دوای سەدەیەک خەبات و تێکۆشان و قوربانیدان، پێویستە لەم بارودۆخە ھەستیارە ناو ماڵی خۆمان رێکخەینەوە دەبێت ھەموو تاکێکی کورد ھۆشیارانە بیرکاتەوە رێگە نەدات ئەجندای دەرەکی دەسکەوتەکانمان لەناو ببەن.
کورد تاکە نەتەوەیە لەسەر رووی ئەم جیھانە کە تا ئەمڕۆ بە داوا و مافە ڕەواکانی نەگەیشتووە، سەرجەم شۆڕشە یەک لە دوای یەکەکانی کورد لە ھەموو پارچەکانی کوردستان سەرکوت و لەناوبردراون، بەڵام کوردە وەک نەتەوەیەکی زیندوو لە ڕۆژھەڵاتی ناوەڕاست ھەرگیز کۆڵی نەداوە، جوامێر و میرخاسانە ھەوڵی داوە، بۆ دەستەبەرکردنی مافە رەواکانی ھەمیشە لە مەیدانی خەبات جەنگاوە.
بە درێژایی‮ ‬زیاتر لە‮ ‬١٠٠ ساڵی‮ ‬خەباتی‮ ‬رزگاریخوازیی‮ ‬خەڵکی‮ ‬کوردستان، لە عێراق ھیچ جۆرە گفتوگۆ و رێکەوتنێک کاری پێ ناکرێت، ئەوەتا دواجار دەستووری عێراقیش جێبەجێ نەکرا و پشگوێ خرا، ئەوان لە بەغداوە گاڵتەیان بە نەتەوەیەکی قوربانیدەری گەورەی وەکو کورد دێت و تەنانەت مافی ژیانیشمان پێنادەن، لەوانەیە ھەمووان بپرسن، بێدەنگی سەرکردایەتی کورد بۆ لەو کاتەدا، لە وەڵامدا دەمەوێ ئاماژە بەوە بکەم کە بێ دەنگی جەنابی سەرۆک لە بێ دەسەڵاتی و لاوازی نییە، بەڵام با کەمێکی دیکەیش چاوەڕوان بین، وا خەریکە کارتەکانی حکوومەتی شیعە و شەخسی عەبادی تەواو دەبن، ئینجا ئەوکات کارتەکانی جەنابی سەرۆک دەبینن.
لە ئێستادا ھەرێمەکەمان باشترین پەناگەیە بۆ ھەموو پارچەکانی دیکەی کوردستان، دڵنیاشبن سەردەکەوین، ھەرگیز دڕکوداڵی ناحەزان، ناتوانێت ببێتە ڕێگر و بەربەست لەبەردەم ھەنگاوەکانی کورد، ڕێگەیەکی دوور و درێژمان بڕیوە و کەممان ماوە.
ئەو خەونەی سەدەیەکە گەلی کورد چاوەڕوانیەتی، ھەر ئەوە دێتە دی.