داھاتوویەکی ھاوبەش لە جیھانێکی تێکشاودا
كاروان ئیبراهیم
سەرەتاکانی دەرکەوتنی داڤۆس، دەگەڕێتەوە بۆ مامۆستایەکی ئابووریی بە ناوی کڵاوس شواب، کە لە ساڵی ١٩٧١دا مونتەدایەکی بچووکی بۆ بزنسمانە ئەوروپییەکان دامەزراند، بەڵام دواتر گۆڕانکارییە ئابووری و سیاسییەکانی جیهان وایکرد، کۆڕبەندەکە فراوان بکرێت و ئێستا دیارترین و ناودارترین نوخبەی ئابووری و سیاسیی و هونەریی لە جیهاندا لەخۆی دەگرێت. رێکخەرانی کۆڕبەندەکە لە رێگای ئەم کۆبوونەوەیەوە داوادەکەن حکومەتەکان یارمەتیدەربن بۆئەوەی هاوئاهەنگییە نێودەوڵەتییەکان بۆ چارەسەری کێشە و قەیرانە جیهانییەکان کارابکرێن. لەسەر ئاستی جیهان، دیارترین ئەو سەرۆک و سەرۆک وەزیرانانەی بەشداری کۆڕبەندەکەیان کردووە، دۆناڵد ترەمپ سەرۆکی ئەمریکا و ئەنگێلا مێرکل، ڕاوێژکاری ئەڵمانیا و ئیمانوێل ماکرۆن، سەرۆکی فەرەنسا و تێرێزا مەی، سەرۆک وەزیرانی بەریتانیان، دیارترین ئەو سەرۆکانەشی بەشداریان نەکردووە، هەریەکە لە ڤلادیمێر پۆتین سەرۆکی ڕوسیا و شی پی جینگ سەرۆکی چینن. لە هەرێمی کوردستاندا، شاندێک بە سەرۆکایەتی نێچیرڤان بارزانی سەرۆکی حکومەتی هەرێم بەشداریانکردووە و لە پەراوێزی پانێڵەکاندا چەندین کۆبونەوەیان ئەنجامداوە.
داڤۆس، تەنها کۆڕبەندێکی گرنگ نییە، بەڵکو پەراوێزی ئەو کۆڕبەندە هێندەی کۆڕبەندەکە بایەخی هەیە و دەرفەتێکە بۆ کۆبونەوە و یەکتربینینی سەرکردەکانی جیهان و سەرمایەداران. لە ڕاستیدا کۆڕبەندەکە وەک جۆرێک لە گەڕان بەداوای بازاڕ و ھەلی کاری نوێ سەیر دەكرێت لەلایەن سەرمایەداران و کەسانی خاوەن کارەوە، هه‌روه‌ها سەرکردەکانیش بەبازاڕکردن دەکەن بۆ ووڵاتەکانیان وخاوەن کار سەرمایە گوزاران ھاندەدەن ڕووبکەنە ووڵاتەکانیان بۆ وەبەرھێنان ، له‌م كۆڕبنده‌دا بەڕێز نێچیرڤان بارزانی چەندین کۆبوونەوە و دیداری لەگەڵ سەرکردە و سەرۆک و گەورە بەرپرسانی وڵاتاندا ئه‌نجامداوه کە پەیوەندییە سیاسییەکانی ئێمە دەباتە قۆناغێکی پێشکەوتووترەوە، دەیان کۆبوونەوەی لەگەڵ بزنسمان و کۆمپانیا جیھانییەکاندا ئەنجامداوە، کە ئومێدی دەکرێت ببێتە ھۆکاری زیاتر بوژانەوەی گەشەی ئابووری کوردستان و کۆمپانیا و وەبەرھێنەران دووبارە بگەڕێنەوە بۆ بوواری وەبەرھێنان لە کوردستان کە لەدوای شەڕی داعشەوە کوردستانیان بەجێ ھێشتووە یان سڵیان کردووە لە بەگەڕخستی پارەکانیان لە بوواری وەبەرھێنان و سەرمایە گوزاری کە وەک ناوچەیەکی جەنگ سەیریان کردووە. دڵنیایی سەرۆک وەزیران بۆ ئەوان زۆر گرنگە کە ھانیان بدات بگەڕێنەوە بازاڕی کاری کوردستان لەسەرجەم سێکتەر و بوارەکاندا بەتایبەتی کەرتی بانکی و کشتوکاڵ و گەشت و گوزار و پیشەسازی.
بۆیه ده‌كرێت بڵێن کۆڕبەندی ئابووری داڤۆس گه‌ر بۆ جیهان جێگه‌ی گرنگی بێت، ئه‌وه بۆ هاونشتیمانیانی كوردستان به به‌شێك له هیوا سه‌یر ده‌كرێ، و بۆ حاڵی ئێستای كوردستان هاوڵاتیان به‌چاوی پڕ ئومێده‌وه ده‌ڕواننه ده‌رئه‌نجامی هه‌وڵ و دیداره‌كانی سه‌رۆك وه‌زیرانه‌كه‌یان.
