وەکی ھنگی و بەرێ و بناڤێن وەکی ( مۆخەرڕب) و ( ھارب) و ... ھتد، ببن بیابانێن عەرعەر و ( جنوبی) و ... ھتد، و بنئاخ بکن یان ژی ل زیندانێن نۆگرە سەلمان و ئەبووغرێب و ... ھتد، ب ھەمان ناڤ و تاوان، و د ڤێ جارێ و قۆناغێدا تاوانێن دیتر ژی ھاتنەسەر و ئەو ژی پشکدارییە د ئاڤاکرنا ھەرێمێ و ریفراندۆمێ و ...ھتد، وان ل سێدارە دەن یان ژی ب کرێتترین و درَندەترین شێوەیێن ئەشکەنجەدانێ بکۆژن، و نەخاسمە پشتی قوتابخانا تیرۆریستێن وەھابیێن داعشێ و لدوڤ وان میلیشیایێن شێعە و سۆننەیێن دیتر فێری گەلەک ھۆنەرێن دیترێن وەک سەرژێکرن و سۆتاندن و ... ھتد، ژی بووین، وان ھۆنەرێن دڕندە دگەل کوردان ژی بکاربینن.
پشتی نەمانا وێ ھەرێمێ وەلاتێن ئیران و تورکیا و سووریا ژی خۆرتتر و دڕندەتر بن و ھەمان ھۆنەران و بناڤ و جۆر و تاوانێن دیتر دگەل کوردێن وان پارچان ئەنجامدەن، و بێگۆمان ھەمیشە خەلکەکێ ھەبووی و دێ ھەبن، وەکی گەلەک جاران ببنە سەرکاروانێ ڤان رەفتاران و بۆ چەند دەستکەفتەکان بکەڤنە بەرسینگێ دوژمنان و ھاریکاری و رێبەرییا وان بکەن بۆ وان تاوانان.
ھنگی جیھان دێ بێدەنگ بیتن، چونکی دێ بیتە بابەتەک ناڤخۆیی و تایبەتێ وەلاتێن داگیرکەرێن کوردان، و ھێدی کەس سەرێ خۆ ب مە ڤە و بۆ مە نائێشینیتن، چونکی کەسێ چ شۆل ب کوردان نەماینە، و کوردان ھێدی ئەو شیان و ھێز نینە بۆ وان بجەنگت، و داعشەک نەمایە ئەم خۆ بۆ وان لێبدەین و پەترۆلەک نینە بفرۆشنێ و پارە ژە نابت تشتێ وان وەلاتان بکڕین، ھەتاکۆ ئەو گلێش و گلدەخێ ل وان وەلاتان دکەنە پتاتۆک و ( مەعلووبات) و ... ھتد، لەوما ژناڤبرنا کوردان نەک تنێ دێ بیتە تشتەک ئاسایی، بەلکۆ ژی کەنە یاسایی و دەستووری، و ئەڤە بۆ وان بسانەھییە، و حکومەتێن ناوەندی ژی دێ شانازیێ ب جینۆسایدا کوردێن جۆداخواز بەن، و بنە شانازی بۆ دەڤەرێ د ڤێ تاوانێ دا، و وەلاتێن جیھانێ ژی چەپلا بۆ قۆتن، چونکی ( ئیمتیازا) دەرئێخستنا پەترۆلێ بۆ (٢٠٠) سالان و فرۆتنا سەدان ھزار تەنێن چەکی و تەقەمەنی و گازێن کێمیاوی و فڕۆکێن شەڕکەر و دەستبسەرداگرتنا بازاڕی و پیشەسازی و ... ھتد، بێ بەرامبەر و تنێ ئەو نەبیتن ئەو وەلات د ھاریکار بن و پشتەڤانییا قڕکرنا کوردان بکەن و چرایێن کەسک بۆ ھلکەن، ھێدی ژ وەلاتێن دیمۆکراسی کراسەکێ دیپلۆماسی کەنە بەر خۆ و (٣٦٠) پلا خۆ گھۆڕن.
پشتی ڤێ کارەساتێ، و بدۆماھیکھاتنا چیڕۆکا کوردان، تاکێ کوردی دێ بیتە خۆدان دلەک سۆتی و رەش ژ جیھانێ و ژیانێ، و دەروونەک ھەڕفتی، و جڤاکەک ژبەرئێکچۆی، و نەتەوەک ژناڤچۆی، و ب سەدان ھزار کەس و گۆند و ھۆز و دەڤەر ژ ترسا گیانی و نەتەوێ خۆ گھۆڕن و بنایتێ خۆ گەھیننە بەنی قەحتانی و بەنی عەدنانی و نێزیکتر، یان گەھیننە چەنگیزخانی و ھۆلاکۆی و تەیموورێ لەنگ و بەلکۆ نێزیکتر و خەلیفەیێن ئۆسمانی و ھەتاکۆ ئەتاتوورکی، و ل ئیرانێ ژی ب ھەمان رەنگ.
ھێدی کوردبوونێ و شانازیکرن ب بھایێن کوردەواری د ھەمی پارچێن کوردستانێ چ جھەک د پێکھاتا کەساتیا وی دا نامینیتن، و بزاڤا مانێ و ژیانێ ب ھەر رەنگەکێ و بھایەکی، دێ بیتە مەزنترین ھۆنەر و ئارمانج، ھەتاکۆ ھەکەر ب خیانەتێ و گھۆڕینا ناڤ و نەتەوە و بنیاتی و ... ھتد، ژی بیتن.
بەلێ! ھێدی باوەری ب رۆژئاڤا و دیمۆکراسیەتێ یا بوویە گەف. ئاخفتن و کریارێن وان ھەر چەند خوولەکا وەک ئێک نینە. دبیتن کوردان ژ بلی ئێکگرتنێ و پێکڤەسەرھلدانێ لدژی داگیرکەرێن خۆ و جیھانێ، و دەستھلگرتن ژ ھەر تشتەکی، و مەزاختنا ھەمی سامانێ خۆ د ڤێ رێکێ دا، و خۆ کێمکرن بۆ ھەڤدۆ و چۆنە بن سیبەرا دلسۆزەکێ کورد و رێبەرەکێ خۆدان ئەزموون و کاوەیەکێ ئاسنگەرەکێ چەرخێ بیست و ئێکێ، و بزاڤکرن بۆ پاراستنا ڤێ ھەرێمێ، و گەھشتن ب دەولەتەکا سەربخۆ، یاکۆ ببیتە کەلھەکا وەک دمدم بۆ ھەمی کوردان و ژ ھەمی پارچان و ب ھەمی ئایین و باوەر و جیاوازییان، ھیچ رێکەک ئاسانتر و پراکتیکیتر نەبیتن، چونکی چ دەرگەھیک نینە نەقۆتای و چ رێکەک نینە نەجەڕباندی و کەس نینە کۆلاڤێ خۆ نەکرییە سەرێ مە.
دبێژن:"خیارە ژ تویتکی دیارە"!دیارە پشتی کوردان داعش سەکتاندی و ریفراندۆم کری، و ھەکەر دەڤەر ئارام ببیتن دێ جیھان سایکس پیکۆیەک دیتر بسەر مەدا سەپینیتن نەک سەد سالی بەلکۆ سەد ھزار سالان ڤەکێشیت. پا ھوین بێژن تەکبیر چیە؟؟!! *پرۆفیسۆرێ ە. /بسپۆرێ زانستێن سایکۆلۆژی و پەروەردەیی/فاکۆلتییا پەروەردە/ زانینگەھا زاخۆ