دەستکەوتەکانی ئێستا بەری رەنجی رەنجکێشان و خوێن و خەبات و ماندوو بوونی شۆڕشگێڕانی رابردوون، بێ ئاوڕدانەوە و کارکردن لەسەر راستکردنەوەى هەڵەکانی مێژوو مەحاڵە بتوانین دەستکەوتەکانی ئێستا بپارێزین، بۆیە پێویستە چاوێکمان لەسەر راستکردنەوەى هەڵەکانی مێژوو بێ، بێ پاراستنی دەستکەوتەکانی ئێستاش ناتوانین هەنگاوی درووست بەرەو داهاتوو بنێین، بۆیە پێویستە رێز لە دەستکەوتەکانی ئێستا بگرین و بێ بەها سەیریان نەکەین، لێرەوە گرنگی ئاوەڕدانەوە و پەند وەرگرتن لە مێژوو و پاراستنی دەستکەوتەکانی ئێستا دەردەکەون.
ئەوەی دەمەوێ ئاماژەی بۆ بکەم هەندێ کەس و دەستە و گرووپی سیاسی کورد هاوشێوەی دوژمنان و بگرە خراپتریش بەسەر سەروەریەکانی مێژوودا دەڕشێنەوە و سووکایەتی بە دەستکەوتەکانی ئێستا دەکەن و ئاستەنگیش لەبەردەم هەنگاوەکانی داهاتووش درووست دەکەن، ئەو کەس و دەستە و گرووپانەش یا ئەوەتا لە سەروەریەکانی مێژوو بێ بەشن، یا ئەوەتا خاوەنی مێژوویەکی رەشی پڕ خەتا و تاوانکارین، بۆیە چاویان بە سەروەریەکانی مێژوو و دەستکەتەکانی ئێستا هەڵنایات، جا بۆ شاردنەوەی مێژووی رەشی خۆیان چۆنی بۆیان بکرێ ئاوا مێژوو دەشێوێنن و بێ بەها لە دەستکەوتەکانی ئێستا دەڕوانن و داهاتووش دەدەنە بەر نەشتەری بەرژەوەندی تایبەتی خۆیان، بەوەش کۆمەڵگا تووشی دابەش بوون و گرووپبەندی دەکەن وەک ئەوەی ئێستا لە سلێمانی دەگوزەرێ.
مێژووی کورد و داگیرکارانی کوردستان پڕیەتی لە وانە، گرنگترین وانەش ئەوەیە دوژمنان بە هەموو جیاوازی و دوژمنایەتی کۆن و نوێیانەوە، لەسەر دژایەتی کردنی پرسی کورد کۆکن و بەردەوام شەڕی لەناوبردنی کوردیان کردووە، ئەوە کەرکوک و هاوپەیمانێتی فارس و عەرەب و تورک، ئەوە گەرمیان و (ئەنفال)ی عەرەب، ئەوە سنە و مهاباد و (نەسر)ی فارس، ئەوە ئامەد و عەفرین و چڵە زەیتوون و (فەتح)ی تورک، ئەوە هەڵەبجە و کیمیاباران، ئەوە بارزانیەکان و بڕیاری کۆمەڵکوژی و پاکتاوی رەگەزی نێرینە، ئەوە راگواستن و کاولکردنی کوردستان، ئەوە دەیان و سەدان کارەسات و نەهامەتی تر کە کورد لەسەر دەستی رژێمە یەک لە دوای یەکەکانی تورک و فارس و عەرەب بەسەری هاتوون، ئەوەی لەو ناوەدا پرسیارە و پێویستی بە وەڵام هەیە، زۆرێک لە حزب و لایەنە سیاسیەکانی کوردستان تا ئێستاش نایانەوێ پەند لەو وانە مێژووییانە وەربگرن، تا ئێستاش پرسی حزب و بەدەسهێنانی دەستکەوتی حزبی و کەسی نەک هەر پێش پرسی کورد دەخەن، بەڵکو پێش پاراستنی کورد و بەدەستهێنانی دەستکەوتی نەتەوەییشی دەخەن، لێرەوە دوژمنان دەبنە بڕیار بەدەست و چۆنیان بوێ پرسی کورد ئاوا بە لاڕێدا دەبەن.
ئەرێ کاتی ئەوە نەهاتووە پەند لە مێژوو وەربگرین؟ ئەرێ کاتی ئەوە نەهاتووە وەک بە بەرگ و زمان کوردین، بە هەڵوێست و ئاکار و رەوشتیش کورد بین و کوردانە بیر بکەینەوە؟ ئەرێ کاتی ئەوە نەهاتووە کوردایەتی لە حزبایەتی بە گەورەتر و پیرۆزتر بزانین؟