تورک و فارس و عەرەبی برای موسڵمان بە زۆر و بە زەبری هێز کوردستانیان بەسەر خۆیاندا دابەش کردووە، بە هێز و زەبر و زەنگیش هەوڵیانداوە کورد ملکەچی سیاسیەتی داگیرخوازی خۆیان بکەن، هەر کاتێکیش کورد لە دەرەوەی خواستی داگیرکاری ئەو برا موسڵمانانە هەنگاوی نابێ خستوویانەتە خانەی تیرۆریست و وەک تیرۆریست و هەڵگەڕاوە لە دین وەڵامی دراوەتەوە، ئەوە لە کاتێکدایە کورد لەگەڵ ئەو هەموو ستەمە نەتەوەییەی لەسەری بووە رۆژێک لە رۆژان پەنای بۆ کاری تیرۆریستی نەبردووە، بە پێچەوانەوە رژێمە یەک لە دوای یەکەکانی تورک و فارس و عەرەب لەگەڵ هەموو ناکۆکی و دوژمنایەتیە سیاسی و مێژووییەکانی ناوخۆیان، لەسەر چەسانەوە و زەوت کردنی ماف و ئازادیە نەتەوەییەکانی کورد کۆک و تەبا و هاوهەڵوێست بوون، جیا لە بەکارهێنانی زەبر و زونگ و هێز، لە هەر کات و شوێنێک بۆیان هەڵکەوتبێ تیخی ترۆریستییان خستۆتە سەر گەردنی سەرکردە و شۆڕشگێڕانی کورد، زۆربەی کارە تیریریستیەکانیش یان لەسەر مێزی گفتوگۆ بوون، یان لەسەر سفرەی نان خواردن، ئەوە شێخ سەعیدی پیران، ئەوە شێخ عەبدولسەلامی بارزانی، ئەوە سمایلاغای سمکۆ و پێشەوا قازی، ئەوە دکتۆر قاسملو و ئەوە دکتۆر شەرەفکەندی و دەیان و سەدانی تر.
ئەوەی کە دەمەوێ لەو کورتە باسەدا ئاماژەی بۆ بکەم، ئەوەیە کە بارزانی نەمر بەردەوام لە سێرەی تیرۆریستی هەرچوار داگیرکارەکەی کوردستاندا بووە، بە مەبەستی تیرۆر کردنیشی چەندین جار پارە تەرخان کراووە و پیلانی هاوبەشیان بۆ تیرۆر کردنی داڕشتووە، وەک ئەوەی لە ساڵی ١٩٤٣و لە کاتی دەرچوونی لە سلێمانی و گەڕانەوەی بەرەو مەڵبەندی شۆڕش و بەرخودان، هەر یەک لە رژێمەکانی ئەوکاتی ئێران و عێراق بڕی پەنجا هەزار دیناریان کردە خەڵات بۆ هەر کەسێک بارزانی نەمریان بە مردوویی یان زیندوویی رادەست بکات، یان لە کاتی رێڕەوە مێژووییەکەی روباری ئاراس رژێمەکانی ئێران و عێراق و تورکیا بۆ لەناوبردنی بارزانی نەمر و هەڤاڵەکانی چوونە ناو قەفەسی پیلانگێڕییەکی دوژمنکاری، لەوانەش مەترسدارتر ئەو پلانە تیرۆریستیە بوو کە لە ساڵی ١٩٧٢و بۆ تیرۆر کردنی بارزانی نەمر گێڕایان و بە پەرجوو رزگاری بوو، کاتێک چەند مەلایەک بەناوی سەردانەوە خۆیان تەقاندەوە.
جگە لەوەش کاک ئیدریس و سەرۆک بارزانیش بەردەوام هەمان سێرەی تیرۆریستی داگیرکارانی کوردستانیان لەسەر بووە، وەک ئەوەی لە ساڵی١٩٧٤ کاک ئیدریس بارزانی بۆ گفتوگۆ سەردانی بەغدای کرد و هەوڵی تیرۆر کردنیان دا، بۆ تیرۆر کردنی سەرۆک بارزانیش بەردەوام بە دوای دەرفەتدا گەڕاون، جارێک لە وڵاتی نەمسا لە هەوڵێکی تیرۆریستی رزگاری بوو، جارێکیش لە شاخ رژێم بە هاوکاری گرووپێکی ناوخۆ هەوڵی تیرۆر کردنی داو کەسە راسپێردراوەکەش دەستگیر کراو دواتر سەرۆک بارزانی ئازادی کرد، ئەوانە و زۆر کاری تری تیرۆریستی داگیرکارانی کوردستان بۆ تیرۆر کردنی سەرکردە و شۆڕشگێڕانی کورد، بەڵگەی ئەو راستییەن کە لەناوبردنی کورد یان رازی کردن بە سیاسەتی داگیرخوازی ئەوان، لە فەرهەنگی سیاسی و ئەخلاقی تورک و فارس و عەرەب جێگیر کراون و ناتوانن دەستبەرداری ببن.