د ھەیڤا ئادارێ، مەھا شین و شادیێ بۆ کورد و کوردستانیان، چ ھەیە و نینە بۆ گۆتنێ؟ چەوا کوردستانی گازندا ژ داعش و تیرۆرێ و داگیرکرن و ستەما سەدامێ گۆڕبگۆڕ و دەستە برایێن وی یێن بەری و پشتی وی و نۆکە، ....ھتد، نەکەتن؟ کیژ ملەتەکی وەکی کوردان و کیژ ئاخێ وەکی کوردستانێ قۆربانی دایە؟ تاوانا کوردستانیان چیە ھەر چەند رۆژەکێ جۆرەکێ داعشا لێ پەیدا دبیت، بەلێ ناڤەک نوی و رەنگەک نوی و وەلاتەک دیتر و ....ھتد.
خۆدانێ مەزن و دلۆڤان د پەرتووکێن پیرۆز دا سیمبۆلێ یەکسانیێ و دادپەروەریێ و دلۆڤانیێ و مرۆڤدۆستیێ یە. ئەڤ بھایە د ئاڤێستایێ و تەورات و ئەنجیل و پاشی ژی ل قۆرئانا پیرۆز دا بەردەوام تەکەز لسەر ھاتیەکرن. ساخلەتێن وان پێغەمبەرێن ھەژار و نەدار و بەلەنگاز ژ مالێ دنیایێ، و ھنارتیێن ئەڤ ئایینە ژی بەلاڤکرین بەلگەنە، بەلێ ئەڤرۆکە ھزاران مرۆڤێن ھەین بناڤێ ئایینی وان بھایان بنپێدکەن.
ئەڤرۆکە شێعەیێن سیاسی سۆننەیان کافر، و سۆننەیێن سیاسی شێعەیان ددەینن کافر، و ھەر دوو ژی مە کوردان دشۆبھینن ب کافر و ل پەرلەمان و وەلاتان بۆ ژناڤبرنا مە ئێکدگرن و بڕیاران بۆ نەھێلانا مە ددەن، و پاشی ژی خۆدانێن پەرتووکا تەورات و ئەجیلێ ژی ب ھەمان شێوە ب کافر دھژمێرن. و ئەو ژی ئیرانێ و ئیسلامیان ب نەباوەردار ددەنە زانین. باشە خۆدایێ مەزن: کی کافرە و کی نەکافرە؟ بۆچی ھندەک ئەون و ھندەک نە؟ ئایا تە ل قۆرئانی و ل گەلەک جھێن وەکی (کەھف/٢٩) نەفورموودیە (فمن شاء فلیومن و من شاء فلیکفر) و مە ھوین ژ ژن و زەلامەکی ئافراندن و کرنە پۆل و نەتەوە و یێ ژ ھەمیا بۆ تە نێزیکتر ئەوە یێ ژ ھەمیا باشتر و چێتر ( حەجەرات/ ١٣ ) و ... ھتد.
باشە ھەکەر ھەمی ژ دەیبابەکینە، چەوا ھەتا نۆکە دناڤ رەشپیستا ئێک خۆدێ نەدا چاڤشین و سپی، یان بۆچی ل سویدێ یان ئەڵمانیا زارۆکێ رەشپیست نەھاتەنیایێ کۆ دەیبابێت وی ئەڵمانیەک رەسەن بیت؟ بۆچی ژاپۆنیەکێ رەشپیست نینە؟ بۆچی ڤیتنامیەکێ وەکی رۆسییەکی نەھاتە ڤێ جیھانێ؟ پانێ جیناتێت ھەمی مرۆڤان ل چەند مەلیار کەسان دوو یێن وەکی ئێک دبن و وەکی کەرێ سێڤێ یان سێڤەک تەواون، باشە پا کەنگی ئەو کەس دێ ئێن، و ئەڤە ھزار مەلیار مرۆڤ ھاتن و مرن و چۆن؟ پا کیژ ژ بابێ مەزن و دەیکا مەزن وەکی ژاپۆنی و چینی و ھندیێت سۆر و کیژ ژ وان وەکی ئەورۆپییا و کیژ وەکی کێ بین دا نۆکە ئەڤ نەژادێت نۆکە وەکی ئێک ژ وان بن؟
باشە بۆچی دڤیا بھێتەگۆتن ھندەک کافرن و یێن دیتر نە؟ کی راستە و کی نە؟ باشە پا یا دیتر چییە ھندەک دکەن و دبێژن ؟ و پا تەکبیر چییە؟ ھەکەر حال بڤی ڕەنگییە و ئەڤ حال و ژیانا تەحل و دژوار و ب ترس و پرس ھەمی ژ ھندێ بیتن ھندەک کافرن و ھندەک نە، پا ئەڤا دیتر چییە؟ باشە ھەکەر ھندەکێن وەکی خەیامێ ھۆزانڤان گازندەی دکەن چ دگەھینیت؟
ھەکەر دەستم بگەھیتە چەرخێ گەردوون
ئەزێ پسیار بکم ئەڤ چیە و واھە چوون
تە دایە ئێکی ھزار ناز و نەعمەت
ئێک ژی بدەست دکەڤیتن نانەکا جەھی ب خوون!!
یان ھەکەر وەکی ناڵبەندێ خۆدێ ژێ ڕازی ژی د بەرگێ دووھەم بەرپەڕێ ( ٤٣٢ ) ژ زنجیرە پەرتووکێن ( باغێ کوردان) ھەوار و گازندا خۆ دبەتە بەر دەرگەھێن خۆدایێ مەزن و دبێژیتن:
ب بسم اللە من ئەول ئیبتدایە
ھەمی شۆلا سەبەب اللە خۆدایە
غەنی دان و فەقیر و ساخ و مەعلول
خۆدان ئەملاک و مال و ڕویس و سەرکۆل
.... چی؟ بێگۆمان ئەڤ ھەمی گازندە ھندی ئەتۆمەکی ژی گۆمانێ د مەزناھی و دلۆڤانییا تە لنک مرۆڤان دروست ناکەتن، بەلێ گۆمان تنێ لسەر وانە ئەوێن بناڤێ پیرۆزێ تە جیھان بەعجاندی و بھایێن یەکسانی و دلۆڤانی و برایەتی و دادپەوەری و ڕێزگرتنێ قۆربانی خۆپەرێستی و جیھانا تەژی گرێ یێن دەروونی یێن خۆ کرین. گازندەیێن مە ژی تنێ ژ وان، و تو ھەر یێ مەزن و ئێکانە و پەروەردگاری، بەلێ پا یا ھاتی و دێ بێژین:
یەک جۆھی و یێ دی ژی ئێزدی و فەلە و مۆسلمان
ئەڤــی نــەدیــنە و یـــێ دی ب دیـــن و ئــیــمــان
خۆدایێ مەزن پرسیارا منە ژ تە ئەھوەرامەزدا
ئەڤ چ پیڤانە ئێک دچە بەھشت و یێ دن بۆ جەھنەما خەمان (٣/١/٢٠١٦)
ساقییا مەی بدە و دویر کەڤە ژ من
خەم لنک مەزنن و گرانە بارێ من
نەیار و دوژمن و گەندەڵن مە و تە و من
زەحفن لپەی و پێش و پشتی من
پەیالا من داگرە دا ژبیر بکم وان
چ ژ دەست کەس نائێن و نە من
گەر دەستێن من نەشێن وان
لێ چ مەفەر نینن ژ مرنێ وان
***
گویا فزون عمر جز غم ندارد میوەیی
ناقلایان را نیست جزین مکر و حیلەای
بیخردان را نیک گیرند و گناە نادیدەای
کوش "زردشت" خود جوی دگر ایداەی
مرغان چمنزارانند بسی دلریش و ملول
کزین چرخ و فلک نیاسودند زندەیی
گر خستەای و شکایت داری ز آفرینندەای
دان جھانیان را مروت نیست و نە با بندەای
********

باقییا! دیسان جامی مەی بەدەستم و دێم و دێم
پرسیاری بەردەوامم ھەیە کە : کێن و کێم؟
باشە چۆن و لەم گردوونە من چیم و چێم؟
گەر تو خۆای ئافرینندەیی باشە من بۆچی بێم؟
گەر تویی لە ئاسمان و منیش لە کوردستان
تو لە بەھشت باشە ئەی من بۆ کۆیێ بێم؟
لە نێو ئاگری تۆپ و تانک و داعشان
لە خۆم و تو دەپرسم:"زەردەشت" م من یان کێم؟ (١/٣/٢٠١٨)
............
کورد ھەمیشە یێ ڕاھاتی و فێر بی بچاڤێ حێبەتیڤە تەماشەی خۆ و جیھانێ و ژیانێ بکەت و ھندی چاڤی دگێڕیت لڤێ جیھانێ کەسێ و ھیچ لایەنەکی بەرسڤێن وی ھەتا نۆکە نەداینە. ڤێجا ھەکەر ژ نۆکە وێڤە ئەو ھەمی پرسیار بھێنە بەرسڤدان تشتەک دیترە. لێ د راستیدا، دناڤ دەشت و چیا، روویبار و گیا، دەخل و چۆلی، ... پسیار دکەت ئەڤە چیە بۆ وی ھاتی نڤێسین و بسەرێ وی دھێتن. پرسیارا وی ئەوە ھەکەر مرۆڤە بۆچی وەکی مرۆڤان نینە، و ھەکەر مۆسلمان بۆچی وەکی وانا ھندەک تشت نینە، و ھەکەر کافرە بۆچی وەکی وان ھەمی تشت نینە و ھەکەر جۆھییە دێ کەنگی وەکی وان خۆدان وەلات و کیان و ئالا و نیشتمان بیتن و ھێدی گەندەڵ و خائین و درەوکەر و ستەمکار و داگیرکەر مافێن وی ناخۆن؟
*بسپۆرێ ئەکادیمی د زانستێن سایکۆلۆژی و پێداگۆگی/ زانینگەھا زاخۆ.