نەیارانی كورد هەمیشە كاریان لە سەر ئەوە كردووە تا ناتەبامان بكەن ، برسیمان بكەن و بە چەكی كۆمەڵكوژ و ئەنفاڵ و دەیان پیلانی تر ناچارمان بكەن لە ئامانج و مافەرەواكانمان پاشكەز و ساردمان بكەنەوە .دوژمنانی كورد هەر كاتێك هەستیان بە ناتەبایی و ناكۆكیی نێوان ریزەكانی گەلی كورد كرد بێ‌ ، ئەوا ئەو درز و دەرفەتەیان قۆستۆتەوە بۆ ئەوەی رێگری و بەربەست دروست بكەن لە كاروانی خەبات و تێكۆشانمان بۆ گەیشتن بەو مافەرەوایانەی كە دەیان ساڵە لە پێناویدا قوربانیی بۆ دەبەخشین . بۆ پێوستە ئێمەش وەكو هەموو گەلانی جیهان بگەین بە مافەكانمان ، چونكە ئەوەی روودەدات هەموومان لێی بەرپرسین هەر یەكە لە ئێمە پشكێكی لە سەركەوتن و شكستدا هەیە ، كاری ئازادیخوازەكانە داوای یەكریزی و تەبایی كردن ، لای هەمووان ئاشكرایە كورد یەكریز نەبێت بەرگەی شەماڵێك ناگرێ ، چاندنی رق و كینە و شكاندنی یەكتر جیاوازی نییە لەگەڵ خواستی دووژمنان بو ئەوەی سەركەوتو بن لە داگیركردن و وێرانكردنی نیشتیمانەكەمان ، گەرەكە ئێمە بپرسین كە ئاخۆ كەی هەوڵی جددی بۆ چارەسەر كردنی ئەم كێشانە ئەدەین ئەگەر ئەم دەردە خۆ خۆریە نەبوایە بەڕای من هەر لە سەرەتاوە سەربەخۆ ئەبووین ، حاجی قادری كویی ئەفەرمووێ " تا ڕێك نەكەون قەبیلی ئەكراد هەروا دەمێنن خەرابە ئاباد " با ئیتر بەس بێت ئەم هەموو رق و كینەیە بەرامبەر بە یەكتر بائیتر هەموومان یەكتر قبوڵ بكەین و یەك دڵ بین ، با هیچ كات ئەو شەهیدانە لە یاد نەكەین كە خوێنی خۆیان رشت و خۆیان كردە فیدای ئەم گەلە بو ئەوەی بگات بە ئامانج و سەربەخۆیی كوردستان ، كە ئەم هەموو تاڵانكردن و وێرانكاریەی شارەكانی وڵاتم ئەبینم بیر ئەكەمەوە ئەڵێم چۆن یەكرێز نەبین ؟! چۆن هەموومان پێكەوە ئامانجمان بڵاوكردنەوەی ئاشتی نەبێت ، لەم باردۆخەدا پێویستە هەر تاكێك لە ئێمەی كورد بیر لە ژیان و چاكەی گشتی كوردستان بكەینەوە بەبێ بەرژەوەندی تایبەت ، تا مێژووە تاریكەكەی چەندەها ساڵەی كورد لە ژێر دەستی بسڕینەوە ، وا ئەركە لەم ساتە هەستیارەدا لایەنیگیری حیزبی وەلابنێین ، لە ئێستادا لە هەموو كات زیاتر پێویستیمان بە یەكرێزی و یەك دەنگی هەیە ، با واز لە چەواشەكردنی یەكتری بهێنین چونكە ئەوەی روویدا ڕۆیشت بوو بە رابردوو وەكو رووداوەكانی تری مێژوو بەڵام با ببێتە هەوێنێك بۆ ئاواتی سەربەخۆیمان ، چونكە ئیمرۆ گرنگە و پێویستیمان بە یەكرێزی هەیە بۆ پاراستنی دەستكەوتەكانی گەلی كورد ، بەڕای من ئاشتی و ئارامی و برایەتی ناوخۆ هێندەی سەركەوتن لە جەنگێكدا بە سودترە ، ئەم ڕەوشەی ئێستاش هەمووانی نیگەران كردووە خەڵكێكی زۆریش لەسەر زێدی خۆی ئاوارەی شوێنەكانی تر بوون و ژیان بە ئەستەم دەگوزەرێنن ، كە بیر ئەكەمەوە خودایە ئەبێت هەستێكی چەندە غەریب بێت مرۆڤ هەر لە سەر زێدی باو باپیرانی خۆی ئاوارەببێت و ئەشكەنجە بدرێت ، بۆیە وا پێویست دەكات ژیرانە مامەڵە لەگەل دۆخەكە بكەین و هەموومان دەست لە ناو دەستی یەكتر بین بۆ یەكریزی گەلی كورد ، چونكە بەم شێوەیە دەتوانین شوناس و خاكمان بپارێزین، باشترین وەفاداری بۆ گەل و خوێنی شەهیدان یەكریزیمانە دژی داگیركەران ، لە كۆتاییدا تەنیا رێگای كورد بۆ سەركەوتن و سەربەخۆی ، یەكدەنگی و یەكریزی بەدی دێ.
گەلی كورد لەماوەی چەند ساڵی رابردوو گشت رێگاكانی پێكەوەژیانی لەگەڵ بەغدا تاقی كردەوەو هەمو میكانیزمێكی گرتەبەر بۆ ئەوەی عێراق وەكو ولاتێكی یەكگرتوی فیدراڵ بمێنێتەوە. ئەوەی عێراقی بەم دۆخە برد بریتی بو لەبیركردنەوەی شۆڤینیانەی عوروبەو خەونی گەڕانەوەی دەسەڵاتێكی مەركەزی بەهێز پێچەوانەی بنەما سەرەكییەكانی دەستور كە زیاتر لە 85% خەڵكی عێراق لە 2005 دەنگی بۆ داوە. بە پێچەوانەوە لە جیاتی چارەسەركردنی كێشەكان و جێبەجێی كردنی مافە دەستوورییەكان ،بەڵام دەسەڵاتدارانی بەغدا هەوڵی داگیركردنی خاك و هەڵوەشانەوەی قەوارەی هەرێمی كوردستان دەدات . بۆیە قۆناغ بە قۆناغ هەنگاویی بۆ لێدانی پێگەی هەرێمی كوردستان داوە. بۆ ئیتر خەڵكی كوردستان متمانەیان بە حكوومەتی عێراق نەماوە و، بەڵێنەكانی حەیدەر عەبادییش بۆ خەڵكی كوردستان مایەی نیگەرانین، چونكە هیچ یەكێك لەو بەڵێنانە نەچوونەتە واری جێبەجێكردنەوە، بە تایبەت ئەوەی پەیوەندی بە میزانییە و بوودجەی گشتیی كوردستانەوە هەیە، كە بڕیار بوو پشكی هەرێمی كوردستان لە بوودجەی گشتیی 2018ی عێراق، 17% بێت، بەڵام لە ئێستادا حكوومەتی عێراق بەنیازە ئەو پشكە كەم بكاتەوە بۆ %12 و، بەو هۆیەیشەوە چەندین جار فڕاكسیۆنە كوردستانییەكان بایكۆتی دانیشتنی پەرلەمانی عێراقیان كردووە. هیچ بەڵێنێكی حەیدەر عەبادی بەم شێوەیە جێبەجێ ناكرێت، چونكە لەجیاتی ئەوەی پەنا بباتە بەر هەنگاوی پڕاكتیكی، دێت لە رێگای راگەیاندنەكانەوە قسە دەكات. جگە لەوەش هەنگاوی پڕاكتیكی لەو بارەیەوە نەنراوە و، كار نەكراوە بۆ ئەوەی متمانەی نێوان هەردوولا بگەڕێتەوە. ناكرێت عێراق بە چاوی پلەدوو سەیری هاووڵاتیانی كوردستان بكات، بەڵام ئێستا ئەوەی دەبینرێت بەو جۆرەیە. بۆیە دەبێ بپرسین، بۆچی فەرمانبەری هەرێمی كوردستان وەك فەرمانبەری عێراق شاییستەی داراییان نییە؟ بۆچی بوودجەی كوردستان لە بەغداوە بە فەرمانێكی سیاسی نانێردرێت؟ لە كاتێكدا ئەمە دروستكردنی جیاوازییە لە نێوان پێكهاتەكانی عێراقدا.خەڵكی كوردستان هیچ متمانەیەكیان بە حكوومەتی عێراق نەماوە و بەغدا نەیتوانیوە ببێتە حكوومەتێكی نیشتیمانی، كە هەموو خەڵكی عێراق بە یەك چاو سەیر بكات.ئەوە سیاسەتەی عەبادی پەیرەوی دەكات تەنیا بۆ بانگشەەی هەڵبژاردنە، وردبینیكردنی مووچەی فەرمانبەران و نەكردنەوەی فڕۆكەخانەكان تەنیا كاتكوشتنە، خەڵكیش ئەوە باش دەزانێت تا هەڵبژاردنەكانی داهاتوو مووچە ئەستەمە بنێردرێت، بۆیە من وەك خۆم باوەڕم نییە ئەوەی عەبادی بانگەشەی بۆ دەكات، جێبەجێی بكات.لە ماوەی 4 ساڵی رابردوو بە تایبەت شەرٍی پێشمەرگە و تیرۆریستان و هەروەها هاتنی سەدان هەزار ئاوارە ، بەغدا هیچی بۆ كوردستان نەنارد و ئەوەی ئێستا باسی دەكات تەنیا بۆ رایگەیاندە ،چونكە تا ئێستا بەغدا هیچ بڕەپارەیەكی نەداوەتە هەرێمی كوردستان، لە كاتێكدا پێشتر بوودجە 17% بووە و، ئێستایش قسە لەسەر كەمكردنەوەی دەكرێت، بۆیە عەبادی بۆ ئەوەی دەنگەكانی كەم نەكەن لە هەڵبژاردنەكانی داهاتووی عێراقدا، نایەتە ژێر باری بەڵێنەكانییەوە، چونكە شەقامی عەرەبی دژی كوردستانە.بەغدا بەو هەڵسوكەتە دوژمنكارانە، ڕەفتارانەی، دەیەوێت سازش بە كوردستان بكات.ئەوە سیاسەتەی بەغدا پەیرەوی دەكات بۆ لاوازكردنی هەرێمی كوردستان ناچاركردنی میللەتی كوردە بۆ جێبەجێكردنی سیاسە تاكرەویی و گەرانەوەی مەركەزییەتە و سفركردنەوەی خەبات و قوربانیدانی كورد و كوردستانە . بۆیە دەڵێم دەبێ‌ دەسەڵاتدارانی بەغدا باش ئەو واقعییە بزانن كە ئەوان تەنیا خەونی حوشتر دەبینن و ئیرادەی پۆڵایینی میللەتی كورد گشت پیلان و مەرامەكانیان پوچەڵ دەكاتەوە .بۆیە ئیتر كورد لەو قۆناغە دەرباز بووە كە ژێر دەستی و كۆیڵەبوونی دەسەڵاتدارانی بەغدا قیوڵ بكات ..